آپ کے پسندیدہ اشعار!

[طارق شاہ]

زندگی کیا ہے گناہِ آدم
زندگی ہے، تو گنہگار ہُوں میں

رشکِ صد ہوش ہے مستی میری
ایسی مستی ہے کہ، ہُشیار ہُوں میں

لے کے نِکلا ہوُں گُہر ہائے سُخن
ماہ و انجُم کا خرِیدار ہُوں میں

دیر و کعبے میں، مِرے ہی چرچے
اور رُسوا سرِ بازار ہُوں میں

کُفر و اِلحاد سے نفرت ہے مجھے
اور مذہب سے بھی بیزار ہُوں میں

اہلِ دُنیا کے لیے ننگ سہی
رونقِ انجمنِ یار ہُوں میں

عین اِس بے سر و سامانی میں
کیا یہ کم ہے، کہ گہر بار ہوں میں

میری باتوں میں مسیحائی ہے
لوگ کہتے ہیں کہ بیمار ہُوں میں

اسرارالحق مجاز لکھنوی

 

[طارق شاہ]

مصلحت کہتی ہے وہ آئے تو کیوں آئے یہاں
دل کا یہ حال، ہر آہٹ پہ دھڑک جاتا ہے

شاذ تمکنت

 

[طارق شاہ]

نام اور رُوپ سے جو بالا ہے
کِس قیامت کے نقش والا ہے

چاندنی اُس کے تن کی اُترن ہے
سبز شبنم گلے کی مالا ہے

وزیر آغا

 

[اوشو]

موم کی سیڑھی پہ چڑھ کے چھو رہے تھے آفتاب
پھول سے چہروں کو یہ کوشش بڑی مہنگی پڑی

 

[طارق شاہ]

رات بھاری سہی کٹے گی ضرُور
دِن کڑا تھا، مگر گُزر کے رہا

احمد ندیم قاسمی

 

[طارق شاہ]

اِلزام کِسے دیں کہ، تِرے پیار میں ہم پر
جو کُچھ بھی رہی، حسبِ روایات رہی ہے

مصطفیٰ زیدی

 

[کاشفی]

اُس کی جُدائی کیسے گوارا کروں گی میں
وہ آئے یا نہ آئے، پکارا کروں گی میں

یاد آئے گا کسی کا وہ حیرت سے دیکھنا
جب آئینے میں اپنا نظارا کروں گی میں

اک جرم جو ہے آپ کو پانے کی آرزو
سن لیجئے یہ جُرم دوبارا کروں گی میں

مجھ کو خبر کہاں تھی کنارا ہے تو میرا
سوچا تو یہ تھا تجھ سے کنارا کروں گی میں

لب کھولنا تو عشق کی تہذیب ہی نہیں
نزہت نظر جھکا کے اشارا کروں گی میں
(نزہت انجم)

 

[طارق شاہ]

یہاں تک آئی ہے بپھرے ہُوئے لہُو کی صدا
ہمارے شہر میں، کیا کچھ نہیں ہُوا ہو گا

افتخارعارف

 

[طارق شاہ]

ہم جو اِنسانوں کی تہذیب لیے پھرتے ہیں
ہم سا وحشی کوئی جنگل کے درندوں میں نہیں

ساحر لدھیانوی

 

[طارق شاہ]

آنکھیں کُھلیں تو جاگ اُٹھیں حسرتیں تمام
اُس کو بھی کھو دِیا جسے پایا تھا خواب میں

سراج لکھنوی

 

[طارق شاہ]

زندگی کی جہد میں ہارا بھی دل، جِیتا بھی دل
کچھ خطائیں ہو نہ پائیں، کچھ خطائیں ہو گئیں

آنند نرائن مُلّا

 

[طارق شاہ]

دِل بھی دھڑک رہا ہے، نِگاہیں بھی در پہ ہیں
اِک خاص لُطف، وعدۂ نامعتبر میں ہے

فضل کریم احمد فضلی

 

[فلک شیر]

یہ رہِ شوق رہِ عشق ہے اے اہلِ ہوس
منزلیں آتی ہیں اس میں، نہ مقام آتے ہیں
تاثیر

 

[طارق شاہ]

زندگی اِنعامِ قُدرت ہی سہی، لیکن اِسے !
کیا غلط سمجھا، اگر بارِ گراں سمجھا تھا میں

دوارکا داس شُعلہ

 

[طارق شاہ]

کسی نظر میں تو رہ جائے آخری منظر!
کوئی تو ہو مجھے غرقاب دیکھنے کے لئے

اظہرعنایتی

 

[طارق شاہ]

جو خُوب رُو ہے اُس کو خرِیدار ہے ضرُور
یُوسف کو حُسن برسرِ بازار لے گیا

غلام ہمدانی مصحفی

 

[طارق شاہ]

آنکھیں اُجڑ چُکی ہیں، مگر رنگ رنگ کے
خوابوں کی اب بھی فصل لگائے ہُوئے ہیں لوگ

اظہرعنایتی ، لکھنؤ

 

[طارق شاہ]

کچھ دن سے بے دماغیِ اظہر ہے رنگ پر !
بستی میں اُس کو مِیر بنائے ہُوئے ہیں لوگ

اظہرعنایتی ، لکھنؤ

 

[طارق شاہ]

ٹُوٹنے اور بِکھرنے کا کوئی موسم ہو
پُھول کی ایک دُعا ! موجِ ہَوا آہستہ

پروین شاکر

 

[چوہدری لیاقت علی]

توڑ کر عہد کرم ناآشنا ہو جایئے
بندہ پرور جایئے اچھا خفا ہو جایئے

راہ میں ملئے کبھی مجھ سے تو ازراہِ ستم
ہونٹ اپنا کاٹ کر فوراً جدا ہو جایئے

ہائے ری بے اختیاری یہ تو ہو سب کچھ مگر
اُس سراپا ناز سے کیونکر خفا ہو جائیے

چاہتا ہے مجھ کو تو بھولے نہ بھولوں میں تجھے
تیرے اس طرزِ تغافُل کے فدا ہو جائیے

کشمکش ہائے الم سے اب یہ حسرت جی میں ہے
چھُٹ کے ان جھگڑوں سے مہمانِ قضا ہو جائیے

حسرت موہانی