آپ کے پسندیدہ اشعار!

[شمشاد خان]

کچھ ایسا سودا ہے سب کے سر میں مزاج بگڑے ہوئے ہیں سب کے
کوئی بھی سنتا نہیں کسی کی کہیں کسی سے تو کیا کہیں ہم
(آتش بہاولپوری)

 

[مریم افتخار]

رہی نہ طاقتِ گفتار اور اگر ہو بھی
تو کس امید پہ کہیے کہ آرزو کیا ہے
(غالب)​

 

[شمشاد خان]

اور کیا اس سے زیادہ کوئی نرمی برتوں
دل کے زخموں کو چھوا ہے ترے گالوں کی طرح
(جاں نثار اختر)

 

[جا ن]

گر زندگی میں مل گئے پھر اتفاق سے
پوچھیں گے اپنا حال تری بے بسی سے ہم
(ساحر لدھیانوی)

 

[شمشاد خان]

یوم مئی کے پس منظر میں :

 

[شمشاد خان]

کوئی شام مجھ میں قیام کر، میرے رنگ و روپ کو نکھار دے
جو گزر گئی سو گزر گئی، میری باقی عمر سنوار دے

 

[مریم افتخار]

ہزاروں خواہشیں ایسی کہ ہر خواہش پہ دم نکلے
بہت نکلے مرے ارمان لیکن پھر بھی کم نکلے

نکلنا خلد سے آدم کا سنتے آئے ہیں لیکن
بہت بے آبرُو ہو کر ترے کوچے سے ہم نکلے

ہوئی جن سے توقع خستگی کی داد پانے کی
وہ ہم سے بھی زیادہ خستۂ تیغِ سِتم نکلے

محبت میں نہیں ہے فرق جینے اور مرنے کا
اُسی کو دیکھ کر جیتے ہیں، جس کافر پہ دم نکلے

(غالب)​

 

[ام اویس]

مجھ سے تم دور رہ کے بات کرو
خود کو رسوا نہ میرے ساتھ کرو

عشق بھی چھوت کی ہے بیماری
مجھ سے ملنے میں احتیاط کرو

شہزاد احمد کھرل

 

[ام اویس]

جس قدر آج کل فراغت ہے
کیوں نہ اک عشق اور ہوجائے ؟

شہزاد احمد کھرل

 

[شمشاد خان]

ہے نسیم بہار گرد آلود
خاک اڑتی ہے اس مکان میں کیا

یہ مجھے چین کیوں نہیں پڑتا
ایک ہی شخص تھا جہان میں کیا
(جون ایلیا)

 

[لاريب اخلاص]

کوزہ گر ! خاک مری خواب کے خاکے سے گزار
کربِ تخلیق! مجھے سوئی کے ناکے سے گزار

ہستیء جاں سے گزر جائے مرا پختہ ظروف
فرش پر پھینک اسے اور چھناکے سے گزار

ساحلِ خشک ، نمیدہ ہو کبھی بحرِ کرم
خود گزر یا اسے لہروں کے چھپاکے سے گزار

حدّتِ عشق میں پگھلا دے مرے سارے فراز
مجھ کو اس بار کسی خاص علاقے سے گزار

سنگ پاٹوں کی یہ چاکی مجھے کیا پِیسے گی
تُو مجھے ارض و سماوات کے چاکے سے گزار

خالِ بنگال ترا جادو چلے گا لیکن
تُو مجھے پہلے کسی آنکھ کے ڈھاکے سے گزار

رانا سعید دوشی

 

[شمشاد خان]

بعد مرنے کے کوئی بوسۂ رخصت دے گا
کیا خدا مجھ کو بھی ایسی بھلی قسمت دے گا

زندگی ہے یہ میاں رنج و الم تو ہوں گے
جو گزارے گا وہ لازم ہے کہ قیمت دے گا
(عابد عمر)

 

[مریم افتخار]

شبنم! تجھے اجازتِ اظہارِ غم تو ہے
تو خوش نصیب ہے کہ تری آنکھ نم تو ہے
(زکی کیفی)​

 

[شمشاد خان]

یہ کیا پڑی ہے تجھے دل جلوں میں بیٹھنے کی
یہ عمر تو ہے میاں دوستوں میں بیٹھنے کی

چھپائی جاتی نہیں زردیاں سو دور ہوں میں
وگرنہ ہوتی ہے خواہش گلوں میں بیٹھنے کی
(عابد عمر)

 

[مریم افتخار]

ستم ظریفی وقت نے
کلیوں کی نزاکت کو
دلوں کی محبت کو
اس طرح سے مسلا ہے
اس طرح سے کچلا ہے
زندگی اذیت ہے
سانس کی بھی قیمت ہے
کس کا ہاتھ ہے
جو خوں سے رنگا نہیں
کس کا گریباں ہے
جو گرفت سے بچا نہیں
صدائے موت آتی ہے
شہر بھر کی گلیوں سے
خوں کی بو آتی ہے
پھولوں اور کلیوں سے​

 

[شمشاد خان]

یہ جو نشہ ہے رقص کا اک مری ذات تک نہیں
کوزہ بہ کوزہ گل بہ گل ساتھ خدا ہے رقص میں
(رضی اختر شوق)

 

[مریم افتخار]

گلوں میں رنگ بھرے، بادِ نو بہار چلے
چلے بھی آؤ کہ گلشن کا کاروبار چلے

قفس اداس ہے یارو، صبا سے کچھ تو کہو
کہیں تو بہرِ خدا آج ذکرِ یار چلے

جو ہم پہ گزری سو گزری مگر شبِ ہجراں
ہمارے اشک تری عاقبت سنوار چلے
(فیض)
​

 

[شمشاد خان]

کبھی تو صبح ترے کنج لب سے ہو آغاز
کبھی تو شب سر کاکل سے مشکبار چلے

بڑا ہے درد کا رشتہ یہ دل غریب سہی
تمہارے نام پہ آئیں گے غم گسار چلے

جحضور یار ہوئی دفتر جنوں کی طلب
گرہ میں لے کے گریباں کا تار تار چلے

مقام فیضؔ کوئی راہ میں جچا ہی نہیں
جو کوئے یار سے نکلے تو سوئے دار چلے
(فیض احمد فیض)

 

[لاريب اخلاص]

اندھے گونگے بہرے لوگ

اجلے کپڑے میلے لوگ

کم عمری میں سنتے ہیں

مر جاتے ہیں اچھے لوگ

بھاگ رہے ہیں دنیا میں

پاؤں کو سر پہ رکھے لوگ

رستے میں مل جاتے ہیں

تتلی کے پر جیسے لوگ

آئینوں کو لے کر ساتھ

پھرتے ہیں بے چہرے لوگ

مہنگے گھر میں رہتے ہیں

برف کے جیسے ٹھنڈے لوگ

دور حاضر میں جاویدؔ

کپڑوں میں ہیں ننگے لوگ
ملک زادہ جاوید

 

[شمشاد خان]

کسے اپنا بنائیں کوئی اس قابل نہیں ملتا
یہاں پتھر بہت ملتے ہیں لیکن دل نہیں ملتا
(مخمور دہلوی)