تحریرِ آبِ زرر۔۔ اعجاز عبید

[الف عین]

یہ کیسی رات، کہیں دور تک خدا بھی نہیں
ضرور کوئی پیمبر یہاں ہوا بھی نہیں
یہ اک ہجوم ابھی سے کنارے پر کیوں ہے
ابھی یہاں تو تماشہ کوئی ہوا بھی نہیں
کوئی تو ہو جو مجھے شاخ سے جدا کر دے
ہوا کے ہاتھ کا چاقو مگر کھُلا بھی نہیں
چلیں چمن کو، کہ پہلی کلی کا سواگت ہو
خزاں کے ہاتھ میں نیزہ کوئی بچا بھی نہیں
یہ سوچتا ہوں کہ یہ باب بند کر دوں آج
کہا کروں کہ میں اُس شخص سے ملا بھی نہیں

1971ء

 

[الف عین]

دیکھ کے بحر بے کنار، لوگ سبھی ٹھہر گئے
ہم تو سفر نصیب تھے، لمحوں میں پار اتر گئے
سر ملے سارے بے بدن، انُ پہ کفن بندھے ہوئے
لوگ جو اپنے ساتھ تھے، آج وہ سب کدھر گئے
کیسا طلسم دائرہ، کیسی کمندِ موج تھی
کچھ بھی خبر نہیں کہ کون ہم کو اسیر کر گئے
سنتے رہے کہ آج کل بحر میں پیچ و تاب ہے
ہم تو سدا کے بے خبر، مثل ہوا گزر گئے
سمت بغیر ساعتیں کون سے شہر لے گئیں
پہلے تو سنگ بن گئے، ریت سے پھر بکھر گئے
والئِ شہر کون ہے؟ پوچھ رہی تھی اک صدا
ہم ایسے حالِ بد، کسی سے کیا کہتے ، چپ گزر گئے

1971ء

 

[الف عین]

عجب بکھرتے سے منظر نظر کے آگے ہیں
طنابیں ٹوٹتی گِرتے اکھڑتے خیمے ہیں
ہمارے گرد درندوں کے ننگے چہرے ہیں
کہاں گئے جو کہتے تھے "ہم فرشتے ہیں‘‘
کسی طرح سہی، شعلہ بنیں، بکھر جائیں
سلگتے پیڑ ہوا کو ترستے رہتے ہیں
نکیلے نیزوں کو سر کا عَلَم مبارک ہو
تمام دشمنوں سے کہہ دو، ہم اکیلے ہیں
اب آج سچّا کوئی شعر کیا کہیں گے کہ ہم
تمام رات یہ آرام خوب سوئے ہیں

1971ء

 

[الف عین]

صدف کے کان میں اک بات کر کے سب چپ تھے
پھر اس کے بعد، سِوا اک گہر کے ، سب چپ تھے
بجھے بجھے تھے تو ہم روشنی بھی دے نہ سکے
صدا کی طرح ہوا میں بکھر کے سب چپ تھے
نہ جانے کیسا انہونا سا حادثہ تھا وہ
بس ایک لمحے میں افراد گھر کے سب چپ تھے
سمجھ رہے تھے سمندر میں کچھ خزانے ہیں
نشیبِ بحر میں لیکن اتر کے سب چپ تھے
خدا کرے یہ کہیں میری بد دعا ہی نہ ہو
جو بولتے ہوئے تھے عمر بھر کے، سب چپ تھے

1972ء

 

[الف عین]

اس نے دیکھا تھا عجب ایک تماشا مجھ میں
میں جو رویا تو کوئی ہنستا رہا تھا مجھ میں
میری آنکھوں سے خبر جان نہ لی ہو اس نے
کوئی بادل تھا، بہت ٹوٹ کے برسا مجھ میں
جھانکنے سے مری آنکھوں میں سبھی ڈرنے لگے
جب سے اترا ہے کوئی آئینہ خانہ مجھ میں
کیا ہوا تھا مجھے کیوں سوچتا تھا اس کے خلاف
ورنہ اس کو تھا عجب ایک عقیدا مجھ میں
ساتھ ساتھ اس کے میں خود روتا رہا تھا اس شام
اس کو دیتا جو دلاسہ وہ نہیں تھا مجھ میں

1972ء

 

[الف عین]

افق کے پار کوئی رہگزر نہ دیکھ سکے
کوئی چراغ بھی حدّ نظر نہ دیکھ سکے
فصیلوں پار بہت چاندنی بکھرتی رہی
اترتے چاند کو دل میں مگر نہ دیکھ سکے
چمکتی دھار کا لمحہ ہماری آخری یاد
رگِ گلو میں چبھا نیشتر نہ دیکھ سکے
ہتھیلیوں پہ رکھی شمعیں ساری رات جلیں
پھر اس کے بعد کبھی ہم سحر نہ دیکھ سکے
تمام عمر رہی دل میں گونجتی اک بات
وہ اتنا چُپ تھا کہ ہم بول کر نہ دیکھ سکے

1972ء

 

[الف عین]

ابھی نہ اترے گا دریا، چڑھاؤ پر ہے بہت
رواں ہی رہنے دو کشتی، ابھی سفر ہے بہت
اب آرزو نہ رہی کوئی، ورنہ اب کیا تھا
سنا ہے اپنا ستارہ عروج پر ہے بہت
نہ جانے کون سی بھولی کہانی یاد آئی
خبر سنی ہے کہ وہ آج چشم تر ہے بہت
دعا قبول ہوئی، یہ کہانیوں میں پڑھا
کہ بد دعاؤں میں سنتے ہیں اب اثر ہے بہت
کوئی نہ ہو تو یہ سارا جہان بے معنی
ہو کوئی ساتھ تو پھر ہم کو ایک گھر ہے بہت

1972ء

 

[الف عین]

(محبوب خزاں کے لیے)

غم بھی اتنا نہیں کہ تم سے کہیں
اور چارہ نہیں کہ تم سے کہیں
آج ہم بے کراں سمندر ہیں
تم وہ دریا نہیں کہ تم سے کہیں
یوں تو مرنے سے چین ملتا ہے
یہ ارادہ نہیں کہ تم سے کہیں
نیلی آنکھوں کی چاندنی کے لیے
اب اندھیرا نہیں کہ تم سے کہیں
تم اکیلے نہیں رہے تو کیا
ہم بھی تنہا نہیں کہ تم سے کہیں
اب نہ وہ غم کہ اپنے ہاتھ عبیدؔ
شبنم آسا نہیں کہ تم سے کہیں

1972ء

 

[الف عین]

کیا تھا کیا کہ مجھے ایسا بادبان دیا
ہوا کی سمتِ مخالف میں مجھ کو تان دیا
تمہاری آنکھیں مری داستاں پہ نم کیوں ہیں
زمین میری تھی، پھر تم نے کیوں لگان دیا
یہ کون کہتا ہے زنجیر پائی کا غم ہے
مجھے یہ دکھ ہے کہ اس نے غلط بیان دیا
عجیب تھا وہ ، مجھے دھوپ سے بچانے کو
کہ جس نے مجھ کو یہ شعلوں کا سائبان دیا

1972ء

 

[الف عین]

(ناصر کاظمی کے لیے)

کہیں کھو نہ جائے یہ چاند بھی۔ ابھی چپ رہو
ابھی برف برف ہے چاندنی۔ ابھی چپ رہو
جو ندی چڑھے گی تو خود ہی کہہ دے گی ساری بات
ابھی ناؤ اپنی ہے ڈولتی، ابھی چپ رہو
وہ جو نیزہ سر پہ لٹک رہا ہے، نہ گر پڑے
کہیں بات کاٹ دے خامشی، ابھی چپ رہو
ابھی صرف سُن ہی ہوئی ہیں ہاتھوں کی انگلیاں
ابھی رنگ لائے گی بے حسی، ابھی چپ رہو
وہ کہاں ہیں لب ۔ کہ یہ روئے تو اسے چپ کریں
اسے شور و شر سے ہے دشمنی ابھی چپ رہو

1973ء

 

[الف عین]

اس سے رشتے کو اپنی آس کہیں
لب بھی کیا خود کو ہم اداس کہیں
پیاسی دھرتی صلائے عام کہے
ہم خدا کی ادائے خاص کہیں
جو تعلق کہ اس کی ذات سے ہے
کیا کہیں اس کو، گر نہ آس کہیں
دور جنگل میں آگ کا منظر
اپنے اندر جو ہو تو پاس کہیں
یوں کہیں داستاں ۔۔ کہ ہنستے لوگ
’’ہم بھی لو ہو گئے اُداس‘‘ کہیں

1973ء

 

[الف عین]

جب آفتاب ادھر آئے جگمگاؤں گا
میں آنسوؤں کی طرح کیسے ٹوٹ جاؤں گا
ہر ایک چہرے پہ گردِ سفر اُڑاؤں گا
ہزار روکیں گے سب ، میں گزر بھی جاؤں گا
اگر سفید کبوتر مرا لہو پی لے
مجھے یقیں ہے، شہادت کا درجہ پاؤں گا
(ق)
ہر ایک طور مری واپسی یقینی ہے
جو اب کے نکلا تو پھر لوٹ کر بھی آؤں گا
سمندروں میں جزیروں کی طرح اُبھروں گا
تو شاخ پر کبھی کلیوں سا سر اٹھاؤں گا

ہر ایک بوند لہو کی بنائے گی اک فوج
میں اب کے خود پہ جو تلوار آزماؤں گا
ابھی یہ روتی ہوئی ننھی بچی ہنس دے گی
میں مٹی پانی سے وہ فاختہ بناؤں گا
کہو تو رنگ دوں یہ پیلی ریت کے ذرے
کہا نہ تھا کہ یہ موسم بدلنے آؤں گا
سنا ہے آج اسے بے سبب اداسی ہے
میں اس کی آنکھوں میں شمعیں جلانے آؤں گا

1973ء

 

[الف عین]

کس سے ملنے جاؤ اب کس سے ملاقاتیں کرو
تم اکیلے ہو دلِ تنہا سے ہی باتیں کرو
پھر یوں ہی مِل بیٹھیں ہم، اور دکھ بھری باتیں کریں
ہاتھ اُٹھا کر یہ دعا مانگو، مناجاتیں کرو
سب پرندے اپنے اپنے جنگلوں میں کھو گئے
اب تو ہلتی ڈالیوں سے بیٹھ کر باتیں کرو
اتفاقاً ہم تمہارے سائے سے گزریں کبھی
بادلو، تم پیار کے لمحوں کی برساتیں کرو
اب تو جیسے اس عمارت کو بھی چپ سی لگ گئی
کھڑکیو، دروازو ، چہکو ، گاؤ، کچھ باتیں کرو

1973

 

[الف عین]

ہے دھوپ کا سفر، پہ شجر درمیاں میں ہے
یعنی کسی حسین کا گھر درمیاں میں ہے
اک سمت گہرے پانی ہیں، اک سمت سرخ ریت
پھولوں بھری سی ایک ڈگر درمیاں میں ہے
ہر اک طرح کا رختِ سفر ساتھ لے چلیں
کیا جانیں کیسی راہگزر درمیاں میں ہے
دونوں ہی ایک کمرے میں کب سے اکیلے ہیں
پاکیزگی کا رشتہ مگر درمیاں میں ہے
پھر اس کے بعد ہے وہ سنہری مکاں کا شہر
اندھی سی ایک راہ گزر درمیاں میں ہے
بس اس بیاں پہ ختم ہے یہ داستان فتح
نیزے چہار سمت ہیں، سر درمیاں میں ہے

1973ء

 

[الف عین]

(چھند دوہا)
ڈھونڈیں کے پھر ہم کہاں ، ساگر ساگر پھول
اگلے برس جانے کہاں، جائے گا بہہ کر پھول
شعر کہے تو یوں لگا آج کئی دن بعد
بادل چاروں اور ہیں، اندر باہر پھول
پھینکے بھی تو اُٹھائے کون، بانٹے بھی تو کسے
دھن شاعر کے پاس کیا، ہوا، سمندر، پھول
سورج پر تو ابر تھے، کرنیں کیسے آئیں
جسم میں کیوں مُرجھا گیا ، اندر اندر پھول
تاروں کا پردہ ہٹا، اور کوئی دیوی
سونے کے اک تھال میں ، لائی سجا کر پھول
پتھر پھینکے تال میں، ہم دونوں نے آج
کل عبیدؔ تم پاؤ گے لہر لہر پر پھول

1973ء

 

[الف عین]

ہم دئے کس ادا سے روشن ہیں
اس کی دامن ہوا سے روشن ہیں
نیزے، نیزوں کی نوکوں پر شعلے
شعلے شعلے میں کاسے روشن ہیں
کتنے تاریک لوگ اپنے یہاں
اپنی شعلہ نوا سے روشن ہیں
اور ہم بوند بوند نور لئے
اپنے غارِ حرا سے روشن ہیں
آنسو آنسو قرآن کی سورت
ہونٹ اس کے دعا سے روشن ہیں
پھر بھی آنکھوں کے دیپ چمکیں گے
لاکھ سورج بلا سے روشن ہیں
تشنگی بھی کرن کرن ہے عبیدؔ
ریت کے ذرے پیاسے روشن ہیں

1973ء

 

[الف عین]

کہنے کو کچھ نہیں تھا، سب لوگ چپ کھڑے تھے
آنکھوں کے دیپ لیکن چپ چاپ جل رہے تھے
بس پھر وہ آخری تھا اپنے ملن کا لمحہ
ہم دونوں اک شجر کے سائے میں رو رہے تھے
پھر کوئی نوک نیزہ سر سرخ ہو گئی تھی
ہر سنگ پر لہو تھا، جس رہ پہ ہم چلے تھے
پھر یہ خبر کسے تھی، اب کس کی داستاں ہے
ہم اپنی کہتے کہتے شاید کہ سو گئے تھے
اک سمت جنگلوں میں پاگل ہوا کے نوحے
اک سمت اک الاؤ۔ سب آلہا گا رہے تھے

1973ء

 

[الف عین]

جو مجھے شکلِ نگینہ دیتا ایسا کون تھا
دوسرے مجھ بیش قیمت کا شناسا1 کون تھا
یہ وہ لمحہ تو نہیں جس سے کہ وابستہ تھا میں
میرے اندر ہم نوا دل کے دھڑکتا کون تھا
ایک اک کر کے سبھی بادل بکھر کر رہ گئے
آسمانوں پر زمیں کا پھر شناسا کون تھا
نوچ ڈالے تھے سبھی نے اپنے اپنے سب نقاب
پھر بھی اک چہرہ لگا تھا آشنا سا، کون تھا؟
ریزہ ریزہ ہر کنارہ توڑتا جاتا تھا میں
لمحہ لمحہ میرے اندر سر اُٹھاتا کون تھا
...........................
1۔ ایطا کا مجھے احساس ہے
1973ء

 

[الف عین]

دو غزلیں
ایک (مسلسل)

ایسے ہی دن تھے کچھ ایسی شام تھی
وہ مگر کچھ اور ہنستی شام تھی
بہہ رہا تھا سرخ سورج کا جہاز
مانجھیوں کے گیت گاتی شام بھی
صبح سے تھیں ٹھنڈی ٹھنڈی بارشیں
پھر بھی وہ کیسی سلگتی شام تھی
گرم الاؤ میں سلگتی سردیاں
دھیمے دھیمے ہیر گاتی شام تھی
گھیر لیتے تھے طلائی دائرے
پانیوں میں بہتی بہتی شام تھی
عرشے پر ہلتے ہوئے دو ہاتھ تھے
ساحلوں کی بھیگی بھیگی شام تھی
کتنی راتوں کو ہمیں یاد آئے گی
اپنی اکلوتی سہانی شام تھی
شاخ سے ہر سرخ پتّی گر گئی
پھر وہی بوجھل سی پیلی شام تھی
چاندی چاندی رات کو یاد آئے گی
سونا سونا سی رنگیلی شام تھی
سولہویں زینے پہ سورج تھا عبیدؔ
جنوری کی اک سلونی شام تھی

 

[الف عین]

دو:.

پیڑ کے پیچھے ہمکتی شام تھی
تازہ پھولوں کی وہ پہلی شام تھی
پھر اچانک چھپ گئے تارے تمام
ورنہ کیسی ٹھنڈی بھیگی شام تھی
اُس طرف راتوں کا لشکر تھا عظیم
اِس طرف تنہا نِہتّی شام تھی
مندروں میں جاوداں سی ہو گئی
دویہ1 پیتل سی سنہری شام تھی
صبح کاذب کے اندھیرے چونک اٹھے
شمع دانوں میں پگھلتی شام تھی
(1)दिव्य

1973ء