خط! اک دوست کے نام

[سید عمران]

بسم اللہ الرحمن الرحیم
ریاض میں مقیم عمرے پر جانے والے اک دوست کے نام​

السلام و علیکم!
میاں کیسے ہو؟ آخری اطلاعات تک تو بالکل ٹھیک تھے۔ مگر آخری خط سے ذہنی طبیعت رواں نہیں لگتی۔ یہ چوکور ڈبہ بھی بھئی کمال کی چیز ہے۔ کہاں ہم گھنٹوں خطابت میں سر کھپاتے۔ ورق کے انتخاب پر دماغ و دل مناظرے کرتے۔ پھر قاصد کے نخرے الگ۔ مگر میاں یہ موٹا بھائی نے تو اس سے روشناس کرا کر کمال کر دیا ہے۔ اک جھاڑو سا پکڑ کر ساری لائنوں پر پھیر دو تو بس خطاطی اور۔ ایسا دل آسا خطاط تو کبھی نہ دیکھا تھا نہ سنا ۔ اور قاصد کی برق رفتاری تو دیکھنے لائق۔ ادھر مراسلہ لکھا ادھر ویسے چوکور ڈبے میں پہنچا۔ اور مزا یہ کہ رازداری شرط۔ بھئی بہت خوب۔ اللہ بھلا کرے ہمارےموٹے بھائی کا۔ اس چیز کا استعمال سکھا کر سیدھا جنت والے پلاٹ سے ۱۰ مرلہ زمین کے حقدار ٹھہرے۔
میاں وہ مکہ کا کیا چکر ہے ؟ ہم نے تو یہاں صوفیاء کی شاعری میں ہمیشہ یہی پڑھا کہ​

مکے دے وال اوہی جاندے کم جنہاں دے ٹوٹی​

اب اس مصرعہ کی روشنی میں دیکھیں تو تمہیں اچھا بھلا شریف پاتے ہیں۔ پھر ادھر جانا چہ معنی دارد؟ اور اوپر سے تمہاری عمر ہی کیا ہے۔ کوّے سے تو کوئی ۴ سال چھوٹے ہی رہے ہوگے تم۔ اس بھری جوانی میں دیدار کعبہ! نہ میاں نہ۔۔۔ دیکھو ایسا نہ کرنا۔ یہ نہ ہو وہاں جا کر کوئی نیک ہونے کی کوئی دعا مانگ بیٹھو۔ اور وہ ذات بےنیاز تمہیں خالی ہاتھ نہ لوٹائے۔ جب یہ جوانی ڈھلے گی تو توبہ بھی کر لینا۔غم نہ کر عمر پڑی ہے ابھی۔ سنا ہے زیارات کا بھی ارادہ کر رکھا ہے۔ تمہیں وہاں مال مڈی جمع کرنے بھیجا ہے کہ سیر و سیاحت کرنے۔ زیارات کا اتنا ہی شوق تھا۔ تو یہاں بتاتے۔ صرف ملتان اور اچ شریف میں ہی تمہیں اتنی زیارات دکھا دیتے کہ سوچ ہے تمہاری۔ ابلیس بھی تمہاری اس حرکت سے سخت پریشاں ہے۔ اور یہی شعر پڑھتا پھرتا ہے​

یہ عمرے پر جانے کا کیا تذکرہ ہے
تمہارے سوا کوئی اپنا نہیں ہے​

اچھا اب جا ہی رہے ہو تو دل کو درد سے نہ بھر لینا۔ جیسے گئے ہو ویسے ہی واپس آنا۔ میں نے سنا ہے کہ وہاں جا کر طبیعت بڑی نیکی کی طرف مائل ہوتی ہے۔ بڑے بڑے ہل جاتے ہیں۔ اور کچھ ظالم تو خوف خدا سے رو دھو بھی لیتے ہیں۔ اپنے محلے کے حاجی صاحب کو دیکھتا ہوں تو اور بھی رونا آتا ہے۔ کیسے آزاد مرد تھے۔ کبھی تو دختر رز کے عشق میں مجذوب ہو کر صرف زیر جامہ میں ہی سڑکوں پر نکل آتے تھے۔ اور فرماتے تھے کہ میاں پردہ دیکھنے والے کی آنکھ کا ہوتا ہے۔ مگر اب دیکھو توانگور سے بھی شرماتے ہیں۔ ہر وقت چہرے پر اک رقّت طاری رہتی ہے۔ ظلم یہ کہ لوگ اسکو نیکی پر محمول کرتے ہیں۔ لو بھئی یہ کون سی نیکی ہے کہ اچھا بھلا ہنستا کھیلتا آدمی روتا پھرے اور لوگ اسے حاجی صاحب حاجی صاحب کہیں۔ بس یار دل کانپتا ہے آشیاں کو آشیاں کہتے۔ تم ننھی جان، خدا نخواستہ اس طرح الجھ گئے تو ہم ۔۔۔۔شش شش میرے منہ میں خاک۔۔ ویسے بھی تمہارے چہرے پر نورانیت بڑی عجیب سی لگے گی۔
اچھا سنو! میرے لیئے تبرکات میں کھجور لے آنا۔ تمہیں پتا یہی وہ تبرک ہے جس پر مجھے سب سے زیادہ خوشی ہوتی۔ یہ اپنے محلے کے ہی باؤ جی جب گئے تھے۔ تو میرے لیئے جائے نماز اٹھا لائے۔ کہنے لگے میاں میں اسے ادھر بچھا کر نماز پڑھا کرتا تھا۔ میں نے کہا قبلہ آپ نے پڑھی۔ پر مجھےکیا فائدہ۔ مجھے تو کھجور لا دیتے۔ ڈر کے مارے اس پر نماز نہیں پڑھتا کہ کہیں اثرانداز نہ ہو جائے۔ آخر کو احتیاط بہتر ہے۔
اب آخر میں نصیحت بھی سنتے جاؤ۔ اگر کوئی دلگداز واقعات سنانے شروع کرے تو فورا دل کو ادھر ادھر مائل کرنے کی کوشش کرنا۔ ان لوگوں میں عیب ڈھونڈنا تا کہ اندر کی نیکی کو حاوی ہونے کا موقع نہ ملے۔ اور کبھی کبھی تو ٹھیک ہے مگر کثرت سے ایسی جگہوں پر نہ جانا۔ آگے ہی کل کے خط میں تم نے یہ بات لکھ کر ڈرا دیا ہے کہ نمازوں میں باقاعدگی آگئی ہے۔ میری دعائیں تمہارے ساتھ ہیں۔​

ہاہاہاہاہا۔۔۔
حد ہی ہوگئی یعنی کہ۔۔۔
راہِ غیر مستقیم پر چلانے کے لیے بھی کتنے نصائح کی ضروت پڑتی ہے!!!

 

[نیرنگ خیال]

ہاہاہاہاہا۔۔۔
حد ہی ہوگئی یعنی کہ۔۔۔
راہِ غیر مستقیم پر چلانے کے لیے بھی کتنے نصائح کی ضروت پڑتی ہے!!!

بھائی یہ راہ غیر مستقیم کا راستہ بہت خطرناک ہے۔۔۔ جیسے فلرٹ میں ایک چال غلط اور تم شادی شدہ۔۔۔ بالکل ایسے ہی ۔۔۔ ایک نیکی۔۔۔ اور دس دن کی ساری محنت پر پانی۔۔۔۔۔ بچپن میں جب ہم ویڈیو گیم کھیلتے تھے۔۔۔ تو ایک آدھی نماز بھی پڑھ لیتے تھے۔۔۔ محلے کے بزرگ بلاوجہ ہی بابا کو راہ چلتے بتایا کرتے تھے۔۔۔ بڑا نیک بچہ ہے۔۔۔ مسجد میں بہت ادب سے سلام کرتا ہے۔۔۔

 

[سیما علی]

بھائی یہ راہ غیر مستقیم کا راستہ بہت خطرناک ہے۔۔۔ جیسے فلرٹ میں ایک چال غلط اور تم شادی شدہ۔۔۔ بالکل ایسے ہی ۔۔۔ ایک نیکی۔۔۔ اور دس دن کی ساری محنت پر پانی۔

کیا کہنے کدھر ملایا فلرٹ کو ۔۔۔۔پر اب یہ شریف الفس قسم ناپید ہے جو ایک چال غلط اور تم شادی شدہ کی جگہ بیچاری کو یہ جواب مل رہا ہوتا ہے دوست تو تم بہت اچھی ہو مگر بیوی کے خانے میں فٹ نہیں ہو ۔۔۔۔بھیا یہ انتہائی سیریس ایشو ہے بلکہ معاشرتی گراوٹ کا ایک انداز ۔۔۔اسی طرح کی منافقتیں نیکی کے نام پر بھی روز نظر آتی ہیں ۔آپ کی دراصل تربیت کرنے والے بے حد صالح ہیں ۔سلامت رہیے بہت سارا پیار
زین رحاب اور عشبہ کو جیتے رہیے اور ہاں دلہن کو ہماری طرف سے بہت۔۔۔

 

[سید عمران]

اور ہاں دلہن کو ۔۔۔

یہ کام کسی ترغیب کا مرہون منت نہیں!!!

 

[سیما علی]

یہ کام کسی ترغیب کا مرہون منت نہیں!!!

پوری بات نہ لکھی جائے تو آپ لے اُڑتے ہیں

 

[سید عمران]

پوری بات نہ لکھی جائے تو آپ لے اُڑتے ہیں

بات پوری تو ہوگئی تھی۔۔۔
آدھی تحریری، آدھی تصویری!!!

 

[سیما علی]

آپ سے جیت تو ہم سکتے ہی نہیں سرنڈرڈ
چرچلِ ثانی

 

[نیرنگ خیال]

کیا کہنے کدھر ملایا فلرٹ کو ۔۔۔۔پر اب یہ شریف الفس قسم ناپید ہے جو ایک چال غلط اور تم شادی شدہ کی جگہ بیچاری کو یہ جواب مل رہا ہوتا ہے دوست تو تم بہت اچھی ہو مگر بیوی کے خانے میں فٹ نہیں ہو ۔۔۔۔بھیا یہ انتہائی سیریس ایشو ہے بلکہ معاشرتی گراوٹ کا ایک انداز ۔۔۔اسی طرح کی منافقتیں نیکی کے نام پر بھی روز نظر آتی ہیں ۔آپ کی دراصل تربیت کرنے والے بے حد صالح ہیں ۔سلامت رہیے بہت سارا پیار
زین رحاب اور عشبہ کو جیتے رہیے اور ہاں دلہن کو ہماری طرف سے بہت۔۔۔