دیئے گئے لفظ پر شاعری

[شمشاد]

ہم سانجھ سمے کی چھایا ہیں تم چڑھتی رات کے چندر ماہ
ہم جاتے ہیں تم آتے ہو پھر میل کی صورت کیونکر ہو
(انشاء)

چھایا / چھاؤں

 

[عثمان رضا]

بیٹھ جاتا ہوں جہاں چھاؤں گھنی ہوتی ہے
ہائے کیا چیز غریب الوطنی ہوتی ہے
حفیظ جونپوری

غریب

 

[شمشاد]

کسی نے دور سے دیکھا کوئی قریب آیا
امیر شہر میں جب بھی کوئی غریب آیا
(رام ریاض)

امیر

 

[عثمان رضا]

صبح کا سونا جو ہاتھ آتا امیر
بھیجتے تحفہ مؤذن کے لیے

صبح

 

[شمشاد]

فاصلہ چند قدم کا ہے منا لیں چل کر
صبح آئی ہے مگر دور کھڑی ہے یارو
(جان نثار اختر)

قدم

 

[عثمان رضا]

ہر قدم منادی ہے زندگی کے رستے میں
موت کیوں بچھا دی ہے زندگی کے رستے میں

موت

 

[شمشاد]

وہ جانِ جاں نہیں آتا تو موت ہی آتی
دل و جگر کو کہاں تک بھلا لہو کرتے
(خواجہ حیدر علی آتش)

لہو

 

[عثمان رضا]

لہو لہو ہوجائیں پائوں شکوہ نہیں کرنا
پہنچ کر منزل پر رستوں کا گلہ نہیں کرنا

پاؤں

 

[شمشاد]

پاؤں سے خواب باندھ کے شام وصال کے
اک دشت انتظار کو جادہ کیے ہوئے
(امجد اسلام امجد)

وصال

 

[عثمان رضا]

محبتوں میں ہر اِک لمحہ وصال کا ہوگا یہ طے ہوا تھا
بچھڑ کے بھی ایک دوسرے کا خیال ہوگا یہ طے ہوا تھا

طے

 

[شمشاد]

پیار کا پہلا خط لکھنے میں وقت تو لگتا ہے
نئے پرندوں کو اُڑنے میں وقت تو لگتاہے

جسم کی بات نہیں تھی ان کے دل تک جانا تھا
لمبی دوری طے کرنے میں وقت تو لگتا ہے


دور / دوری

 

[عثمان رضا]

لاکھ دوری ہو مگر عہد نبھاتے رہنا
جب بھی بارش ہو میرا سوگ مناتے رہنا
تم گئے ہو تو سر شام یہ عادت ٹھہری
بس کنارے پہ کھڑے ہاتھ ہلاتے رہنا

ہاتھ

 

[شمشاد]

دور گگن پر ہنسنے والے نرمل کومل چاند
بے کل من کہتا ہے آو، ہاتھ لگائیں تمہیں
(ظہور نظر)


چاند

 

[عثمان رضا]

فلک پہ چاند کے ہالے بھی سوگ کرتے ہیں
جو تو نہیں تو اُجالے بھی سوگ کرتے ہیں

سوگ

 

[شمشاد]

پتھر کی طرے تم نے مرا سوگ منایا
دامن نہ کبھی چاک کیا، بال نہ کھولے
(رام ریاض)


پتھر

 

[سید محمد نقوی]

کف دست ہنر ہے اور پتھر
دکان شیشہ گر ہے اور پتھر

غم ختم سفر ہے اور پتھر
پلٹ جانے کا ڈر ہے اور پتھر

محسن نقوی

ہنر

 

[شمشاد]

فرصت کسے ہے داد ہُنر جو کسی کو دے
جادو خود اپنے فن کا جگائے ہوئے ہیں لوگ
(جمیل عظیم آبادی)


جادو

 

[عثمان رضا]

کس سے ملوں اور کس سے بچھڑ وں اس جادو کے میلے میں
آنکھیں اور دل دونوں مل کر پڑ گئے عجب جھمیلے میں

عجب/عجیب

 

[راجہ صاحب]

عجیب ساعتِ انجام و اختلاف آئی
وہ میرے دل سے اٹھا اور اس کی راہ سے میں

خواجہ رضی حیدر


اختلاف

 

[عثمان رضا]

باہم کچھ اختلاف تک بھی رسائی ہو
کہ گلہائے رنگ رنگ سے آشنائی ہو
رنگ