رات، رتیاں، رین اور شب کے الفاظ پر مبنی اردو اشعار

[زیرک]

احباب سے گزارش ہے کہ اس دھاگے میں رات، رَتیاں، رَین اور شب کے الفاظ پر مبنی اردو اشعار بانٹیے، شکریہ

ایک بس تم ہی نہیں رات کے گھائل فرحت
خاک اڑتی ہے ہماری بھی اِدھر شام کے بعد
فرحت عباس شاہ​

 

[زیرک]

توسے پریت جو لاگی من موہے
توہے نام گزاروں رَین پیا​

 

[زیرک]

ساجن یہ مت جانیو توہے بچھڑت موہے چین
دیا جلت ہے رات میں اور جیا جلت دن رین
امیر خسرو​

 

[زیرک]

ان اجالوں کی دھن میں ‌پھرتا ہوں
چھب دکھاتے ہی جو گزر جائیں
رین اندھیری ہے اور کنارہ دور
چاند نکلے تو پار اتر جائیں
ناصر کاظمی​

 

[زیرک]

سکھی پیا کو جو میں نہ دیکھوں تو کیسے کاٹوں اندھیری رَتیاں
کسے پڑی ہے جو جا سناوے پیارے پی کو ہماری بتیاں​

 

[زیرک]

پہروں شبِ فراق میں تاروں کو دیکھ کر
شکلیں مِٹا مِٹا کے بنایا کریں گی آپ
جون ایلیا​

 

[زیرک]

ٹھٹھرتی ہوئی شبِ سیاہ اور وہ بھی طویل تر
محسن ہجر کے ماروں پہ قیامت ہے دسمبر​

 

[عبدالرحمن آزاد]

آنکھوں میں چبھ گئیں تری یادوں کی کرچیاں
کاندھوں پہ غم کی شال ہے اور چاند رات ہے

دل توڑ کے خموش نظاروں کا کیا ملا
شبنم کا یہ سوال ہے اور چاند رات ہے

کیمپس کی نہر پر ہے ترا ہاتھ ہاتھ میں
موسم بھی لا زوال ہے اور چاند رات ہے

ہر اک کلی نے اوڑھ لیا ماتمی لباس
ہر پھول پر ملال ہے اور چاند رات ہے

چھلکا سا پڑ رہا ہے وصیؔ وحشتوں کا رنگ
ہر چیز پہ زوال ہے اور چاند رات ہے
وصی شاہ

 

[عبدالرحمن آزاد]

شبِ مہتاب و شامِ زندگانی یاد آتی ہے
مجھے پھر آج اک بھولی کہانی یاد آتی ہے
کسی کا وہ مری خلوت میں‌شرماتے ہوئے آنا
تلاطم خیز رفتارِ جوانی یاد آتی ہے

 

[فہد اشرف]

رات تیری یادوں نے دل کو اس طرح چھیڑا
جیسے کوئی چٹکی لے نرم نرم گالوں
بشیر بدر

 

[محمد تابش صدیقی]

زندگی کی رات کتنی تھی کٹھن
رات بھر پہلو بدلتا ہی رہا
نظرؔ لکھنوی

 

[محمد تابش صدیقی]

اس رات کی سحر ہی نہیں ہم سے پوچھ لو
مارے ہوئے ہیں ہم بھی شبِ انتظار کے
نظرؔ لکھنوی

 

[محمد تابش صدیقی]

افسونِ شبِ تار سے مغلوب ہوا تُو
ہم چشمِ تصور سے سحر دیکھ رہے ہیں
نظرؔ لکھنوی

 

[محمد تابش صدیقی]

سینکڑوں سجدے بتوں کو روز و شب کرتا ہوں میں
بار ہے لیکن ادائے حقِ دوگانہ مجھے
نظرؔ لکھنوی

 

[محمد تابش صدیقی]

عرش والوں میں بڑی دھوم نظرؔ ہے اِمشب
کوئی مطلوب طلبگار تک آ پہنچا ہے
نظرؔ لکھنوی

 

[محمد تابش صدیقی]

بن ترے کوئی شب کہاں گزری
تو نہ آیا تو تیرے خواب آئے
نظرؔ لکھنوی

 

[فہد اشرف]

جب رات گئے کوئی کرن میرے برابر
چپ چاپ سی سو جائے تو لگتا ہے کہ تم ہو
جاں نثار اختر

 

[فہد اشرف]

غزل

چونک چونک اٹھتی ہے محلوں کی فضا رات گئے
(تھر تھرا اٹھتی ہے خاموش فضا رات گئے)
کون دیتا ہے یہ گلیوں میں صدا رات گئے

بھیگی بھیگی ہوئی موسم کی ہواؤں پہ نہ جا
ان پہ بر سے گی شرابوں کی گھٹا رات گئے

دن کے ہنگاموں میں کیا کوئی کسک ہو محسوس
دل کی ہر چوٹ کا چلتا ہے پتا رات گئے

یہ حقائق کی چٹانوں سے تراشی دنیا
اوڑھ لیتی ہے طلسموں کی ردا رات گئے

چبھ کے رہ جاتی ہے سینے میں بدن کی خوشبو
کھول دیتا ہے کوئی بند قبا رات گئے

آؤ ہم جسم کی شمعوں سے اجالا کر لیں
چاند نکلا بھی تو نکلے گا ذرا رات گئے

تو نہ اب آئے تو کیا آج تلک آتی ہے
سیڑھیوں سے ترے قدموں کی صدا رات گئے

(جاں نثار اختر)​

​

 

[زیرک]

ٹوٹے کبھی تو خوابِ شب و روز کا طلسم
اتنے ہجوم میں کوئی چہرہ نیا بھی ہو
احسن رضا احسن​

 

[زیرک]

وصل کی شب تھی اور اجالے کر رکھے تھے
جسم و جاں سب اس کے حوالے کر رکھے تھے
حیدر قریشی​