سیاست سے متعلق شاعری

[زیرک]

محمودوں کی صف آج ایازوں سے پرے ہے
جمہور سے سلطانیِ جمہور ڈرے ہے
امیر الاسلام ہاشمی​

 

[جاسمن]

جتنے حرام خور تھے قرب و جوار میں
پردھان بن کے آگئے اگلی قطار میں
عدم گونڈوی

 

[جاسمن]

جن کے چہرے پر لکھی ہے، جیل کی اونچی فصیل
رام نامی اوڑھ‌کرسنسد کے اندر آ گئے
عدم گونڈوی

 

[جاسمن]

سرحدوں پر بہت تناؤ ہے کیا؟
کچھ پتہ تو کرو چناؤ ہے کیا؟
راحت اندوری

 

[مومن فرحین]

قوم کے غم میں ڈنر کھاتے ہیں حکام کے ساتھ
رنج لیڈر کو بہت ہے مگر آرام کے ساتھ

اکبر الہ آبادی

 

[عطاء اللہ جیلانی]

کی محبت تو سیاست کا چلن چھوڑ دیا
ہم اگر عشق نہ کرتے تو حکومت کرتے

شاعر (نامعلوم)

 

[جاسمن]

کون اس دیس میں دے گا ہمیں انصاف کی بھیک
جس میں خونخوار درندوں کی شہنشاہی ہے

جس میں غلے کے نگہباں ہیں وہ گیدڑ جن سے
قحط و افلاس کے بھوتوں نے اماں چاہی ہے
(قتیل شفائی)

 

[اکمل زیدی]

ہر بلاول ہے دیس کا مقروض
پاؤں ننگے ہیں بے نظیروں کے

حبیب جالب

احمد بھائ شعر تو اپنی جگہ خوب ہے مگر یہ جالب صاحب کے زمانے میں بلاول کہاں سے آگیا۔۔۔
یا کہیں آپ نے استعاری طور پر استعمال کیا ہے۔۔۔اور مفہوم یہی ہے۔۔۔؟

 

[محمداحمد]

احمد بھائ شعر تو اپنی جگہ خوب ہے مگر یہ جالب صاحب کے زمانے میں بلاول کہاں سے آگیا۔۔۔
یا کہیں آپ نے استعاری طور پر استعمال کیا ہے۔۔۔اور مفہوم یہی ہے۔۔۔؟

جالب صاحب 1993 تک حیات رہے ہیں اور بلاول کی پیدائش 1988 کی ہے۔

سرگوشی

آپ کے سوال کی وجہ سے صبح صبح گوگل کو تکلیف دینی پڑی۔

یہاں جالب صاحب نے ان ناموں کو قوم کی خواتین اور بچوں کے لئے بطور استعارہ استعمال کیا ہے۔

 

[اکمل زیدی]

جالب صاحب 1993 تک حیات رہے ہیں اور بلاول کی پیدائش 1988 کی ہے۔

سرگوشی

آپ کے سوال کی وجہ سے صبح صبح گوگل کو تکلیف دینی پڑی۔

یہاں جالب صاحب نے ان ناموں کو قوم کی خواتین اور بچوں کے لئے بطور استعارہ استعمال کیا ہے۔

بہت شکریہ۔۔۔۔ایک اور چیز پوچھی تھی میں نے آپ سے۔۔۔۔۔۔۔۔۔

 

[سیما علی]

شریف زادوں سے دِلی کے مت ملا کر میر
کہ ہم غریب ہوئے ہیں اِن ہی کی دولت سے

جاسمن بٹیا کہ تو ہمارے شریف زادوں کےحسبِ حال ہے۔۔۔

 

[محمداحمد]

شریف زادوں سے دِلی کے مت ملا کر میر
کہ ہم غریب ہوئے ہیں اِن ہی کی دولت سے

دلی کا تو نہیں کہہ سکتے لیکن پاکستانی "شریف " زادے تو ایک عرصے سے لندن میں مقیم ہیں۔

 

[سیما علی]

حَسین آنکھوں،مُدھر گیتوں کے سُندر دیس کو کھو کر
میں حیراں ہوں وہ ذکرِوادئ کشمیر کرتے ہیں

حبیب جالب

 

[سیما علی]

سرِ منبر وہ خوابوں کے محل تعمیر کرتے ہیں
علاجِ غم نہیں کرتے فقط تقریر کرتے ہیں

حبیب جالب

 

[سیما علی]

حاکم رشوت ستاں فکر گرفتاری نہ کر
کر رہائی کی کوئی آسان صورت چھوٹ جا

میں بتاؤں تجھ کو تدبیر رہائی مجھ سے پوچھ
لے کے رشوت پھنس گیا ہے دے کے رشوت چھوٹ جا

دلاور فگار

 

[سیما علی]

اس خبر پر تو نہیں مجھ کو تعجب اے فگار
ایک غنڈہ حلقۂ بجنور میں پکڑا گیا

ہاں اگر تھوڑی سی حیرت ہے تو صرف اس بات پر
کیسا غنڈہ تھا کہ وہ اس دور میں پکڑا گیا

دلاور فگار

 

[محمداحمد]

سرِ منبر وہ خوابوں کے محل تعمیر کرتے ہیں
علاجِ غم نہیں کرتے فقط تقریر کرتے ہیں

اگر ممکن ہو تو شاعر کا نام بھی لکھ دیا کیجے۔

 

[سیما علی]

ہم چل دیئے وطن سے تو اپنا متاع و مال
سب کچھ نثار گردش ایام کر دیا

دل رہ گیا تھا ایک بت دلربا کے پاس
کسٹوڈین نے اس کو بھی نیلام کر دیا

دلاور فِگار

 

[سیما علی]

قوم اور ملک میں لازم تو نہیں یک رنگی
ایک جغرافیہ داں کا یہ خیال اچھا ہے

دور کیوں جاتے ہو خود اپنے وطن کو دیکھو
قوم کا حال برا، ملک کا حال اچھا ہے

دلاور فگار

 

[سیما علی]

گرانی، مفلسی، بے روزگاری، قحط، بیماری
یہ فتنے کیا ہماری موت کا کاشن نہیں دیتے

مگر یہ خوش بیاں لیڈر، یہ ناکارہ سیاست داں
فقط بھاشن دیئے جاتے ہیں اور راشن نہیں دیتے
دلاور فِگار