آپ شاید اس لیے بھی یہ کہہ رہے ہیں کیونکہ آپ ایک خاتون کو انٹرویو دے رہے ہیں مگر شاید آپ کو یہ معلوم نہیں کہ خاتون یہی جاننا چاہتی ہیں کہ انہیں کیا کیا نہیں کرنا ہے!
آپ کا مشاہدہ یقینا معاملے کا ایک بہت اہم رخ ہے اور اس کریہہ رخ پر مجھے افسوس ہی نہیں بلکہ بعض جگہوں پر حیرت بھی ہے کیونکہ خواتین مردوں سے زیادہ pure ہوتی ہیں، اتنی بڑی ارادی contamination کرنے کا سوچتی کیسے ہیں!
مزید یہ کہ فیصل آباد میں ادبی نشستیں کہاں ہوتی ہیں اور ان میں خواتین کے لیے مناسب ماحول ہے؟
فیصل آباد میں بہت سی مستقل ادبی نشستیں ہوتی ہیں جن میں ہر جمعے کو شام 7 بجے اور بعض اوقات یہ وقت بدل بھی جاتا ہے جیسے مغرب کے بعد حلقہ اربابِ ذوق کا اجلاس پریس کلب میں ہوتا ہے۔
ایک مستقل نشست اتوار کے روز حلقہ ارباِبِ قلم کے تحت ہوتی تھی اب اسے سردار آصف نے سنبھال لیا ہے ۔ یہ نشست آرٹس کونسل کی بیٹھک میں ہوتی ہے اور وقت عصرکے بعد کا ہے لیکن تجربے میں ہے کہ مغرب ہوہی جاتی ہے
اس کے علاوہ بزمِ منصور، تمثیل گر، انجم سلیمی حلقہ وغیرہ کی جانب سے آئے روز نشستوں کا اہتمام ہوتا رہتا ہے۔ مستقل نشستوں میں سے کچھ کا نام میں بھول رہا ہوں۔ جب میں ریڈیو پاکستان پر تھا تو ادبی پروگرام "دبستان" کی صورت میں بھی ایک نشست ہوتی تھی۔ یہ ریکارڈڈ پروگرام ہر جمعے کے روز شام 7 بجے ریڈیو پاکستان سے نشر ہوتا تھا ۔ اب بھی یقیناً ہوتا ہوگا۔ میں رمضان شریف میں بطور مہمان گیا تھا اور اس وقت تک وقت یہی شام 7 بجے کا تھا۔
