میر کے بہتر نشتر

[ابو ہاشم]

میر کے بہتر نشتر بہت مشہور ہیں۔ احباب سے ان کے تعین کی درخواست ہے

 

[نیرنگ خیال]

وہ بہتر نشتر خفیہ ہیں۔ افشائے راز پر سزا ہے۔

 

[ابو ہاشم]

چلو تعین نہ سہی۔ لیکن میر بہترین اشعار یہاں اشتراک تو کیے جا سکتے ہیں

 

[محمد تابش صدیقی]

محمد وارث
فاتح

 

[خالد محمود چوہدری]

کنفیوژ ۔۔۔۔۔۔۔۔۔ 72 نشتر اور بہترین اشعار

 

[محمد وارث]

یہ ایک myth ہی ہے۔ اور اگر کسی نے میر کے بہتر اشعار منتخب کرنے کی کوشش بھی کی ہوگی تو بہت سے لوگ اس سے متفق نہیں ہوئے ہونگے اور ظاہر ہے ہو بھی نہیں سکتے کہ طبائع مختلف ہیں۔ بہر حال میر کے پسندیدہ اور اچھے اشعار منتخب کرنے کی یہ کوشش خوب ہے، مجھے بھی میر کے بہت سے اشعار پسند ہیں، ایک لکھ دیتا ہوں:

دُور بیٹھا غبارِ میر اُس سے
عشق بِن یہ ادب نہیں آتا

 

[فہد اشرف]

میر کے بہت سے نشتر اب تحقیق کی بھینٹ چڑھ چکے ہیں کچھ دہائیاں قبل بہت سے قاتل اشعار جو میر کے ہوا کرتے تھے آج وہ کسی اور کے ہیں

 

[محمد تابش صدیقی]

یہ بہتر نشتر میر کی اپنی اصطلاح ہے یا کسی فین کی حرکت؟

 

[فاتح]

حسرت موہانی کے متعلق کہا جاتا ہے کہ انھوں نے میر کے بہترین 72 اشعار کا انتخاب کیا تھا اور یہ انتخاب اپنے رسالے اردوئے معلیٰ میں میر کے بہتر نشتر کے عنوان سے شائع کیا تھا۔
وہیں سے بہتر نشتر کی اصطلاح چل پڑی اور اب اگر اردوئے معلیٰ کا وہ شمارہ کسی طرح مل سکے تبھی یہ بتایا جا سکتا ہے کہ حسرت نے میر کے کون سے 72 اشعار منتخب کیے تھے۔

فضلی سنز نے سن 2000 میں میر تقی میر كے پانچ اہم انتخابات كا مجموعہ "انتخابِ میر" کے نام سے شائع کیا تھا۔ اس مجموعے میں ایک انتخاب حسرت موہانی کا بھی شامل ہے لیکن دیباچے میں درج ہے کہ یہ "انتخابِ دیوانِ میر از حسرت موہانی 1928" کے نام سے شائع ہونے والا انتخاب ہے اور میرے خیال میں وہ 72 اشعار حسرت نے اس انتخاب سے پہلے منتخب کر کے اردوئے معلیٰ میں چھاپے ہوں گے۔ یعنی حسرت نے 1928 میں اس تفصیلی انتخاب کے سینکڑوں اشعار میں وہ 72 بھی شامل تو کیے ہوں گے لیکن یہ نہیں جانا جا سکتا کہ کون سے 72 وہ اشعار ہیں جنھیں حسرت نے میر کے بہتر نشتر میں منتخب کیا تھا۔

 

[فاتح]

یہ بہتر نشتر میر کی اپنی اصطلاح ہے یا کسی فین کی حرکت؟

میر کے fanboy حسرت کی حرکت۔

 

[سید عاطف علی]

میر کے بہت سے نشتر اب تحقیق کی بھینٹ چڑھ چکے ہیں کچھ دہائیاں قبل بہت سے قاتل اشعار جو میر کے ہوا کرتے تھے آج وہ کسی اور کے ہیں

لگتا ہے میر کو اس کا پہلے ہی ادراک تھا ، سو اس پر بھی اشعار فرماکر گئے ہیں ۔
زنداں میں بھی شورش نہ گئی اپنے جنوں کی
اب سنگ مداوا ہے اس آشفتہ سری کا۔

 

[محمد ریحان قریشی]

ابتدا ہی میں مر گئے سب یار
عشق کی کون انتہا لایا

اب تو جاتے ہیں بت کدے سے میر
پھر ملیں گے اگر خدا لایا

 

[فاتح]

تیرا رخِ مخطط قرآن ہے ہمارا
بوسہ بھی لیں تو کیا ہے ایمان ہے ہمارا

 

[فہد اشرف]

میر کے fanboy حسرت کی حرکت۔

حسرت تو غالب کے بھی بہت بڑے فین تھے

 

[سید عاطف علی]

تیرا رخِ مخطط قرآن ہے ہمارا
بوسہ بھی لیں تو کیا ہے ایمان ہے ہمارا

لگتا ہے سب سے زیادہ کاری نشتر یہی ہے ۔

 

[فاتح]

لگتا ہے سب سے زیادہ کاری نشتر یہی ہے ۔

شعر کی خوبی تو شعریت اور صنائع بدائع میں ہی ہے اور اس شعر میں آپ ان سب کو بخوبی محسوس کر سکتے ہیں۔
مخطط کو خط (فانٹ) کی رعایت سے اور قرآن کا بوسہ لینا ایمان ۔ مجھے تو بے حد پسند ہے یہ شعر

 

[فرقان احمد]

سرسری تم جہان سے گزرے!
ورنہ ہر جا ۔۔۔۔ جہانِ دیگر تھا!

 

[سید عاطف علی]

شعر کی خوبی تو شعریت اور صنائع بدائع میں ہی ہے اور اس شعر میں آپ ان سب کو بخوبی محسوس کر سکتے ہیں۔
مخطط کو خط (فانٹ) کی رعایت سے اور قرآن کا بوسہ لینا ایمان ۔ مجھے تو بے حد پسند ہے یہ شعر

بیشک، تمام چیزیں نفس مضمون کے ساتھ مضمون و متحد ہوگئیں جبھی تو نشتر ایسا کاری ہوا۔۔۔ ہائے

 

[فرقان احمد]

اگر مطالعاتِ میر پر ایک نظر ڈالی جائے توبہت ساری کجرویاں نشان زد کی جا سکتی ہیں۔ جس کی ابتدا محمد حُسین آزاد سے ہوتی ہے۔ اُنھوں نے نہ جانے کسی عالمِ وجد میں میر کے بہتر نشتر کا فقرہ کہہ دیا، اور پوری اردو بیت العلمی بجائے اُن نشتروں کو تلاش کرنے اور اُس کے مخرج کا پتہ لگانے کے، آزاد کے اس فقرے پر دھڑا دھڑایمان لاتی چلی گئی۔ میر کے بارے میں یہ بات ہم سب جانتے ہیں کہ اُنھوں نے تین منثور کتابیں بھی لکھی ہیں۔ اُنھیں کتابوں میں ایک اُن کی خود نوشت “ذکرِ میر “بھی ہے۔ لیکن اس کتاب میں میر نے اپنے کسی بھی ایسے بہتر شعر کا ذکر نہیں کیا ہے جو بقول آزاد نشتر کی طرح ہیں۔

 

[محمد تابش صدیقی]

میر کا انتخاب کرنا مشکل کام ہے

نرا دھوکا ہی ہے دریائے ہستی
نہیں کچھ تہ سے تجھ کو آشنائی