پنجابی ٹپے

[یوسف سلطان]

کوئی نہروں پار میں آئی ودی ہاں
جس میرا ماہی لینڑاں
میں وچن آئی ودی ہاں
۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔ ۔۔۔۔۔۔۔۔۔۔۔ ۔۔۔۔۔۔۔۔۔۔۔ ۔۔۔۔۔۔۔۔
کوئی حقیاں دےنیچیے نیں
چگل جہاناں دی
کدی کسے ماہیے وی ویچےنیں
۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔
کوئی پاںڑیں پیتا ہائی
میں کیٹرا وچناں ہائی
جھٹ ہاسہ کیتاہائی

 

[یوسف سلطان]

آوندی کرئیے جاندی کڑئیے
چک لیا بازار وچوں گانی
نی۔ ماپے تینوں گھٹ رون گے
بوہتا رون گے دلاں دے، جانی۔

 

[یوسف سلطان]

کدی حال تے پوچھیا کر
دل دے تھوڑے اں
کجھ ویکھ کے روسیا کر

 

[یوسف سلطان]

تارے چمکن امبراں تے
ربّ اے گواہ
ساڈا ایمان پیغمبراں تے

 

[یوسف سلطان]

جتھے راوی تے چنھاں وگدی
دنیا توں ودھ سوہنی
سانوں دھرتی ماں لگدی

 

[یوسف سلطان]

پُھل کوئی نہ گلاب ارگا
دیس بتھیرے جگ تے
کوئی نہ میرے ''پنجاب'' ارگا

 

[یوسف سلطان]

یار نہیں مُل مِل دے
پھٹ جدائیاں دے
چھیتی کیتے نہیں سِل دے

 

[یوسف سلطان]

گیلی چر دی آرے تے
اسیں وچکار ڈب گئے
لوکی ہسن کنارے تے

 

[یوسف سلطان]

ترساں ملاقاتاں نوں
اک پل سون نہ ہووے
پچھلے پہر راتاں نوں

 

[یوسف سلطان]

مڑدا نہیں پل کُھسیا
لگے رس گئی خدائی ساری
میتھوں یار میرا رُسیا

 

[یوسف سلطان]

پانی کھوہے اتوں بھرنے آں
شالا جیویں سے برساں
ایہو دعا کرنے آں

 

[یوسف سلطان]

جاء نہ کوئی بولن دی
لک کے پڑھاں گے راتیں
چٹھی اپنے ڈھولن دی

 

[یوسف سلطان]

ساوی کنک تے نہیں وڈھنی
جند جاندی پئی جائے
گل اپنی نہیں چھڈنی

 

[یوسف سلطان]

سونے دے بھاء چڑھ گئے
وینی پھڑ لئی اوس دھگانے
ساہواں نوں وی چاء چڑھ گئے

 

[یوسف سلطان]

کدی داغ نہ لہے انب دا
تیتھوں وکھ ہوواں یارا
ایہہ سوچ کے روح کنب دا

 

[یوسف سلطان]

گل کوڑی اے پر ہے سچ دی
چھتاں اُتے انٹینے
ویڑھے وچ بھکھ نچ دی

 

[یوسف سلطان]

بارھیں برسیں کھٹن گیا تے کھٹ کے لیایا آری
ساڈے سوہنے دیس دی
لگے دھرتی سہاگن ساری

 

[یوسف سلطان]

بارھیں برسیں کھٹن گیا تے کھٹ کے لیایا پونا
تیرے نال پیار ازلی
اسیں مر کے وکھ نہیں ہونا

 

[یوسف سلطان]

بارھیں برسیں کھٹن گیا تے کھٹ کے لیایا پونی
دوجی کوئی تیرے نال دی
ساری دنیا چ گھٹ ای ہونی

 

[یوسف سلطان]

بارھیں برسیں کھٹن گیا تے کھٹ کے لیایا چاندی
جوانی میرے سوہنے یار دی
اکھ بھر کے تکی نہیں جاندی