کتاب

[محمد عدنان اکبری نقیبی]

کاغذ میں دب کر مرگئے کیڑے کتاب کے
دیوانہ بے پڑھے لکھے مشہور ہو گیا
بشیر بدر

 

[محمد عدنان اکبری نقیبی]

کدھر سے برق چمکتی ہے دیکھیں اے واعظ
میں اپنا جام اٹھاتا ہوں تو کتاب اٹھا
جگر مرادآبادی

 

[عینی مروت]

اے مری گل زمیں تجھے چاہ تھی اک کتاب کی
اہل کتاب نے مگر کیا ترا حال کر دیا

پروین شاکر

 

[لاریب مرزا]

تک بندی: کتاب کی واپسی


آج کئی دن بعد اس نے
کتاب مجھے لوٹائی تھی
نیچی پلکوں بوجھل قدموں
سے وہ میرے پاس آئی تھی
یوں تو کوئی بات نہیں تھی
جانے کیوں وہ گھبرآئی تھی

گھر لا کر جب اس کو کھولا
عجب سی خوشبو بسی ہوئی تھی
ہر صفحے پر اسکے لمس کی
نرمی جیسے رچی ہوئی تھی
کیا اس نے چوما تھا اس کو
لبوں کی گرمی بسی ہوئی تھی

سرخ گلابوں کے کچھ پتے
کچھ ورقوں میں دبے ملے تھے
نازک نازک ننھے ننھے
شاید پورے نہیں کھلے تھے
رنگ اور خوش بو تو باقی تھے
لیکن پتے سوکھ چلے تھے

پینسل کی کچھ مٹی مٹی سی
کچھ گوشوں میں تحریریں تھیں
کچھ پنوں پر پھول بنے تھے
کہیں کہیں پر تصویریں تھیں
طرح طرح کے نقش میں پنہاں
میرے نام کی تحریریں تھیں

ایک ورق پہ کچھ دھبے تھے
گولائی میں شکن پڑے تھے
کیا ہو سکتے تھے وہ آخر
شاید کچھ قطرے ٹپکے تھے
آخر ان قطروں میں کیا تھا
شاید کچھ نازک جذبے تھے

پاگل لڑکی تم نے مجھ کو
کیسے یہ پیغام دیے ہیں
میں بیچارہ خزاں رسیدہ
کب میں نے یہ کام کیے ہیں
کیسے تم کو اپناؤں میں
راہ میں میرے بجھے دیے ہیں

میری راہیں بہت کٹھن ہیں
اپنے نازک قدم نہ ڈالو
مت میرے ہمراہ چلو تم
اپنا گھروندا الگ بنا لو
تھوڑا خود کو اور رلا لو
اپنے ان جذبوں کو سلا لو


سعود عالم ابن سعید

 

[سلمان اشہدی]

ابھی میرے لئے اردو محفل فورم لکھنؤ کی بھول بھلیاں سے کم نہیں ہے اس فورم پہ کہیں مجھے تبصرہ کا آپشن مل رہا ہے کہیں نہیں یہ کیا لوجک ہے ؟ ماہرین حضرات برائے مہربانی رہنمائی کریں

 

[سلمان اشہدی]

اس لڑی میں خارجی تبصرہ کرنے کے لیے دست بستہ معذرت چاہوں گا

 

[لاریب مرزا]

ابھی میرے لئے اردو محفل فورم لکھنؤ کی بھول بھلیاں سے کم نہیں ہے اس فورم پہ کہیں مجھے تبصرہ کا آپشن مل رہا ہے کہیں نہیں یہ کیا لوجک ہے ؟ ماہرین حضرات برائے مہربانی رہنمائی کریں

اردو محفل میں خوش آمدید جناب!! شروع میں یہ محفل آپ کو بھول بھلیاں ہی لگے گی۔ کچھ ہی دن میں آپ کو اردو محفل کا تمام نقشہ ازبر ہو جائے گا۔
ابھی آپ تعارف کے زمرے میں جا کر اپنے تعارف کی لڑی شروع کریں۔ آہستہ آہستہ محفل اور محفلین کو سمجھنے لگیں گے۔ تعارف کے زمرے کا ربط یہ رہا۔
تعارف و انٹرویو

 

[جاسمن]

ہمارا علم تو مرہون لوحِ دل ہے میاں
کتابِ عقل تو بس طاق پہ دھری ہوئی ہے
عرفان ستار

 

[محمد عدنان اکبری نقیبی]

مضمون سوجھتے ہیں ہزاروں نئے نئے
قاصد یہ خط نہیں مرے غم کی کتاب ہے
نظام رامپوری

 

[محمد تابش صدیقی]

کسی نے فیض اٹھایا ہے زندگی سے مری
کتابِ زیست کا موڑا ہوا وَرَق ہوں میں
تابش

 

[سید شہزاد ناصر]

کاغذ کی یہ مہک ' یہ نشہ روٹھنے کو ہے
یہ آخری صدی ہے کتابوں سے عشق کی

 

[الشفاء]

وہ عجب گھڑی تھی کہ جس گھڑی لیا درس نسخۂ عشق کا
کہ کتاب عقل کی طاق پر جو دھری تھی سو وہ دھری رہی۔
سراج اورنگ آبادی۔

 

[الشفاء]

کتاب عشق حقیقی کی لغتیں ہیں الگ
نہ مے وہ مے ہے نہ دراصل جام ہوتے ہیں
بھرا کچھ اور ہی ہوتا ہے ان پیالوں میں
چھپا کے رکھنے کو اوپر یہ نام ہوتے ہیں۔
الشفاء۔

 

[ہادیہ]

نفرتوں کے شہر میں کتاب کوئی ایسی ہو
جو سبق پڑ ھا سکے ہر کسی کو پیار کا!!!

 

[جاسمن]

عقیدت اور شے ہے اور ہیں پنے کتابوں کے
عقیدت میں کبھی تاریخ شامل ہو نہیں سکتی
اسد مفتی

 

[خالد محمود چوہدری]

کتاب دل کا کوئی بھی ورق سادہ نہیں ہوتا
نگاہ اسکو بھی پڑھ لیتی ہے جو لکھا نہیں ہوتا ،

 

[خالد محمود چوہدری]

میری زندگی کی کتاب کا، ہے ورق ورق یوں سجا ہوا
سرِ ابتدا سرِ انتہا، تیرا نام دل پہ لکھا ہو

 

[خالد محمود چوہدری]

کتاب دل کے ورق جو الٹ کے دیکھتا ہے
وہ کائنات کو اوروں کو ہٹ کے دیکھتا ہے

 

[جاسمن]

ہم نشینی اگر کتاب سے ہو
اس سے بہتر کوئی رفیق نہیں

 

[عبید انصاری]

کتاب فطرت کے ہر ورق پر جو نام احمد رقم نہ ہوتا
یہ نقش ہستی ابھر نہ سکتا وجود لوح وقلم نہ ہوتا

صلی اللہ علیہ وسلم