آپ کے پسندیدہ اشعار!

[طارق شاہ]

جمود
اخترالایمان

تم سے بے رنگیِ ہستی کا گِلہ کرنا تھا

دل پہ انْبار ہے خُوں گشتہ تمنّاؤں کا
آج ٹوُٹے ہُوئے تاروں کا خیال آتا ہے
ایک میلہ ہے پریشان سی اُمّیدوں کا
چند پژمُردہ بہاروں کا خیال آتا ہے
پاؤں تھک تھک کے رہے جاتے ہیں مایُوسی میں
پُر محن راہ گُزاروں کا خیال آتا ہے

ساقی و بادہ نہیں، جام و لبِ جُو، بھی نہیں
تم سے کہنا تھا کہ اب آنکھ میں آنسو بھی نہیں !

اخترالایمان

 

[صائمہ شاہ]

یہ شہر سجدہ گذاراں ، دیار کم نظراں
یتیم خانہء ادراک کے سوا کیا ہے

حمایت علی شاعر

 

[کاشفی]

وہ یہاں آتے ہیں کس انداز سے
اک قدم اُٹھتا ہے سو سو ناز سے
(میر مہدی مجروح)

 

[کاشفی]

دیر میں سمجھے مسلمان تو حرم میں کافر
ہم ان افعال سے دونوں ہی جگہ خوار رہے
(میر مہدی مجروح)

 

[کاشفی]

محمدﷺ نور ذاتِ کبریا ہے
خدا سے کم ہے اور سب سے سوا ہے

بجز احمدﷺ یہ کس کا مرتبا ہے
کہ ہر اک پیشوا کا پیشوا ہے
(میر مہدی مجروح)

 

[طارق شاہ]

حال کُھلتا نہیں جبینوں سے
رنج اُٹھائے ہیں کِن قرِینوں سے

آشنا آشنا پیام آئے !
اجنبی اجنبی زمِینوں سے

رات آہستہ گام اُتری ہے
درد کے ماہتاب زِینوں سے

تُو نے مِژگاں اُٹھا کے دیکھا بھی !
شہر خالی نہ تھا مکِینوں سے

ادا جعفری

 

[طارق شاہ]

اِنکار میں اِقرار کی بات آ ہی گئی ہے
باتوں میں غمِ یار کی بات آ ہی گئی ہے

آیا ہے کبھی ذکر اگر دار و رسن کا
گیسو و قدِ یار کی بات آ ہی گئی ہے

جب سُرخئ گُلشن کا کبھی ذِکر ہُوا ہے
تیرے لب و رُخسار کی بات آ ہی گئی ہے

ڈھونڈا ہے اگر، زخمِ تمنّا نے مداوا
اِک نرگِسِ بیمار کی بات آ ہی گئی ہے

مل بیٹھے ہیں زِنداں میں اگر شام کو احباب
تیرے در و دیوار کی بات آ ہی گئی ہے

چھیڑا ہے کوئی تلخ فسانہ جو کسی نے
شیرینئ گفتار کی بات آ ہی گئی ہے

مظہر امام

 

[طارق شاہ]

وفورِ شوق میں جب بھی کلام کرتے ہیں
تو حرف حرف کو حُسنِ تمام کرتے ہیں

چمن میں جب سے اُسے سیر کرتے دیکھ لِیا
اُسی ادا سے غزالاں خِرام کرتے ہیں

اب اُس کو یاد نہ ہوگا ہمارا چہرہ بھی
تمام شاعری ہم جس کے نام کرتے ہیں

منظور ہاشمی

 

[صائمہ شاہ]

لہجہ بنا کے بات کریں ان کے سامنے
ہم سے تو اسطرح کا تماشہ کیا نہ جائے

جانثار اختر

 

[طارق شاہ]

بہت خَجَل ہے تِرے درد سے دُعا میری
یہ خوف ہے کہ، نہ سُن لے کہیں خُدا میری

ہُوئی ہے عِشق میں عِزّت پسِ فنا میری
کرامتیں ہیں جو مشہُور جا بجا میری

جِدھر کو اب وہ چَلا ہے، وہی ہے راہِ مُراد
رضائے یار سے، وابستہ ہے رضا میری

چُھپے وہ مجھ سے تو کیا یہ بھی اِک ادا نہ ہُوئی
وہ چاہتے تھے ، نہ دیکھے کوئی ادا میری

کہیں وہ آ کے مِٹا دیں نہ اِنتظار کا لُطف
کہیں قبُول نہ ہوجائے اِلتجا میری

نہ کیوں ہو عِشق میں دعوائے اِمتیاز مُجھے
کہ جورِ حُسن سے منسُوب ہے وفا میری

وہ بِگڑے بیٹھے ہیں اِس پر، کہ ہم کو کیوں چاہا
ہوئی تھی گر تو، یہ ثابت ہُوئی خطا میری

کبھی چُرا کے جو روزن سے بھی تُجھے دیکھوں
تو چور کی جو سزا ہو، وہی سزا میری

وصالِ یار کی منزِل قریب ہے، حسرت
ہُوئی ہے، آرزوئے شوق رہنما میری

حسرت موہانی

 

[طارق شاہ]

تکلیف یُوں اُٹھائی کہ سادہ تھے، اورکچھ
اندازدوستوں کے بھی سب مُخلِصانہ تھے

شفیق خلش

 

[طارق شاہ]

ڈرو نہ تم ، کہ نہ سُن لے کہِیں خُدا میری
کہ ، رُوشناسِ اجابت نہیں دُعا میری

فانی بدایونی

 

[طارق شاہ]

اب منہ بھی دِکھاؤ ، ہمیں اصرار نہ ہوتا
خود شوق کی تم آگ اگر تیز نہ کرتے

حسرت موہانی

 

[صائمہ شاہ]

میں نور بن کے زمانے میں پھیل جاؤں گا
تم آفتاب میں کیڑے نکالتے رہنا

راحت اندوری

 

[عبدالقیوم چوہدری]

خواہشیں اتنی خوبصورت تھیں
کوئی دل سے اِدھر اُدھر نہ ہوئی

عدم

 

[سید فصیح احمد]

دونوں جہان دے کے وہ سمجھے یہ خوش رہا
یاں آ پڑی یہ شرم کہ تکرار کیا کریں

غالب

 

[سید فصیح احمد]

زمانے والوں کے ڈر سے اٹھا نہ ہاتھ مگر
نظر سے اس نے بصد معذرت سلام کیا

خمار بارہ بنکوی

 

[سید فصیح احمد]

وفاؤں کے بدلے جفا کر رہے ہیں
میں کیا کر رہا ہوں، وہ کیا کر رہے ہیں

بتوں کے تصوّر میں محفل سجا کر
ہم اس طرح یادِ خُدا کر رہے ہیں

کبھی ہاتھ رکھتے ہیں سینہ پہ میرے
کبھی تیر دل سے جُدا کر رہے ہیں

نمازِ محبت کو بہزادِ مضطر
قضا کر چکے تھے، ادا کر رہے ہیں

بہزاد لکھنوی

 

[صائمہ شاہ]

ہم نے اپنے وجود کی چادر
تنگ اپنے گمان پر کی ہے

رسا چغتائی

 

[صائمہ شاہ]

عشق کارِ پیمبرانہ ہے
جس کو چھونا مثال کر رکھنا

رسا چغتائی