آپ کے پسندیدہ اشعار!

[سید فصیح احمد]

روندے کہ رو دے؟

معذرت بھائی جان ! کہ بروقت جواب نا دے سکا ، خیر عبد القیوم بھائی نے درست وضاحت تو کر ہی دی

 

[سید عاطف علی]

روندے ہے نقش پا کی طرح خلق یاں مجھے
اے عمر رفتہ ! چھوڑ گئی ، تو کہاں مجھے

 

[عظیم]

روندے ہے نقش پا کی طرح خلق یاں مجھے
اے عمر رفتہ ! چھوڑ گئی ، تو کہاں مجھے

لگتا نہیں ہے جی مرا اجڑے دیار میں
کس کی بنی ہے عالم ناپائیدار میں

 

[حسان خان]

جڑ سے کٹ جائے الٰہی اُس کا بھی نخلِ مراد
جس نے یوں برباد کر ڈالا گلستانِ وطن
(نصراللہ خان عزیز)

اے خدا بے تاب کر دے اُس تغافل کیش کو
بن ملے مجھ سے نہ پائے وہ سکونِ دل کی راہ
(نصراللہ خان عزیز)

مجھ سے خطا یہ ہو گئی بارگہِ جمال میں
آ گیا غیر کا خیال سلسلۂ خیال میں
(نصراللہ خان عزیز)

میرے غم و الم سے تُو خوب ہے باخبر مگر
پاتا ہوں میں سکونِ دل تجھ سے بیانِ حال میں
(نصراللہ خان عزیز)

ہو گئے فرسودہ و پامال سب پہلے ستم
اب نیا طرزِ جفا اے آسماں ایجاد کر
(نصراللہ خان عزیز)

 

[طارق شاہ]

ذکرِ بیداد بُتاں پیشِ خُدا کیا ہوگا
زندگی میں نہ ہُوا بعد فنا کیا ہوگا

حفیظ جالندھری

 

[طارق شاہ]

حاصلِ عشق ہے رُسوائی بھی، ناکامی بھی !
حاصلِ عمر نہ جانے ابھی کیا کیا ہوگا

حفیظ جالندھری

 

[طارق شاہ]

بہت شورِیدہ سر تھا میں، بہت محشر بداماں تھا
مِرا دست و گریباں بھی کبھی دست و گریباں تھا

وہ اِک پردہ، خِرد کے لب پہ جس کا نام داماں تھا
جنُوں کے ہاتھ میں تھا، اور گریباں ہی گریباں تھا

مجھے برہم سمجھ کے، ہجوِ مے کو پی گیا واعظ
وگرنہ آج میرا ہاتھ تھا ، اُس کا گریباں تھا

حفیظ احباب کے اِرشاد کی تعمیل کردی ہے
کہ حکمِ قافیہ پیمائیِ لفظِ گریباں تھا

حفیظ جالندھری

 

[طارق شاہ]

جس نے اِس دَور کے اِنسان کیے ہیں پیدا
وہی میرا بھی خُدا ہو، مجھے منظور نہیں

حفیظ جالندھری
(بالا شعر پر، ساحرلدھیانوی صاحب کے شعر کا گماں ہو اگر حفیظ جالندھری صاحب کا نام نہ لکھا ہو تو)

 

[طارق شاہ]

حُسن والے مِرے قاتل ہیں یہ دعویٰ ہے مِرا
حُسن والوں کو سزا ہو، مجھے منظور نہیں

حفیظ جالندھری ( ابوالاثر )

 

[طارق شاہ]

اے بتو ! تم پہ اندھا دھند مَرے خلقِ خُدا
اور خُدا دیکھ رہا ہو مجھے منظوُر نہیں

حفیظ جالندھری ( ابوالاثر )

 

[سید عاطف علی]

انتہائے لاغری سے جب نظر آیا نہ میں
ہنس کے وہ کہنے لگے بستر کو جھاڑا چاہیے
ناسخ۔

 

[عظیم]

یوں نہیں کی جائے گی یہ شاعری کم بخت کو
دل کلیجہ چاہئے گردہ ہمارا چاہئے

 

[طارق شاہ]

ہر ترنّم میں مِلی ہے تِری آواز مجھے
ایک ہی نغمہ سُناتا ہے ہر اِک ساز مجھے

عشق کا بھی کوئی انجام ہُوا کرتا ہے
عشق میں یاد ہے آغاز ہی آغاز مجھے

جیسے ویرانے سے ٹکرا کے پلٹتی ہے صدا
دل کے ہر گوشے سے آئی تِری آواز مجھے

جو کسی کو بھی نہ چاہے، اُسے چاہے رہنا
عمر بھر اپنی محبّت پہ رہا ناز مجھے

ضیا جالندھری

 

[کاشفی]

پیرِمغاں نے پہلو میں اپنے بٹھا لیا
مجروح مےپرست کا اعزاز دیکھنا
(مجروح رحمتہ اللہ علیہ)

 

[کاشفی]

یہ دل شایق ہے اُس کے روئے روشن کی زیارت کا
کہ جو ہے مہرِ انور بارہویں برج امامت کا
(مجروح رحمتہ اللہ علیہ)

 

[کاشفی]

محشر میں دیکھ جوشِ شفاعت حضور کا
طاعت بھی ڈھونڈتی ہے وسیلہ گناہ کا
(مجروح رحمتہ اللہ علیہ)

 

[عظیم]

اب یہاں وہ شعر بے معنی تها -

 

[کاشفی]

نبی ہوں مقتدی جن کے امام و پیشوا وہ ہیں
ہنسی ٹھٹھا سمجھ رکھا ہے کیا منصب امامت کا
(مجروح رحمتہ اللہ علیہ)

 

[کاشفی]

ہوا یہ لحمک لحمی سے ثابت
کہ حیدر جز و تن ہے مصطفیٰ کا
(مجروح رحمتہ اللہ علیہ)

 

[کاشفی]

بہ فرمانِ خدا وندِ دو عالم
علی ہے نفس ناطق مصطفیٰ کا
(مجروح دہلوی رحمتہ اللہ علیہ)