آپ کے پسندیدہ اشعار!

[فرقان احمد]

اب اُن سے دُور کا بھی واسطہ نہیں ناصر
وہ ہمنوا جو مِرے رتجگوں میں شامِل تھے!​

 

[فرقان احمد]

جاتے ہوئے کہتے ہو قیامت کو ملیں گے
کیا خوب! قیامت ہے گویا کوئی دن اور!

 

[فرقان احمد]

حیرت غرورِ حُسن سے شوخی سے اضطراب
دل نے بھی تیرے سیکھ لیے ہیں چلن تمام

دل خون ہو چکا ہے ، جگر ہو چکا ہے خاک
باقی ہوں میں مجھے بھی کر، اے تیغ زن تمام​

 

[فرقان احمد]

چلنے کا حوصلہ نہیں، رُکنا مُحال کردِیا
عِشق کے اِس سفر نے تو مُجھ کو نِڈھال کردِیا

مُمکنہ فیصلوں میں ایک ہجر کا فیصلہ بھی تھا
ہم نے تو ایک بات کی، اُس نے کمال کردِیا

چہرہ و نام ایک ساتھ ، آج نہ یاد آ سکے
وقت نے کِس شبیہ کو خواب و خیال کردیا

مُدّتوں بعد اُس نے آج، مجھ سے کوئی گِلہ کِیا
منصبِ دلبری پہ کیا ۔۔۔۔ مجھ کو بحال کردیا ​

 

[فرقان احمد]

بڑا عجیب یہ آوارگی کا رشتہ ہے
غبارِ راہ سہی، ہم سفر ہے، کیا کیجیے

 

[وقار..]

جنوں کے کیف و کم سے آگہی تجھ کو نہیں ناصح
گزرتی ہے جو دیوانوں پہ دیوانے سمجھتے ہیں

 

[وقار..]

رموز عشق و محبت سے میں نہیں واقف
رہی ہے اسکی ضرورت مجھے ہوا کی طرح

 

[اَبُو مدین]

دل سے دنیا ہے عزیز آج بھی انسانوں کو
بھینٹ رسموں کی چڑھا دیتے ہیں ارمانوں کو
نازؔ خیالوی

 

[سیف علی چیمہ]

کبابِ سیخ ہوں کروٹ ہر سُو بدلتا ہوں
جو جل اُٹھتا ہے یہ پہلو تو وہ پہلو بدلتا ہوں

 

[فرقان احمد]

آنکھوں کو انتظار کے لمحات سونپ کر
نیندیں بھی لے گیا کوئی اپنے سفر کے ساتھ

 

[فرقان احمد]

جب تِرا حُکم مِلا ، ترکِ محبّت کردی
احمد ندیم قاسمی

جب تِرا حُکم مِلا ، ترکِ محبّت کردی
دل مگر اِس پہ وہ دھڑکا، کہ قیامت کردی

تُجھ سے کِس طرح میں اِظہارِ تمنّا کرتا
لفظ سُوجھا، تو معانی نے بغاوت کردی

میں تو سمجھا تھا، کہ لوٹ آتے ہیں جانے والے
تُو نے تو جا کے ۔۔۔جُدائی مِری قسمت کردی

مُجھ کو دشمن کے اِرادوں پہ بھی پیارآتا ہے
تیری اُلفت نے محبّت مِری عادت کردی

پُوچھ بیٹھا ہُوں میں تُجھ سے، تِرے کُوچے کا پتہ
تیرے حالات نے کیسی تِری صُورت کردی

کیا ترا جسم تِرے حُسن کی حدّت میں جَلا
راکھ کِس نے تِری سونے کی سی رنگت کر دی​

​

 

[فرقان احمد]

روز مجھ کو فریب دیتا ہے
خیر! اُس کو یہ زیب دیتا ہے

 

[فرقان احمد]

اس کی امیدِ ناز کا ہم سے یہ مان تھا کہ آپ
عمر گزار دیجئے ۔۔۔۔۔۔۔ عمر گزار دی گئی

 

[فرقان احمد]

یہ بعد میں کھلے گا کہ کس کس کا خوں ہوا
ہر اک بیان ختم !!! عدالت تمام شُد!​

 

[فرقان احمد]

چراغ بجھتے چلے جا رہے ہیں سلسلہ وار
میں خود کو دیکھ رہا ہوں فسانہ ہوتے ہوئے​

 

[فرقان احمد]

پلٹ کے دیکھا تو کچھ بھی نہ تھا ہوا کے سوا
جو میرے ساتھ تھے جانے کدھر گئے چپ چاپ​

 

[فرقان احمد]

اور کیا چاہتی ہے گردشِ ایّام، کہ ہم
اپنا گھر بُھول گئے، اُن کی گلی بُھول گئے​

 

[ہادیہ]

بچھڑا کچھ اس ادا سے کہ رت ہی بدل گئی
اک شخص سارے شہر کو ویران کرگیا

 

[فرقان احمد]

یک نظر بیش نہیں فُرصتِ ہستی غافل !
گرمیِ بزم ہے اِک رقصِ شرر ہونے تک ​

 

[فرقان احمد]

دل سے ہر گزُری بات گزُری ہے
کِس قیامت کی، رات گزُری ہے

چاندنی، نیم وا دریچہ، سکوت!
آنکھوں آنکھوں میں رات گزُری ہے​