آپ کے پسندیدہ اشعار!

[طارق شاہ]

دل سے اپنے رہے خدشہ کا تجھے دیکھ کے پھر !
مُنحَرِف مجھ سے یہ بد ذات نہ ہو جائے کہیں

دُور رہتا ہوں، تو ڈرتا ہُوں، کہ اس دُوری سے
سرد یہ شورشِ جذبات نہ ہو جائے کہیں

لوٹ آؤں جو تِرے شہر، تو دھڑکا یہ رہے
پیار پھر شامل حالات نہ ہو جائے کہیں

شفیق خلش

 

[طارق شاہ]

ہمارا کیا ہے جو ہوتا ہے جی اُداس بہت
تو گل تراشتے ہیں، تِتلیاں بناتے ہیں

کسی طرح نہیں جاتی فسُردگی دِل کی
تو زرد رنگ کا اِک آسماں بناتے ہیں

احمد مشتاق

 

[طارق شاہ]

بلا کی دُھوپ تھی دن بھر تو سائے بُنتے تھے
اندھیری رات ہے، چنگاریاں بناتے ہیں

احمد مشتاق

 

[طارق شاہ]

مِری نمُود میں وحشت ہے میری سوچ میں شور
بہت الگ ہے مِری زندگی کا ڈھب تم سے

تمہارے نام کی تُہمت ہے میرے سر پہ نبیل
جُدا ہے ورنہ، مِرا شجرۂ نسب تم سے

عزیزنبیل

 

[طارق شاہ]

زندگی جیسی توقع تھی نہیں، کچھ کم ہے
ہر گھڑی ہوتا ہے احساس، کہیں کچھ کم ہے

آج بھی ہے تِری دُوری ہی اُداسی کا سبب
یہ الگ بات کہ پہلی سی نہیں کچھ کم ہے

شہریار

 

[طارق شاہ]

یہ جو دِیوانے سے دو چار نظر آتے ہیں
اِن میں کچُھ صاحبِ اسرار نظر آتے ہیں

تیری محفل کا بھرم رکھتے ہیں سو جاتے ہیں
ورنہ یہ لوگ تو بیدار نظر آتے ہیں

ساغر صدیقی

 

[طارق شاہ]

بے خبرشوق سے میرے نہیں وہ نُورِ نِگاہ
قاصدِ اشک شب و روز رواں ہے کہ جو تھا

لیلتہ القدر کنایہ نہ شبِ وصل سے ہو؟
اِس کا افسانہ میانِ رَمَضاں ہے کہ جو تھا

حیدرعلی آتش

 

[طارق شاہ]

روز کرتے ہیں شبِ ہجر کو بیداری میں !
اپنی آنکھوں میں سُبک، خوابِ گراں ہے کہ جو تھا

حیدرعلی آتش

 

[طارق شاہ]

جو کہے سُن کے مُدّعا مطلب
میرے مطلب سے اُس کو کیا مطلب

مِل گیا دِل، نکل گیا مطلب !
آپ کو اب کسی سے کیا مطلب

مولانا حسن رضا خان

 

[طارق شاہ]

کچُھ ہے مطلب تو دِل سے مطلب ہے
مطلبِ دِل سے اُن کو کیا مطلب

مولانا حسن رضا خان

 

[طارق شاہ]

ہم ہیں آوارہ سُو بسُو لوگو
جیسے جنگل میں رنگ و بُو لوگو

ساعتِ چند کے مُسافر سے
کوئی دم اور گفتگو لوگو

ابن انشا

 

[طارق شاہ]

شمع مغرور نہ ہو بزم فروزی پہ بہت
رات بھر کی یہ تجلّی ہے، سحر کچھ بھی نہیں

عالمتاب تشنہ

 

[معاویہ وقاص]

کیا یہی دھوپ کا مقدر ہے
چل دیے لوگ سائباں کی طرف

ساجد امجد

 

[معاویہ وقاص]

کسی جانب تو ہونا ہی پڑے گا
محبت درمیاں کا راستہ نہیں ہے

شاعر : نامعلوم

 

[معاویہ وقاص]

کوئی حد ہی نہیں ھے عاجزی کی
کئی دن سے مسلسل جھک رہا ھوں

یوسف مثالی

 

[معاویہ وقاص]

میرے جھوٹ کو کھولو بھی اور تولو بھی تم
لیکن اپنے سچ کو بھی میزان میں رکھنا

احمد فراز

 

[معاویہ وقاص]

تجھے یہ غم کہ مری زندگی کا کیا ہوگا
مجھے یہ ضد کہ مداوہ نہ کر سکے تو بھی
ناصر کاظمی

 

[معاویہ وقاص]

یاد میں تیری جہاں کو بھولتا جاتا ہوں میں
بھولنے والے، کبھی تجھ کو بھی یاد آتا ہوں میں
(آغا حشر)

 

[معاویہ وقاص]

کوئی کیوں کسی کا لبھائے دل ، کوئی کیا کسی سے لگائے دل
وہ جو بیچتے تھے دوائے دل ، وہ دکان اپنی بڑھا گئے

شاعر ”بہادر شاہ ظفر”

 

[معاویہ وقاص]

میں وہاں ہوں جہاں جہاں تم ہو
تم کرو گے کہاں کہاں سے گریز

(فراز)