آپ کے پسندیدہ اشعار!

[فہد اشرف]

پوچھو جو اُس نے حال تو پلکوں سے ٹوٹ کر
چھوٹا سا ایک اشک بڑا کام کرگیا
ظفر گورکھپوری

پوچھا

 

[عبد الرحمٰن]

ہم اپنے شہر میں ایسی دکان کھولیں گے
جہان پہ آ کے فقط بے زبان بولیں گے

ہر ایک شعر پہ گریہ کریں گے بیٹھ کے ہم
اسی بہانے پڑوسی بھی آ کے رولیں گے

مصور حیات

 

[سردار محمد نعیم]

صحرا کو بہت ناز ہے ویرانی پہ اپنی
واقف نہیں شاید مرے اجڑے ہوئے گھر سے
خمار بارہ بنکوی

 

[فہد اشرف]

آنکھوں سے انگلیوں سے لبوں سے خیال سے
جس جس بدن میں جو ہے سماں دیکھتے چلیں
خورشید الاسلام

 

[نازنین شاہ]

مر چکا ہے دل مگر زندہ ہوں میں
زہر جیسی کچھ دوائیں چاہییں
پوچھتی ہیں آپ، آپ اچھے تو ہیں
جی میں اچھا ہوں، دعائیں چاہییں

جون ایلیا

 

[نازنین شاہ]

شدت تشنگی میں بھی غیرت مے کشی رہی
اس نے جو پھیر لی نظر میں نے بھی جام رکھ دیا

احمد فراز

 

[فرقان احمد]

خواب ہا خواب جس کو چاہا تھا
رنگ ہا رنگ اسی کو بھول گیا

جون ایلیا

 

[فہد اشرف]

موتیوں کو چھپا سیپیوں کی طرح
بے وفاؤں کو اپنی وفائیں نہ دے
بشیر بدر

 

[فہد اشرف]

قدر مہر و مہ و انجم کی گئی گردش سے
شمع اچھی ہے کہ محفل میں پڑی رہتی ہے
راحیل فاروق

 

[فرقان احمد]

دیکھ کر جو ہمیں چپ چاپ گزر جاتا ہے
کبھی اس شخص کو ہم پیار کیا کرتے تھے

ناصر کاظمی

 

[کاشفی]

اپنے جلنے میں کسی کو نہیں کرتے ہیں شریک
رات ہو جائے تو ہم شمع بجھا دیتے ہیں
(صبا اکبرآبادی)

 

[کاشفی]

انگڑائی بھی وہ لینے نہ پائے اٹھا کے ہاتھ
دیکھا جو مجھ کو چھوڑ دئیے مسکرا کے ہاتھ
(نظام رامپوری)

 

[نازنین شاہ]

دل کی سہولتیں ہیں عجب مشکلیں عجب
نآشنائی سی عجب اک آشنا سے ہے

 

[کاشفی]

اے دوست میں خاموش کسی ڈر سے نہیں تھا
قائل ہی تری بات کا اندر سے نہیں تھا
(راجیندر منچندا ،بانی)

 

[کاشفی]

بات الٹی وہ سمجھتے ہیں جو کچھ کہتا ہوں
اب کی پوچھا تو یہ کہہ دوں گا کہ حال اچھا ہے
(جلیل مانک پوری)

 

[فرقان احمد]

عرضِ نیازعشق کے قابل نہیں رہا
جس دل پہ ناز تھا مجھے وہ دل نہیں رہا

اسد اللہ خاں غالب

 

[محمد عدنان اکبری نقیبی]

ہم نشیں ، خاموش دیواریں بھی سنتی ہیں یہاں
رات ڈھل جائے تو پھر چھیڑیں گے افسانہ کوئی

ناصر کاظمی

 

[فہد اشرف]

اس حسن کے سچے موتی کو ہم دیکھ سکیں پر چھو نہ سکیں
جسے دیکھ سکیں پر چھو نہ سکیں وہ دولت کیا وہ خزانا کیا
ابن انشا

 

[محمد عدنان اکبری نقیبی]

اب مُلاقات میں وہ گرمئی جذبات کہاں
اب تو رکھنے وہ محبّت کا بھرم آتے ہیں
ساغر صدیقی

 

[سردار محمد نعیم]

ہوئے مر کے ہم جو رسوا ہوئے کیوں نہ غرق دریا
نہ کبھی جنازہ اٹھتا نہ کہیں مزار ہوتا
مرزا اسداللہ خان غالب