آپ کے پسندیدہ اشعار!

[لاریب مرزا]

پرستش کی یاں تک کہ اے بُت تجھے
نظر میں سبھوں کی خدا کر چلے

(میر تقی میر)

 

[لاریب مرزا]

میں جو بولا، کہا کہ یہ آواز
اُسی خانہ خراب کی سی ہے

(میر تقی میر)

 

[لاریب مرزا]

خاک تک کوچۂ دلدار کی چھانی ہم نے
جستجو کی پہ دلِ گُمشدہ پایا نہ گیا

(میر تقی میر)

 

[لاریب مرزا]

باتیں ہماری یاد رہیں پھر باتیں ایسی نہ سُنیے گا
پڑھتے کسو کو سُنیے گا تو دیر تلک سر دھُنیے گا

(میر تقی میر)

 

[لاریب مرزا]

بھُولا جا ہے غمِ بُتاں میں جی
غرض آتا ہے پھر خدا ہی یاد

(میر تقی میر)

 

[La Alma]

جنوں فریبِ خرد ہے خرد فریبِ نظر
مجھے کہیں کا نہ رکھا مری تمنا نے

 

[لاریب مرزا]

توڑ کر عہد کرم نا آشنا ہو جائیے
بندہ پرور جائیے اچھا خفا ہو جائیے

(حسرت موہانی)

 

[لاریب مرزا]

گر نگاہِ شوق کو محو ِ تماشا دیکھئیے
قہر کی نظروں سے مصروف سزا ہو جائیے

 

[لاریب مرزا]

چاہتا ہے مجھ کو تو بھولے نہ بھولوں میں تجھے
تیرے اس طرز ِ تغافل کے فدا ہو جائیے

(حسرت موہانی)

 

[La Alma]

عمر بھر دوسروں کی فکر رہی
اپنا دامن رفو نہ کر پائے

 

[لاریب مرزا]

دل سی چیز کے گاہک ہوں گے دو یا ایک ہزار کے بیچ
انشاؔ جی کیا مال لیے بیٹھے ہو تم بازار کے بیچ

(ابن انشا)

 

[لاریب مرزا]

پینا پلانا عین گنہ ہے جی کا لگانا عین ہوس
آپ کی باتیں سب سچی ہیں لیکن بھری بہار کے بیچ

 

[لاریب مرزا]

خار و خس و خاشاک تو جانیں ایک تجھی کو خبر نہ ملے
اے گل خوبی ہم تو عبث بدنام ہوئے گلزار کے بیچ

(ابن انشا)

 

[فرقان احمد]

زلف برہم ہے، دل آشفتہ، صبا آوارہ!
خواب ہستی سا نہیں خواب پریشاں کوئی

چراغ حسن حسرت

 

[لاریب مرزا]

میں کہ رہتا ہوں بصد ناز گریزاں تجھ سے
تو نہ ہو گا تو بہت یاد کروں گا تجھ کو

(جون ایلیا)

 

[لاریب مرزا]

ہر چند بگولہ مضطر ہے، اک جوش تو اس کے اندر ہے
ایک وجد تو ہے، اک رقص تو ہے، بے چین سہی، برباد سہی

(اکبر الہ آبادی)

 

[لاریب مرزا]

غم سے اب ہوگی براہِ راست میری گفتگو
دوستو ! تیمار دارو ! غمگسارو!! تخلیہ

(رحمان فارس)

 

[Saqib mehmood]

وہ کیا چیز ہے آہ جس کے لیے
ہر اک چیز سے دل اُٹھا کر چلے

(میر تقی میر)

واہ واہ بہت خوب

 

[عظیم]

یہ سخت تر ہے کہ میں قتل ہی کروں خود کو
کسی خطا پہ مگر کیسے بخش دوں خود کو

(اعجاز عبید)

 

[لاریب مرزا]

آنکھوں میں رہا، دِل میں اُتر کر نہیں دیکھا
کشتی کے مُسافر نے سمندر نہیں دیکھا

(بشیر بدر)