آپ کے پسندیدہ اشعار!

[سیما علی]

ویرانگاں کو یاد کریں تازہ بستیاں…!!!
آئندگاں کے واسطے اک داستان چھوڑ

وہ یاد بے پناہ تعاقب میں آئی ہے…!!!
کتنا کہا تها تجھ سے، مت اپنا نشان چھوڑ

سعود عثمانی

 

[سیما علی]

اب تو ملبوس بدل، کاکلِ بے ربط سنوار
بجھ گئی شہر کی سب روشنیاں شامِ فراق

کتنی صدیوں کی تھکن اس نے سمیٹی محسن
یہ الگ بات کہ پھر بھی ہے جواں شامِ فراق

محسن نقوی

 

[سیما علی]

اپنی تخلیق پہ حیراں ہو کہ نازاں ہو، یہی
سوچتا رہ گیا پھر میرا خدا میرے بعد
یہ تو طے ہے کہ مری روح نہیں مر سکتی
کیسا پہنے گی بھلا جسم نیا میرے بعد

ثمینہ راجہ

 

[لاريب اخلاص]

کوئی رتبہ تو کوئی نام نسب پوچھتا ہے
اب جہاں میں کوئی کردار کا کب پوچھتا ہے
نتن نایاب

 

[لاريب اخلاص]

ایک دیوانہ مسافر ہے مری آنکھوں میں
وقت بے وقت ٹھہر جاتا ہے چل پڑتا ہے
راحت اندوری

 

[لاريب اخلاص]

دریاؤں کو حال سنا کر رقص کیا

صحراؤں کی خاک اڑا کر رقص کیا

قیس تمہاری سنت ایسے زندہ کی

ہاتھوں میں کشکول اٹھا کر رقص کیا

قیس مجھے اس بات پہ حیرت ہوتی ہے

تو نے کیسے دشت میں جا کر رقص کیا

ان لوگوں کی حالت دیکھنے والی تھی

جن لوگوں نے وجد میں آ کر رقص کیا

جب میری آواز نہ کانوں تک پہنچی

پھر میں نے تحریر میں آ کر رقص کیا

نیلی چھت پہ لا محدود پرندے تھے

آج کسی نے اشک بہا کر رقص کیا

بھید کھلا جس شخص پہ تیرے ہونے کا

اس نے تیرے قرب کو پا کر رقص کیا

ستحسنؔ میں جامیؔ ہوں منصورؔ نہیں

دلبر کو اشعار سنا کر رقص کیا
محمد مستحسن جامی

 

[لاريب اخلاص]

ہم ان کو سوچ میں گم دیکھ کر واپس چلے آئے
وہ اپنے دھیان میں بیٹھے ہوئے اچھے لگے ہم کو
احمد مشتاق

 

[لاريب اخلاص]

تو نے یہ کیا غضب کیا مجھ کو بھی فاش کر دیا
میں ہی تو ایک راز تھا سینۂ کائنات میں
علامہ اقبال

 

[گُلِ یاسمیں]

ٹوٹے ہوئے کواڑ کے منظر نے آ لیا
آوارگی کی شام مجھے گھر نے آ لیا
میں جا رہا تھا زخم کا تحفہ لیے بغیر
پھر یوں ہوا کہ راہ کے پتھر نے آ لیا

 

[سیما علی]

ہر اک مکاں کو ہے مکیں سے شرف اسد
مجنوں جو مر گیا ھے تو جنگل اداس ہے

 

[سیما علی]

مرنے کی گھڑی آئے تو میں زیست کا طالب
جینے کا تقاضا ہو تو مر جاتا ہوں اکثر
(واصف علی واصف)

 

[علی وقار]

بڑے عجیب سے لہجے میں بات کرتے ہو؟
ہیں چھوڑ جانے کی ساری نشانیاں تم میں!

فاخرہ بتول

 

[سیما علی]

نہ جانے کیا کہا تھا ڈوبنے والے نے سمندر سے
کہ لہریں آج تک ساحل پر اپنا سر پٹختی ہیں

 

[سیما علی]

سنت تو حسین پھول ہیں بدعات ہیں کانٹے
ہم کانٹوں کو پھولوں سے جدا کرتے رہیں گے۔

 

[سیما علی]

نہ ہو ممتاز کیوں اسلام دنیا بھر کے دینوں میں
ادھر مذہب کتابوں میں ، ادھر قرآن سینوں میں

 

[سیما علی]

توحید کے دیپ جلاتے تھے بدعت کی اندھیری محفل میں
کب خوف تھا ان کو قاتل کا خود شوق سے پہنچے مقتل میں

 

[سیما علی]

آپ کے بعد ہر گھڑی ہم نے
آپ کے ساتھ ہی گزاری ہے

 

[گُلِ یاسمیں]

سازشِ انتشار میں مصروف
ہے خزاں بھی بہار میں مصروف
ہم نے رکھا کئی طرح خود کو
فرصتِ انتظار میں مصروف

 

[شمشاد]

کیوں پریشان ہے تو اے مرے گم کردۂ راہ
راہ دشوار ہے لیکن مرے گھر تک آئے
خالد جمال

 

[سیما علی]

بیانِ ملاحت کیا چاہتا ہوں
سخن میں نمک کا مزا چاہتا ہوں

امداد علی بحر