عباس تابش انتخاب ِعباس تابش

[فلک شیر]

کیا ستم ہے کہ لگاتا ہوں ترے نام وہ شعر
جو کسی اور کے ہجراں میں کہا ہوتاہے

وحی ء بے لفظ سمجھ میں نہیں آنے والی
ورنہ طوفان کا چڑیوں کو پتہ ہوتا ہے
​

 

[فلک شیر]

میں آپ اپنا دیا بجھانے پہ تل گیا ہوں
یہاں سے میرے فرار کا وقت ہو گیا ہے

بگل کی آواز سن کے آنسو نکل پڑے ہیں
کہ پھر کسی شہریار کا وقت ہو گیا ہے​

 

[فلک شیر]

سبھی کو شوق اسیری ہے اپنی اپنی جگہ
وہ ہم کو اور ہم ان کا خیال باندھتے ہیں​

 

[فلک شیر]

ٹوٹی پڑی ہے موج بھی پتوار کی طرح
اُس پار کے بھی رنگ ہیں اِس پار کی طرح

سادہ بہت مگر کئی پرتیں لیے ہوئے
اس کا بدن ہے میر کےاشعار کی طرح​

 

[فلک شیر]

اس قیامت میں گھنے اظہار کی توفیق دے
ربِ سایہ حرفِ سایہ دار کی توفیق دے

دیکھ اب کتنے خدا میرے مقابل آ گئے
میں نہ کہتا تھا مجھے انکار کی توفیق دے

تیرے دل میں جو سخن ہے وہ مرے دل میں بھی تھا
اس کی مرضی ہے جسے اظہار کی توفیق دے​

 

[فلک شیر]

اداس شام، تھکے سائے، غالبِ خستہ
بڑے مزے سے ہوں اپنے معاصرین کے ساتھ​

 

[فلک شیر]

آدمی اب بھاگ کر جائے کہاں
شہر کے چاروں طرف بھی شہر ہے

مر گیا ہے چاند بھی چڑیوں کے ساتھ
جھیل کے پانی میں کتنا زہر ہے​

 

[فلک شیر]

یہ پرندے آیتِ ردِ بلاسے کم نہیں
ان کے ہونے سے ہمارا مستقر محفوظ ہے​

 

[فلک شیر]

سانس چڑھتے ہیں چٹخنی کی طرح
کیا بلا شہر میں اتر آئی

پہلے کچھ دن لگاکہ وہ میں ہوں
پھر نہ اس کی کوئی خبر آئی

​

 

[فلک شیر]

جب کہا دل نے کہ باہر کی طرف
کھنچ گیا میں اور اندر کی طرف

صبح دم اٹھا تھکن سے چور چور
خواب میں چلتا رہا گھر کی طرف

اس مکاں کا ایک دروازہ کتاب
اور اک کھڑکی سمندر کی طرف​

 

[فلک شیر]

ہوائیں پیغام دے گئی ہیں کہ مجھے دریا بلا رہا ہے
میں بات ساری سمجھ گیا ہوں مجھے دعاؤں میں یاد رکھنا

مجھے عزیزانِ من! محبت کا کوئی تجربہ نہیں ہے
میں اس سفر میں نیا نیا ہوں مجھے دعاؤں میں یاد رکھنا

مجھے کسی سے بھلائی کی اب کوئی توقع نہیں ہے تابش
میں عادتاََ سب سے کہہ رہا ہوں مجھے دعاؤں میں یاد رکھنا
​

 

[فلک شیر]

دشت میں پیاس بجھاتے ہوئے مرجاتے ہیں
ہم پرندے کہیں جاتے ہوئے مر جاتے ہیں

ہم ہیں سوکھے ہوئے تالاب پہ بیٹھے ہوئے ہنس
جو تعلق کو نبھاتے ہوئے مر جاتے ہیں

گھر پہنچتا ہے کوئی اور ہمارے جیسا
ہم ترے شہر سے جاتے ہوئے مر جاتے ہیں

کس طرح لوگ چلے جاتے ہیں اُٹھ کر چپ چاپ
ہم تو یہ دھیان میں لاتے ہوئے مر جاتے ہیں

ان کے بھی قتل کا الزام ہمارے سر ہے
جو ہمیں زہر پلاتے ہوئے مر جاتے ہیں

یہ محبت کی کہانی نہیں مرتی لیکن
لوگ کردار نبھاتے ہوئے مر جاتے ہیں

ہم ہیں وہ ٹوٹی ہوئی کشتیوں والے تابش
جو کناروں کو ملاتے ہوئے مر جاتے ہیں​

 

[فلک شیر]

یہ بھی ممکن ہے کوئی روکنے والا ہی نہ ہو
یہ بھی ممکن ہے یہاں مجھ کو زمانے لگ جائیں
دیکھ اے حسنِ فراواں یہ بہت ممکن ہے
میرا دل تک نہ لگے تیرے خزانے لگ جائیں​

 

[فلک شیر]

پھر اس کے بعد یہ بازارِ دل نہیں لگنا
خرید لیجیے صاحب! غلام آخری ہے​

 

[فلک شیر]

اب میری جان جاتی ہے مجنوں کے نام سے
پہلے پہل یہ لگتا تھا ایسا تو میں بھی ہوں​

 

[فلک شیر]

کشیدہ کارِ ازل تجھ کو اعتراض تو نئیں
کہیں کہیں سے اگر زندگی رفو کی جائے​

 

[فلک شیر]

دوست! سب سے کہاں کھنچتا ہے غزل کا چلہ
حجرہ میر میں ہوتا ہے سدا ایک ہی شخص​

 

[فلک شیر]

اے اپنے عشق کی باتیں سنانے والے شخص
اسی طرح کی کہانی ہمارے پاس بھی ہے

خفا ہوا بھی تو رسوا نہیں کرے گا تجھے
کہ زود رنج ترا مصلحت شناس بھی ہے

تجھے پسند بہت ہے گلاب کا کھلنا
اور اتفاق سے تو آئینے کے پاس بھی ہے
​

 

[فلک شیر]

تجھ کو اپنے آپ سے فرصت نہیں ہے اور یاں
اے نگاہِ یار میرا وقت گزرا جائے ہے
​

 

[فلک شیر]

کھینچ لاتی ہے ہمیں تیری محبت ورنہ
آخری بار کئی بار ملے ہیں تجھ سے​