بیت بازی سے لطف اٹھائیں (5)

[شمشاد خان]

یہ کیا عذاب ہے سب اپنے آپ میں گم ہیں
زباں ملی ہے مگر ہم زباں نہیں ملتا
(ندا فاضلی)

 

[مومن فرحین]

آشنا درد سے ہونا تھا کسی طور ہمیں
تو نہ ملتا تو کسی اور سے بچھڑے ہوتے

ناصر کاظمی

 

[شمشاد خان]

یکایک از دل دو چشم جادو بصد فریبم بہ برد تسکیں
کسے پڑی ہے جو جا سناوے پیارے پی کو ہماری بتیاں
(امیر خسرو)

 

[مومن فرحین]

ناصحا تجھ کو خبر کیا کہ محبت کیا ہے
روز آجاتا ہے سمجھاتا ہے یوں ہے یوں ہے

فراز

 

[شمشاد خان]

یہ آرزو تھی تجھے گل کے رو بہ رو کرتے
ہم اور بلبل بیتاب گفتگو کرتے
(حیدر علی آتش)

 

[مومن فرحین]

یہ کیا کہ تم بھی سر راہ حال پوچھتے ہو
کبھی ملو ہمیں بازار کے علاوہ بھی

فراز

 

[شمشاد خان]

یہ ادائے بے نیازی تجھے بے وفا مبارک
مگر ایسی بے رخی کیا کہ سلام تک نہ پہنچے
(شکیل بدایونی)

 

[مومن فرحین]

یہ پیام میرا کہنا تو صبا مؤدبانہ
کہ گزر گیا ہے پیارے تجھے دیکھے اک زمانہ

 

[شمشاد خان]

ہونے کو ہے طلوع، صباحِ شبِ وصال
بجھنے کو ہے چراغ شبستان آرزؤُ
(اختر شیرانی)

 

[مومن فرحین]

وہ اپنی خو نہ چھوڑیں گے ہم اپنی وضع کیوں بدلیں
سبک سر بن کے کیا پوچھیں کہ ہم سے سر گراں کیوں ہو

غالب جی ۔

 

[ریحان احمد ریحانؔ]

واہ کیا جود و کرم ہے شہِ بطحا تیرا
نہیں سنتا ہی نہیں مانگنے والا تیرا

 

[شمشاد خان]

اتنا مانوس ہوں فطرت سے کلی جب چٹکی
جھک کے میں نے یہ کہا مجھ سے کچھ ارشاد کیا
(جوش ملیح آبادی)

 

[ریحان احمد ریحانؔ]

آہ کو چاہیے اک عمر اثر ہونے تک
کون جیتا ہے تیری زلف کے سر ہونے تک

 

[شمشاد خان]

کبھی پا کے تجھ کو کھونا کبھی کھو کے تجھ کو پانا
یہ جنم جنم کا رشتہ ترے میرے درمیاں ہے
(بشیر بدر)

 

[مومن فرحین]

یوں تیری یاد کی مشعل ہے فروزاں دل میں
ذھن شاعر میں شگفتہ سی غزل ہو جیسے

 

[شمشاد خان]

یہ چراغ بے نظر ہے یہ ستارہ بے زباں ہے
ابھی تجھ سے ملتا جلتا کوئی دوسرا کہاں ہے
(بشیر بدر)

 

[مومن فرحین]

یوں تو اپنوں سا کچھ نہیں اس میں
پھر بھی غیروں سے وہ الگ سا ہے

 

[شمشاد خان]

یاد کے بے نشاں جزیروں سے
تیری آواز آ رہی ہے ابھی
(ناصر کاظمی)

 

[مومن فرحین]

یہ جانتی ہوں کہ دھوکہ ہے پر نہ جانے کیوں
ہر اک صدا تیری آہٹ ہی بن کے آتی ہے

 

[شمشاد خان]

یوں تو ہنگامے اٹھاتے نہیں دیوانۂ عشق
مگر اے دوست کچھ ایسوں کا ٹھکانا بھی نہیں
(فراق گھورکپوری)