بیت بازی کا کھیل!

[زھرا علوی]

"یہ روشنی تو مجھے اور کر گئی تنہا
دیے جلائے تو سائے بھی بام و در سے گئے"۔۔۔۔

 

[شمشاد]

یونہی گر روتا رہا غالب تو اے اہل جہاں
دیکھنا ان بستیوں کو تم کہ ویراں ہو گئیں
(چچا)

 

[زھرا علوی]

"نبھائی تھی نہ ہم نے جانے کس سے
کہ اب سب سے نبھائے جا رہے ہیں"۔۔۔۔۔

جون ایلییا

 

[شمشاد]

ناوک انداز جدھر دیدہ جاناں ہوں گے
نیم بسمل کئی ہوں گے کئی بے جاں ہوں گے
(مومن)

 

[زھرا علوی]

"یہ حادثہ سر ساحل رلا گیا سب کو
بھنور میں ڈوبنے والوں کے ہاتھ بھی نہ ہلے"۔۔۔

 

[شمشاد]

یارو مجھے معاف کرو میں نشے میں ہوں
اب تھوڑی دور ساتھ چلو میں نشے میں ہوں
(حسرت جے پوری)

 

[فرخ منظور]

نازکی اس کے لب کی کیا کہیے
پنکھڑی اک گلاب کی سی ہے
(میر)

 

[شمشاد]

یہ چاندنی بھی جن کو چھوتے ہوئے ڈرتی ہے
دنیا انہی پھولوں کو پیروں سے مسلتی ہے
(بشیر بدر)

 

[الف عین]

یاد تھیں ہم کو بھی رنگا رنگ بزم آرائیاں
وہ بھی اب تقش و نگارِ طاقِ نسیاں ہو گئیں
چچا

 

[شمشاد]

نہ میں آغاز ہوں اس کا نہ ہی انجام ہوں سرور
مری قسمت سے ظاہر ہے، مآل زندگی کیا ہے!
(سرور)

 

[محمد نعمان]

یاں اہل جنوں یک بہ دگر دست و گریباں
واں جیش ہوس تیغ بکف در پئے جاں ہے
( فیض )

 

[پیاسا صحرا]

ہے بسکہ ہر اک ان کے اشارے میں نشاں اور
کرتے ہیں مَحبّت تو گزرتا ہے گماں اور
چچا

محترم پہلے تو نادانی کی معافی چاہتا ہوں ۔ اور پھر جسارت کرتے ہوئے عرض ہے کہ پہلے مصرعہ میں "نشاں" ہے یا "نہاں" کیونکہ میری یاد داشت میں کچھ گڑبڑ سی ھو رہی ہے ۔

 

[شمشاد]

یہ راستہ تو ہے تنہائیوں کا اب لیکن
نہ جانے کون مرے ساتھ ساتھ چلتا ہے
(نزہت عباسی)

 

[شمشاد]

محترم پہلے تو نادانی کی معافی چاہتا ہوں ۔ اور پھر جسارت کرتے ہوئے عرض ہے کہ پہلے مصرعہ میں "نشاں" ہے یا "نہاں" کیونکہ میری یاد داشت میں کچھ گڑبڑ سی ھو رہی ہے ۔

یہ لیں جناب پوری غزل حاضر ہے :


ہے بس کہ ہر اک ان کے اشارے میں نشاں اور

کرتے ہیں مَحبّت تو گزرتا ہے گماں اور

یارب وہ نہ سمجھے ہیں نہ سمجھیں گے مری بات

دے اور دل ان کو، جو نہ دے مجھ کو زباں اور

ابرو سے ہے کیا اس نگہِ ناز کو پیوند

ہے تیر مقرّر مگر اس کی ہے کماں اور

تم شہر میں ہو تو ہمیں کیا غم، جب اٹھیں گے

لے آئیں گے بازار سے جا کر دل و جاں اور

ہر چند سُبُک دست ہوئے بت شکنی میں

ہم ہیں، تو ابھی راہ میں ہیں سنگِ گراں اور

ہے خوںِ جگر جوش میں دل کھول کے روتا

ہوتے جو کئی دیدۂ خو نبانہ فشاں اور

مرتا ہوں اس آواز پہ ہر چند سر اڑ جائے

جلاّد کو لیکن وہ کہے جائیں کہ ’ہاں اور‘

لوگوں کو ہے خورشیدِ جہاں تاب کا دھوکا

ہر روز دکھاتا ہوں میں اک داغِ نہاں اور

لیتا۔ نہ اگر دل تمھیں دیتا، کوئی دم چین

کرتا۔جو نہ مرتا، کوئی دن آہ و فغاں اور

پاتے نہیں جب راہ تو چڑھ جاتے ہیں نالے

رُکتی ہے مری طبع۔ تو ہوتی ہے رواں اور

ہیں اور بھی دنیا میں سخنور بہت اچھّے

کہتے ہیں کہ غالب کا ہے اندازِ بیاں اور

 

[فرحت کیانی]

رسوائی کا میلہ تھا سو میں نے نہیں دیکھا
اپنا ہی تماشا تھا سو میں نے نہیں دیکھا

پیرزادہ قاسم

 

[شمشاد]

اب تو حالات سے پتھرانے لگی ہیں آنکھیں
زندگی! اور کہاں تک ترا رستہ دیکھوں
(سید آلِ احمد)

 

[arifkarim]

نہ وہ تم بدلے نہ ہم طور ہمارے ہیں وہی
فاصلے بڑھ گئے پر کرب تو سارے ہیں وہی

 

[شمشاد]

یہ محرومی نہیں، پاسِ وفا ہے
کوئی تیرے سوا دیکھا نہ جائے
(فراز)

 

[عمر سیف]

یہ میری کتابِ حیات ہے، اسے دل کی آنکھ سے پڑھ ذرا
میں ورق ورق تیرے سامنے، تیرے روبرو تیرے پاس ہوں ۔۔۔

 

[شمشاد]

نہ جانے کون سا فقرہ کہاں رقم ہو جائے
دلوں کا حال بھی اب کون کس سے کہتا ہے
(پروین شاکر)