خدا

[شمشاد]

محبت ہے خدا جیسی ‘ خدائی اس میں شامل ہے
ستارہ مت کہو اِس کو ‘ محبت ماہِ کامل ہے
(فاخرہ بتول)

 

[محمد وارث]

وہ وقت آئے گا، چاہے آج آئے، چاہے کل آئے
جب انساں دشمنی، اپنے خدا سے دشمنی ہوگی

میں اپنے آپ کو سُلگا رہا ہوں اس توقّع پر
کبھی تو آگ بھڑکے گی، کبھی تو روشنی ہوگی

(احمد ندیم قاسمی)

 

[شمشاد]

آنکھوں میں خواب ہونٹوں پہ لے کر دعا کے پھول
اپنے خدا سے کوئی مجھے مانگتا بھی ہو
(شبنم رحمٰن)

 

[محمد وارث]

گرفتہ دل ہیں بہت آج تیرے دیوانے
خدا کرے کوئی تیرے سوا نہ پہچانے

ہزار شکر کہ ہم نے زباں سے کچھ نہ کہا
یہ اور بات کہ پوچھا نہ اہلِ دنیا نے

(ناصر کاظمی)

 

[شمشاد]

مِلاتا ہے یہ لَے اُس کے نفَس کے زیر و بم سے
خدارا دل کی میرے طرزِ گویائی تو دیکھو
(ناہید ورک)

 

[نوید صادق]

تو مرا کیسا خدا ہے، مری لغزش تو بتا
زندگی بھر جو بلندی سے گرایا ہے مجھے

شاعر: سید آلِ احمد

 

[شمشاد]

وہی دن ہیں وہی راتیں، وہی نشتر بھری باتیں
خدارا یہ بتاؤ کب تلک ایسے بسر ہو گی؟
(ناہید ورک)

 

[نوید صادق]

کیا وہ نمرود کی خدائی تھی
بندگی میں مرا بھلا نہ ہوا

شاعر: غالب

 

[شمشاد]

منتظر ہوں کب سے تیرے فیصلے کی ہم سفر
اب بتا بھی دے خدارا کیا مری تقدیر ہے!
(ناہید ورک)

 

[عمر سیف]

الفت میں برابر ہے وفا ہو کہ جفا ہو
ہر چیز میں لذّت ہے اگر دل میں خدا ہو

 

[شمشاد]

عشق کی جلوہ گری کے واسطے کم ہے یہ دہر
اک جہانِ تازہ کیا ساری خدائی دیکھیئے
(ناہید ورک)

 

[عمر سیف]

خدا وہ دن نہ دکھائے کہ رہبر یہ کہے
چلے تھے جانے کہاں سے کہاں نکل آئے

 

[شمشاد]

خدا سے اُسے مانگنے میں لگی تو
دعاؤں کا اپنی اثر یاد آیا
(ناہید ورک)

 

[محمد وارث]

اس لیے صرف خدا سے ہے تخاطب میرا
میرے جذبات کو سمجھے گا فرشتہ کیسے

(احمد ندیم قاسمی)

 

[شمشاد]

مجھے صليب پہ ٹانکو ہزار بار مگر
خدا گواہ ہے میں کچھ گناہ گار نہیں
(آسیہ ہاشمی)

 

[محمد وارث]

آج وہ کشمیر ہے محکوم و مجبور و فقیر
کل جسے اہل نظر کہتے تھے ایران صغیر

سینۂ افلاک سے اٹھتی ہے آہ سوز ناک
مرد حق ہوتا ہے جب مرعوب سلطان و امیر

کہہ رہا ہے داستاں بیدردی ایام کی
کوہ کے دامن میں وہ غم خانۂ دہقان پیر

آہ، یہ قوم نجیب و چرب دست و تر دماغ
ہے کہاں روز مکافات اے خدائے دیر گیر؟

(اقبال)

 

[شمشاد]

خدا کی سر زمیں پر کچھ نہ کچھ تو مل ہی جانا تھا
کوئی بھوکا پرندہ آب و دانہ ڈھونڈ ہی لیتا
(اعتبار ساجد)

 

[عمر سیف]

وہی زندگی ہے وہی بندگی ہے
کٹے جو خدا کی رضا کرتے کرتے

 

[شمشاد]

ترا ہی نام ہے جو بس گیا ہے سانسوں میں
کسی کو تیرے سِوا اور کیا خدا کرتے
(ناہید ورک)

 

[محمد وارث]

پھر وہ سوئے چمن آتا ہے خدا خیر کرے
رنگ اڑتا ہے گلستاں کے ہوا داروں کا

(غالب)