فارسی شاعری خوبصورت فارسی اشعار مع اردو ترجمہ

[حسان خان]

حسان خان بھائی ”شرابِ پر حال“ کی ترکیب سمجھ میں نہیں آ رہی کچھ اور روشنی ڈالیں اس پہ۔
شکریہ

«پُرحال» شاید یہاں پُرکَیف و پُرنِشاط کے معنی میں استعمال ہوا ہے۔

 

[حسان خان]

حمدیہ بیت:
فاتحهٔ فِکرت و ختمِ سُخُن
نام خُدایست بر او ختم کُن
(نظامی گنجوی)
فِکر کی ابتدا اور سُخن کا اختتام خُدا کا نام ہے، [لہٰذا] اُس پر ختم کرو۔

 

[حسان خان]

«نِظامی گنجوی» نے اپنی مثنوی «مخزن الاسرار» کا آغاز اِس بیت سے کیا ہے:
بسم الله الرّحمٰن الرّحیم
هست کلیدِ درِ گنجِ حکیم
(نظامی گنجوی)
«بسم الله الرّحمٰن الرّحیم» [خُدائے] حکیم کے خزانے کے در کی کلید ہے۔

× بیت کے مصرعِ اوّل کا وزن «مفعولن مفعولن فاعلن» اور مصرعِ ثانی کا وزن «مفتعلن مفتعلن فاعلن» ہے۔ کسی بیت کے مصرعوں میں اِن دو اوزان کا باہم آنا جائز ہے۔

 

[حسان خان]

«امیر خُسرَو دهلوی» نے اپنی مثنوی «مطلع الانوار» کا آغاز اِس بیت سے کیا ہے:
بسم الله الرّحمٰن الرّحیم
خُطبهٔ قُدس است به مُلکِ قدیم
(امیر خسرو دهلوی)
«بسم الله الرّحمٰن الرّحیم» مُلکِ قدیم و ازل میں خُطبۂ قُدْس ہے۔

 

[حسان خان]

«عُرفی شیرازی» نے اپنی مثنوی «مجمع الابکار» کا آغاز اِس بیت سے کیا ہے:
بسم الله الرّحمٰن الرّحیم
موجِ نخُست است ز بحرِ قدیم
(عُرفی شیرازی)
«بسم الله الرّحمٰن الرّحیم» بحرِ قدیم و ازل کی مَوجِ اوّل ہے۔

 

[حسان خان]

آمدِ بہار کے موقع پر کہی گئی ایک بیت:
آمد بهارِ خُرّم با رنگ و بُویِ طِیب
با صد هزار نُزهت و آرایشِ عجیب
(رودکی سمرقندی)
رنگ و بُوئے خُوب کے ساتھ، اور صد ہزار خوشحالی اور عجیب و نادر آرائش کے ساتھ بہارِ سرسبز و باطراوت آ گئی۔

 

[حسان خان]

«عبدالرحمٰن جامی» نے اپنی مثنوی «تُحفة الاحرار» کا آغاز اِس بیت سے کیا ہے:
بسم الله الرّحمٰن الرّحیم
هست صلایِ سرِ خوانِ کریم
(عبدالرحمٰن جامی)
«بسم الله الرّحمٰن الرّحیم» [خُدائے] کریم کے دسترخوان کی جانب صدائے دعوت ہے۔

 

[محمد وارث]

تیزیِ مژگانِ خونریزی ترا حاصل نکرد
تیغ ہائے آہنی ہرچند سر بر سنگ زد

عارف لاہوری

خونریزی میں تیری پلکوں کی سی تیزی حاصل ہو نہ سکی، ہرچند کہ آہنی تلواروں نے پتھر پر بہت سر مارا۔ (تلوار کو تیز کرنے کے لیے پتھروں پر رگڑتے تھے)۔

 

[اکمل زیدی]

حسان خان محمد وارث
آپ حضرات سے درخواست ہے درج ذیل شعر کا مطلب (ایک مسدس کی بیت ہے )بتا دیں مجالس میں بہت سنا ہے مگر سمجھ نہیں آیا۔۔

اجل رسیدہ منم می رَوَم بہ کرب و بلا
گذشت نوبتِ مسلم ، رسیدنوبتِ ما

 

[محمد وارث]

حسان خان محمد وارث
آپ حضرات سے درخواست ہے درج ذیل شعر کا مطلب (ایک مسدس کی بیت ہے )بتا دیں مجالس میں بہت سنا ہے مگر سمجھ نہیں آیا۔۔

اجل رسیدہ منم می رَوَم بہ کرب و بلا
گذشت نوبتِ مسلم ، رسیدنوبتِ ما

اس شعر میں مسلم سے مراد شاید حضرت مسلم بن عقیل ہیں، اور مفہوم کچھ یوں بنتا ہے کہ میری اجل (موت) کا وقت آ گیا اور میں کربلا کی طرف چلا جاتا ہوں، مسلم کی باری گزر گئی اور ہماری باری آ گئی۔

 

[اکمل زیدی]

اس شعر میں مسلم سے مراد شاید حضرت مسلم بن عقیل ہیں، اور مفہوم کچھ یوں بنتا ہے کہ میری اجل (موت) کا وقت آ گیا اور میں کربلا کی طرف چلا جاتا ہوں، مسلم کی باری گزر گئی اور ہماری باری آ گئی۔

بہت بہت شکریہ وارث بھائ ۔۔۔
جی وہ جناب مسلم بن عقیل ہی مراد ہے

 

[حسان خان]

اجل رسیدہ منم می رَوَم بہ کرب و بلا

اِس مصرعے میں 'منم' نادرست استعمال ہوا ہے۔

 

[اکمل زیدی]

بہت بہت شکریہ وارث بھائ ۔۔۔
جی وہ جناب مسلم بن عقیل ہی مراد ہے

وارث بھائ لگے ہاتھوں ایک بات اور اگر میں اسے اردو میں پڑھنا چاہوں تو اسے اس طرح کرسکتا ہوں ۔۔یا کوئ بہتر مشورہ دیں کیونکہ مسدس کے اوپر کے چار شعر اردوو میں ہیں مگر یہ بیت اسی طرح پڑھی جاتی ہے جو یقیناً عقیدتی تاثر تو پیدا کر دیتی ہے مگر اغلب امکاں ہے کے سامعین نابلد ہوتے ہوں ذیل میں ملاحظہ فرمائیں۔۔۔

اجل کا وقت ہے کربلا بلاتی ہے
مسلم گذر گئے ہماری باری آتی ہے

 

[محمد وارث]

وارث بھائ لگے ہاتھوں ایک بات اور اگر میں اسے اردو میں پڑھنا چاہوں تو اسے اس طرح کرسکتا ہوں ۔۔یا کوئ بہتر مشورہ دیں کیونکہ مسدس کے اوپر کے چار شعر اردوو میں ہیں مگر یہ بیت اسی طرح پڑھی جاتی ہے جو یقیناً عقیدتی تاثر تو پیدا کر دیتی ہے مگر اغلب امکاں ہے کے سامعین نابلد ہوتے ہوں ذیل میں ملاحظہ فرمائیں۔۔۔

اجل کا وقت ہے کربلا بلاتی ہے
مسلم گذر گئے ہماری باری آتی ہے

مفہوم آپ کا درست ہے زیدی صاحب لیکن وہی "تول تکڑی" والی بات، چونکہ مسدس کے سارے مصرعے ایک ہی وزن میں ہوتے ہیں سو ان دو مصرعوں کو بھی باقی کے وزن میں لانا ہوگا۔

 

[حسان خان]

«محمد ارشد بن علی‌اکبر ارشد هِرَوی» نے اپنی مثنوی «ابرِ گُهربار» کا آغاز اِس بیت سے کیا ہے:
بسم الله الرّحمٰن الرّحیم
رشْحهٔ اوّل ز سحابِ قدیم
(محمد ارشد بن علی‌اکبر ارشد هِرَوی)
«بسم الله الرّحمٰن الرّحیم» ابرِ قدیم کا قطرۂ اوّل ہے۔

 

[حسان خان]

«محمد حُسین قزوینی» نے اپنی مثنوی «اشترنامه» کا آغاز اِس بیت سے کیا ہے:
بسم الله الرّحمٰن الرّحیم
قادرِ غفّار و قدیر و قدیم
(محمد حُسین قزوینی)
خدائے رحمٰن و رحیم کے نام سے، کہ جو قادرِ غفّار و قدیر و قدیم ہے۔

 

[حسان خان]

«مولوی محمد عبدالرئوف 'وحید'» نے اپنی مثنوی «تاجِ سُخن» کا آغاز اِس بیت سے کیا ہے:
بسم الله الرّحمٰن الرّحیم
تاجِ سُخن راست چو دُرِّ یتیم
(مولوی محمد عبدالرئوف 'وحید')
«بسم الله الرّحمٰن الرّحیم» تاجِ سُخن کے لیے دُرِّ یگانہ کی مانند ہے۔
× دُر = موتی

 

[حسان خان]

«عبدالرحمٰن جامی» کے ایک دیوان «فاتحة الشّباب» کے اوّل میں یہ بیت آئی ہے:
بسم الله الرّحمٰن الرّحیم
اعظمِ اسمایِ علیمِ حکیم
(عبدالرحمٰن جامی)
«بسم الله الرّحمٰن الرّحیم» خدائے علیم و حکیم کا اِسم اعظم ہے۔

 

[حسان خان]

«محمد حسن دهلوی» نے اپنی مثنوی «تُحفهٔ میمونه» کا آغاز اِس بیت سے کیا ہے:
بسم الله الرّحمٰن الرّحیم
کرد خدا رحمتِ خود را عمیم
(محمد حسن دهلوی)
بسم الله الرّحمٰن الرّحیم۔۔۔ خدا نے اپنی رحمت کو عام کر دیا۔

 

[حسان خان]

مثنویِ «جَنّات الوصال» کی «جنّتِ ششُم» کی بیتِ اوّلین:
بسم الله الرّحمٰن الرّحیم
فاتح الابوابِ جنّاتِ نعیم
(نظام علی شاه کِرمانی)
«بسم الله الرّحمٰن الرّحیم» جنّاتِ نعیم کے ابواب کو کھولتی ہے۔