زندگی کو وہ سانحہ سمجھے

[ابن رضا]

ایک تازہ غزل احباب کے ذوق کی نذر

زندگی کو وہ سانحہ سمجھے
عہدِ اُلفت کو اِک خطا سمجھے

دردِ دل کی اُسے دوا سمجھے
ہم جو سمجھے، تو کیا بُرا سمجھے

رگِ جاں میں اُتر گئی ہو تم
آرزوؤ! تمھیں خُدا سمجھے

حسرتوں کا لہو تھا آنکھوں میں
وہ جسے ایک عارضہ سمجھے

حیف! اِک رابطے کی دُوری ہم
زندگی بھر کا فاصلہ سمجھے

بِھیڑ تھی مُنتشر سے لوگوں کی
ہم جنہیں ایک قافلہ سمجھے

آہ! وہ التفات کو میرے
ایک معمول کی ادا سمجھے

چند بادل تھے بے یقینی کے
جن کو وہ میرا حوصلہ سمجھے

جو بھی کہنا تھا کہہ دیا، اُس نے
جو سمجھنا ہے برملا سمجھے​

 

[الشفاء]

واہ صاحب۔ عمدہ۔۔۔
آخری شعر میں اس کو ہم کر دیا جائے تو۔۔۔

 

[ابن رضا]

ٹیگ: الف عین ، راحیل فاروق ، محمد احمد ، محمد تابش صدیقی ، نیرنگ خیال ، سید ذیشان ، سید عاطف علی فاتح ، ادب دوست ، مزمل شیخ بسمل

 

[محمد تابش صدیقی]

بہت خوب ابن رضا بھائی۔ کیا کہنے

دردِ دل کی اُسے دوا سمجھے
ہم جو سمجھے، تو کیا بُرا سمجھے

بِھیڑ تھی مُنتشر سے لوگوں کی
ہم جنہیں ایک قافلہ سمجھے

چند بادل تھے بے یقینی کے
جن کو میرا وہ حوصلہ سمجھے

غالباً محفل میں بڑے عرصے بعد آپ کے کلام کی آمد ہوئی ہے۔

 

[ابن رضا]

بہت خوب ابن رضا بھائی۔ کیا کہنے







غالباً محفل میں بڑے عرصے بعد آپ کے کلام کی آمد ہوئی ہے۔

تشکر حضور، ابھی چند دن پہلے تو آپ کو راحیل فاروق بھائی کے کلام کی پیروڈی پیش کی تھی؟ ہاں اگر سنجیدہ شاعری کی بات کریں تو میری آخری غزل شاید چار ماہ پرانی ہو چلی ہے۔ http://www.urduweb.org/mehfil/threads/بات-اب-ضبط-سے-باہر-ہے،-مجھے-رونے-دو.84968/

 

[الف عین]

چھی غزل کہی ہے مبارک ہو۔
یہ دو اشعار
وہ نگہ التفات کو میری
ایک معمول کی ادا سمجھے
پہلے مصرع میں اضافت کہاں ہے؟

چند بادل تھے بے یقینی کے
جن کو میرا وہ حوصلہ سمجھے
جن کو وہ میرا حوصلہ۔ کر دو تو؟

 

[راحیل فاروق]

ماشاءاللہ، ابن رضا بھائی۔

رگِ جاں میں اتر گئی ہو تم
آرزوؤ! تمھیں خُدا سمجھے

ہاہاہا۔ لطف کی بات یہ ہے کہ کل رات سے ایک شعر ذہن میں چکرا رہا تھا۔

مجھے سمجھانے آیا ہے ناصح
ہائے کمبخت کو خدا سمجھے !​

جی میں تھا کہ پوری غزل کہہ لی جائے۔ مگر مشیت نے یہ زمین آج کے دن سرکار کے نام لکھ دی شاید۔ آپ نے نبھائی بھی اچھی ہے۔ بہت سی داد!

 

[ابن رضا]

چھی غزل کہی ہے مبارک ہو۔
یہ دو اشعار
وہ نگہ التفات کو میری
ایک معمول کی ادا سمجھے
پہلے مصرع میں اضافت کہاں ہے؟

چند بادل تھے بے یقینی کے
جن کو میرا وہ حوصلہ سمجھے
جن کو وہ میرا حوصلہ۔ کر دو تو؟

تعمیل کرتا ہوں۔
حوصلہ افزائی کے لیے سراپا سپاس ہوں سر۔
سر یہاں نگہ التفات بغیر اضافت کے ہی ہے علامہ اقبال کا ایک شعر ایسی نوعیت کی ترکیب کے ساتھ نظر سے گزرا تھا

اس کی ادا دل فریب اس کی نگہ دل نواز
نرم دمِ گفتگو گرم دمِ جستجو

 

[ابن رضا]

ماشاءاللہ، ابن رضا بھائی۔

ہاہاہا۔ لطف کی بات یہ ہے کہ کل رات سے ایک شعر ذہن میں چکرا رہا تھا۔

مجھے سمجھانے آیا ہے ناصح
ہائے کمبخت کو خدا سمجھے !​

جی میں تھا کہ پوری غزل کہہ لی جائے۔ مگر مشیت نے یہ زمین آج کے دن سرکار کے نام لکھ دی شاید۔ آپ نے نبھائی بھی اچھی ہے۔ بہت سی داد!

اس محبت اور پذیرائی کے لیے سراپا سپاس ہوں جناب۔ سلامت رہیے۔

 

[ابن رضا]

واہ صاحب۔ عمدہ۔۔۔
آخری شعر میں اس کو ہم کر دیا جائے تو۔۔۔

بہت نوازش قبلہ، آپ کی تجویز سر آنکھوں پر تا ہم آپ اس شعر کو اگر یوں پڑھیں تو شاید میرا مدعا بہتر طور پر ابلاغ پا سکے۔

جو بھی کہنا تھا کہہ دیا،
اُس نے جو سمجھنا ہے برملا سمجھے​

یعنی "اس نے" اگلے مصرعے سے مربوط ہے۔

 

[سید ذیشان]

بہت خوب ابن رضا بھائی

 

[یوسف سلطان]

بہت خوب

 

[محمد وارث]

خوب غزل ہے جناب، لاجواب

 

[سید عاطف علی]

ہم جو سمجھے، تو کیا بُرا سمجھے​

واہ ۔ بہت اچھا جناب ۔ ​

 

[حمیرا عدنان]

بہت خوب ابن رضا بھائی

 

[ابن رضا]

بہت خوب ابن رضا بھائی

بہت خوب

خوب غزل ہے جناب، لاجواب

ہم جو سمجھے، تو کیا بُرا سمجھے
واہ ۔ بہت اچھا جناب ۔ ​

بہت خوب ابن رضا بھائی

بہت نوازش! آپ سب احباب کی محبتوں اور پذیرائی کے لیے بہت شکریہ، سلامت رہیے

 

[صفی حیدر]

عمدہ تخلیق ہے۔۔۔۔۔۔۔۔۔

 

[الف عین]

تعمیل کرتا ہوں۔
حوصلہ افزائی کے لیے سراپا سپاس ہوں سر۔
سر یہاں نگہ التفات بغیر اضافت کے ہی ہے علامہ اقبال کا ایک شعر ایسی نوعیت کی ترکیب کے ساتھ نظر سے گزرا تھا

اس کی ادا دل فریب اس کی نگہ دل نواز
نرم دمِ گفتگو گرم دمِ جستجو

اقبال کی تراکیب ایسی نہیں جس میں اضافت کی ضرورت پڑے

 

[نیرنگ خیال]

رگِ جاں میں اتر گئی ہو تم
آرزوؤ! تمھیں خُدا سمجھے

حیف! اِک رابطے کی دُوری ہم
زندگی بھر کا فاصلہ سمجھے

کیا کہنے ابن رضا بھائی۔۔ یوں تو مکمل غزل ہی لاجواب اور اعلی ہے۔۔۔ مگر یہ دو اشعار خاص کر بےحد پسند آئے۔۔ بہت اعلی
بہت سی داد قبول فرمائیں۔

 

[ابن رضا]

اقبال کی تراکیب ایسی نہیں جس میں اضافت کی ضرورت پڑے

بجا فرمایا سر آپ نے ، التفات اسمِ کیفت ہے جبکہ دل نواز ایک صفت ذاتی ہے تو اضافت تو بنتی ہے۔ اس لیے تدوین کر دی ہے شعر میں