سعادت بھائی کا انٹرویو

[مریم افتخار]

السلام علیکم! میں ہوں آپ کی میزبان مریم افتخار اور میرے ساتھ ہیں محمد ظہیر، نور سعدیہ شیخ، فہد اشرف اور حمیرا عدنان. آئیے اردو محفل فورم کی تیرہویں سالگرہ کے موقع پر محفلین کے انٹرویو کے سلسلے کو آگے بڑھاتے ہیں. ہماری آج کی مہمان وہ ہستی ہیں کہ جن کا انٹرویو کرنا ہمارے لیے بڑی سعادت کی بات ہے. انہیں ہم میں سے بہت کم محفلین جانتے ہیں اور وجہ اس کی یہ ہے کہ جب سے اردو محفل ہے تب سے اس کے ناصرف رکن ہیں بلکہ اردو محفل کے اس سٹیج پر ان کا کردار بھی بڑا ہے تبھی تو منتظم اعلی نبیل بھیا نے انہیں اپنے پسندیدہ ترین محفلین میں سے قرار دیا، مگر اس کے باوجود ابھی تک ان کے ایک ہزار مراسلہ جات مکمل نہیں ہوئے. آج ہم سب یہاں نہ صرف ان کے بارے میں جاننے بلکہ یہ تمغہ اور منصب ہزاری بھی دلوانے کے لیے اکٹھے ہوئے ہیں. جہاں تک ہمارے ذہن کی آوارہ گردی کا تعلق ہے تو ان کا نام سنتے ہی ہمارے ذہن میں ہمارے فیورٹ 'سعادت حسن صاحب' کا خاکہ سا آتا ہے. ان کے بارے میں بقیہ تفصیلات جانتے ہیں ان ہی سے. آپ سب کی بھرپور تالیوں میں تشریف لاتے ہیں سعادت صاحب!

 

[مریم افتخار]

سوال نامہ:

1) آپ کا پورا نام کیا ہے اور آپ کے نام کا آپ کی شخصیت پر کیا اثر ہے؟

2) آپ کی زندگی میں اردو محفل کی کیا اہمیت ہے اور کیوں؟

3) آپ کا تعلق کس علاقے سے ہے اور آپ اس وقت کہاں مقیم ہیں؟

4) آپ کا ذریعہ معاش کیا ہے اور آپ نے اسی کا انتخاب کیوں کیا؟

5) آپ کا اردو محفل پر آنا کم ہوتا ہے یا عمومی طور پر خاموش قاری ہیں؟

6) آپ گھر کے افراد میں سے کس کے سب سے زیادہ قریب ہیں؟

7) عمر کی کتنی بہاریں دیکھ چکے ہیں؟ نیز اپنے تجربے سے سیکھنے والوں کو کیا کہیں گے کہ کس ایک کام سے سب سے زیادہ بچو اور کیوں؟

8 ) آپ کے خیال میں کن تین شخصیات نے دنیا پر سب سے زیادہ اثرات مرتب کیے؟

9) آپ کا روز مرہ کا معمول کیا ہے؟ نیز آپ نے اب تک کن کن غیر نصابی و غیر معاشی سرگرمیوں میں حصہ لیا ہے؟

10) جب انتہائی شکر کی کیفیت ہوتی ہے اور جب انتہائی مایوسی کی کیفیت ہوتی ہے تب کیا کرتے ہیں؟

11) کوئی ایسا کام جو آپ کرتے کرتے رہ گئے ہوں اور آج بھی خیال آتا ہو کہ کر لیتا تو کیا تھا!

12) ابھی تک اردو محفل میں کس سے بالمشافہ ملاقات رہی؟

 

[سعادت]

السلام علیکم! میں ہوں آپ کی میزبان مریم افتخار اور میرے ساتھ ہیں محمد ظہیر، نور سعدیہ شیخ، فہد اشرف اور حمیرا عدنان. آئیے اردو محفل فورم کی تیرہویں سالگرہ کے موقع پر محفلین کے انٹرویو کے سلسلے کو آگے بڑھاتے ہیں. ہماری آج کی مہمان وہ ہستی ہیں کہ جن کا انٹرویو کرنا ہمارے لیے بڑی سعادت کی بات ہے.

بہت شکریہ، مریم اور انٹرویو ٹیم۔

انہیں ہم میں سے بہت کم محفلین جانتے ہیں اور وجہ اس کی یہ ہے کہ جب سے اردو محفل ہے تب سے اس کے ناصرف رکن ہیں بلکہ اردو محفل کے اس سٹیج پر ان کا کردار بھی بڑا ہے تبھی تو منتظم اعلی نبیل بھیا نے انہیں اپنے پسندیدہ ترین محفلین میں سے قرار دیا

یہ تو نبیل بھائی کی ذرہ نوازی ہے۔ اردو محفل کے سٹیج پر میرا کردار بہت معمولی سا ہے، جس کا ثبوت خود آپ کا اگلا جملہ ہے:

مگر اس کے باوجود ابھی تک ان کے ایک ہزار مراسلہ جات مکمل نہیں ہوئے.

جہاں تک ہمارے ذہن کی آوارہ گردی کا تعلق ہے تو ان کا نام سنتے ہی ہمارے ذہن میں ہمارے فیورٹ 'سعادت حسن صاحب' کا خاکہ سا آتا ہے.

سعادت حسن… منٹو؟!

 

[مریم افتخار]

اردو محفل کے سٹیج پر میرا کردار بہت معمولی سا ہے، جس کا ثبوت خود آپ کا اگلا جملہ ہے

ایسا نہیں ہے. مقدار اور معیار کا عمومی طور پر تناسب معکوس رہا ہے. اسی سٹیج پر میں بہت سے ایسے لوگوں کو جانتی ہوں جن کے مراسلہ جات زیادہ نہیں ہیں مگر ان کا کردار بہت اہم ہے. کم از کم میں تو ایسا سمجھتی ہوں اور نہایت صدق دل سے یہ کہا تھا آپ کے لیے.

سعادت حسن… منٹو؟!

جی بالکل. مجھے منٹو بہت پسند ہیں مگر یہاں نام کے ساتھ منٹو اس لیے نہیں لکھا کہ اگر آپ کو وہ پسند نہ ہو‍ں تو کہیں پہلے تاثر کے طور پر ہی آپ برا نہ مان جائیں کیونکہ ان کے متعلق لوگوں کی اپنی اپنی رائے ہے.

سرگوشی: آپس کی بات ہے کہ

میں نے یہ ذکر اس لیے کیا تاکہ آپ مجھے غلط ثابت کرنے کے لیے اپنی کسی پروفائل بمع تصویر کا ربط مہیا کر کے اس انٹرویو کو مزید کامیاب بنائیں.

 

[سعادت]

1) آپ کا پورا نام کیا ہے اور آپ کے نام کا آپ کی شخصیت پر کیا اثر ہے؟

سعادت متین۔

میری امی جی کی ایک سہیلی نے ایک دفعہ مجھے اسم با مسمیٰ قرار دیا تھا، کچھ دیگر لوگوں کا بھی یہی خیال ہے۔ میں اسے اِن سب کا حُسنِ ظن سمجھتا ہوں۔

2) آپ کی زندگی میں اردو محفل کی کیا اہمیت ہے اور کیوں؟

اردو محفل ان چند ویب‌سائٹس میں سے ہے جن کا دورہ کیے بغیر میرا دن مکمل نہیں ہوتا، چاہے وہ دورہ چند منٹوں کے لیے ہی کیوں نہ ہو۔ محفل کی ایک ممتاز بات تو اس کا اردو میں ہونا ہے، لیکن اس سے بھی زیادہ، یہاں موجود افراد اور ان کی آپس میں انٹریکشن مجھے اچھی لگتی ہے۔

3) آپ کا تعلق کس علاقے سے ہے اور آپ اس وقت کہاں مقیم ہیں؟

پیدائش کے لحاظ سے پِنڈی بوائے ہوں۔ بچپن اور نوجوانی راولپنڈی میں ہی گزری۔ اُس کے بعد سے اسلام‌آباد میں مقیم ہوں۔

4) آپ کا ذریعہ معاش کیا ہے اور آپ نے اسی کا انتخاب کیوں کیا؟

آٹھویں جماعت میں تھا جب ابو جی نے ہم بہن بھائیوں کے لیے ایک کمپیوٹر خریدا تھا۔ بس پھر اِس مشین کی ایسی عادت ہوئی کہ سوفٹ‌ویئر انجینیئر بن کر دم لیا۔

آجکل البتہ خالص سوفٹ‌ویئر انجینیئرنگ کی بجائے usability اور یوزر ایکسپیریئنس کے میدان میں ٹامک ٹوئیاں مارتا ہوں۔

5) آپ کا اردو محفل پر آنا کم ہوتا ہے یا عمومی طور پر خاموش قاری ہیں؟

محفل کا چکر تو روزانہ ہی لگتا ہے، لیکن خاموش قاری ہوں۔ جب محفل کا رکن نہیں تھا تب بھی محفلین کے مباحثے پڑھنے کے لیے آیا کرتا تھا۔

6) آپ گھر کے افراد میں سے کس کے سب سے زیادہ قریب ہیں؟

بیگم۔

 

[سعادت]

7) عمر کی کتنی بہاریں دیکھ چکے ہیں؟

۳۵۔

7) […] نیز اپنے تجربے سے سیکھنے والوں کو کیا کہیں گے کہ کس ایک کام سے سب سے زیادہ بچو اور کیوں؟

وقت ضائع کرنے سے بچیں، کہ یہ کبھی واپس نہیں آتا۔ (میں خود اس معاملے میں میاں فضیحت ہی ہوں۔)

8 ) آپ کے خیال میں کن تین شخصیات نے دنیا پر سب سے زیادہ اثرات مرتب کیے؟

مشکل سوال ہے۔ کافی شخصیات نے اپنے اپنے دور میں دنیا پر مثبت اور منفی کئی اثرات مرتب کیے ہیں۔ مذہبی رہنماؤں کے علاوہ اگر دیکھا جائے تو: یوہانس گُٹنبرگ (پرنٹنگ پریس کا موجد)، چارلس ڈاروِن، البرٹ آئنسٹائن۔

9) آپ کا روز مرہ کا معمول کیا ہے؟

صبح اٹھ کر چہل قدمی اور ہلکی پھلکی ورزش (رمضان میں سست ہو گیا تھا تو آجکل اسے بحال کرنے کی کوششیں جاری ہیں)۔ ناشتہ۔ دفتر۔ شام کو گھر واپسی۔ گھر والوں کے ساتھ ڈنر۔ بستر۔ وقت اور مُوڈ ہو تو شام کو کسی کتاب کا کچھ مطالعہ بھی ہو جاتا ہے۔

وِیک اینڈز پر گھر کے کام اور اپنے ذاتی پراجیکٹس کو وقت دیتا ہوں۔ بیگم اور بچوں کے ساتھ اِدھر اُدھر کی سیر بھی ہو جاتی ہے۔

9) […] نیز آپ نے اب تک کن کن غیر نصابی و غیر معاشی سرگرمیوں میں حصہ لیا ہے؟

سکول کے زمانے میں غیر نصابی سرگرمیوں میں کافی فعال تھا۔ نعت خوانی، نغموں، سٹیج ڈراموں وغیرہ میں حصہ لیا کرتا تھا۔ آجکل دفتر میں کوشش رہتی ہے کہ کچھ نہ کچھ ہوتا رہے: کبھی مووی نائٹ؛ کبھی سپیکنگ سیشنز، جن میں تمام کولیگز کو دعوت دی جاتی ہے کہ اپنی پسند کے کسی بھی موضوع پر اظہارِ خیال کریں۔

10) جب انتہائی شکر کی کیفیت ہوتی ہے […] تب کیا کرتے ہیں؟

کافی سرشار ہوتا ہوں۔ اپنے گھر والوں یا قریبی دوستوں کے ساتھ اپنی خوشی شیئر کرتا ہوں۔

10) […] اور جب انتہائی مایوسی کی کیفیت ہوتی ہے تب کیا کرتے ہیں؟

اپنا دھیان بٹانے کی کوشش کرتا ہوں۔ عموماً کوئی کتاب پڑھ کر یا کوئی فلم دیکھ کر۔

11) کوئی ایسا کام جو آپ کرتے کرتے رہ گئے ہوں اور آج بھی خیال آتا ہو کہ کر لیتا تو کیا تھا!

ایف‌ایس‌سی میں ایک مرتبہ گرافک ڈیزائن کی ایک جاب کے لیے انٹرویو دیا تھا (گرافِک ڈیزائن سے زیادہ پیج لے‌آؤٹ کا کام تھا)۔ یہ میری زندگی کا پہلا جاب انٹرویو تھا، اور جن صاحب نے انٹرویو کیا تھا انہوں نے جاب بھی آفر کر دی تھی، لیکن اُس وقت شاید کالج کے اوقات کی وجہ سے میں نے ہامی نہیں بھری (اور شاید اس لیے بھی کہ مجھے یقین تھا کہ ابو جی کی طرف سے اجازت نہیں ملے گی—میرے تعلیمی کیریئر کا سب سے بُرا حصہ ایف‌ایس‌سی ہی کا تھا)۔ اب کبھی کبھار خیال آتا ہے کہ دو تین ماہ کی وہ جاب کر ہی لی ہوتی۔

12) ابھی تک اردو محفل میں کس سے بالمشافہ ملاقات رہی؟

تاج نستعلیق فونٹ کے اجرا کے بعد شاکرالقادری صاحب کے اعزاز میں ایک تقریب منعقد کی گئی تھی، جس میں شاکر القادری صاحب اور کچھ دیگر محفلین سے ملاقات ہوئی تھی: تلمیذ صاحب مرحوم، سید زبیر صاحب ، افتخار اجمل بھوپال صاحب ( زیک کے والدِ گرامی)، الف نظامی ، نیرنگ خیال ، محمد سعد ، علوی امجد (علوی نستعلیق کے خالق)، خرم شہزاد خرم ، ساجد ، عاطف بٹ ، باباجی ، اور بلال ۔ (شاید کچھ کے نام اب بھی بھول رہا ہوں۔)

 

[سعادت]

ایسا نہیں ہے. مقدار اور معیار کا عمومی طور پر تناسب معکوس رہا ہے. اسی سٹیج پر میں بہت سے ایسے لوگوں کو جانتی ہوں جن کے مراسلہ جات زیادہ نہیں ہیں مگر ان کا کردار بہت اہم ہے. کم از کم میں تو ایسا سمجھتی ہوں اور نہایت صدق دل سے یہ کہا تھا آپ کے لیے.

بہت شکریہ۔

جی بالکل. مجھے منٹو بہت پسند ہیں مگر یہاں نام کے ساتھ منٹو اس لیے نہیں لکھا کہ اگر آپ کو وہ پسند نہ ہو‍ں تو کہیں پہلے تاثر کے طور پر ہی آپ برا نہ مان جائیں کیونکہ ان کے متعلق لوگوں کی اپنی اپنی رائے ہے.

برا تو بالکل نہیں مانا۔ ایف‌ایس‌سی کے دوسرے سال کے اردو نصاب میں منٹو کا ایک افسانہ شامل تھا، جسے پڑھنے کے بعد میرے کلاس‌فیلوز نے بھی مجھے منٹو کہنا شروع کر دیا تھا۔ ویسے منٹو اور مجھ میں صرف ایک ہی قدر مشترک ہے اور وہ ہے عینک۔ (کسی زمانے میں مَیں نے ایک دو افسانے بھی لکھ مارے تھے، لیکن ظاہر ہے کہ وہ منٹو کے کام کا عشرِ عشیر بھی نہیں تھے۔)

 

[نیرنگ خیال]

میں تو یہی شکر کر رہا ہوں کہ آپ کو میرا نام یاد رہا۔ چھے سال بیت چکے اس ملاقات کو سعادت۔

 

[مریم افتخار]

وقت ضائع کرنے سے بچیں، کہ یہ کبھی واپس نہیں آتا۔ (میں خود اس معاملے میں میاں فضیحت ہی ہوں۔)

اس سے اوپر والے سوال کا جواب ہی ظاہر کرتا ہے کہ آپ اس معاملے میں میاں فضیحت نہیں ہیں۔ ملاحظہ فرمائیے:

۳۵۔

چارلس ڈاروِن

میری فیلڈبائیولوجیکل سائنسز ہے پر مجھے یہ کبھی نہیں لگا کہ چارلس ڈارون کا اتنا بڑا کردار ہے کہ اسے دنیا کی تین بڑی شخصیات میں رکھا جائے۔ آپ نے اس کا نام لیا تو میں وجہ جاننا چاہوں گی کہ آپ ایسا کیوں سمجھتے ہیں؟ (مجھے تو یوں لگتا ہے کہ جلد یا بدیر یہ غلط پروو ہو جائے شاید بالکل اسی طرح جیسے ایک لمبے عرصے تک سائنسدانوں کا ایمان تھا کہ سورج زمین کے گرد گھومتا ہے اور پھر یکدم بالکل الٹ ڈسکوری ہوئی کہ زمین سورج کے گرد گھومتی ہے!)

ویسے منٹو اور مجھ میں صرف ایک ہی قدر مشترک ہے اور وہ ہے عینک۔

اچھا اچھا ہم سمجھتے تھے کہ نام بھی۔۔۔۔۔

سرگوشی

عرض کرتے ہیں جناب ایک سوال کا جواب ایک مراسلے میں دیا جائے اور اگلے سوال کے لیے اگلا مراسلہ اور وجہ اس کی یہ ہے کہ

سرگوشی

یہی نہ ہو کہ کہیں

سرگوشی

یہ لڑی بھی ہمارے بھائی کو منصب ہزاری دلوانے میں ناکام رہے۔

 

[محمدظہیر]

انٹرویو پینل کا ممبر ہونے کے ناطے مزید چند سوالات کا اضافہ کر رہا ہوں

1.تعلیمی قابلیت کیا ہے ؟ نیز اپنے passion کے بارے میں کچھ بتائیں
2.اردو محفل پر ایک عرصے سے ہیں لیکن کم مراسلہ جات کی وجہ کیا ہے جب کہ محفل کی زیارت روزانہ ہوتی ہے؟
3. لوگوں کی کونسی عادتیں اچھی لگتی ہیں، اور کونسی ناگوار گزرتی ہیں؟
4.سیاسی نقطہ نظر کیا ہے ، پی ایم ایل، پی پی پی یا تحریک انصاف پارٹی؟
5.کبھی ایسا ہوا کہ اردو محفل پر کسی سے بحث ہوئی ہو؟
6.مشکلات تو زندگی میں سبھی کو پیش آتے ہیں، آپ ایسی صورت حال سے کیسے نمٹتے ہیں
7.کون سی مشغولیت وقت کا بڑا حصہ ہضم کر جاتی ہیں؟
8. مسئلہ کشمیر کو کس طرح حل کیا جانا چاہیے جس سے تینوں فریق خوش رہیں
9. اینڈرائڈ اور آئی او ایس میں کسے ترجیح دیتے ہیں اور کیوں
10. محفلین کے لیے ایک پیغام ...

 

[ابن سعید]

3. Introvert ہیں یا extrovert ؟

انٹرووَرٹ۔

(اس موضوع پر سوزن کین کی کتاب، Quiet: The Power of Introverts in a World That Can't Stop Talking، دلچسپ ہے۔)

 

[محمدظہیر]

تبدیل کر دیا ہے، شکریہ

 

[ابن سعید]

تبدیل کر دیا ہے، شکریہ

بھئی یہ انٹرویو کی لڑی ہے، لہٰذا اس میں وہ سوال دوبارہ پوچھنے میں کوئی حرج نہیں۔ ہم نے تو بس شغل کے لیے یہاں ایک پرانے مراسلے کا اقتباس شامل کر دیا تھا۔

 

[سعادت]

میں تو یہی شکر کر رہا ہوں کہ آپ کو میرا نام یاد رہا۔ چھے سال بیت چکے اس ملاقات کو سعادت۔

واقعی، چھ سال گزر چکے! اور آپ جیسی دوستانہ شخصیت کو بھلا کون بھولے گا، ذوالقرنین۔

 

[سعادت]

اس سے اوپر والے سوال کا جواب ہی ظاہر کرتا ہے کہ آپ اس معاملے میں میاں فضیحت نہیں ہیں۔

وہ وقت کی نہیں، الفاظ کی بچت تھی۔

اچھا اچھا ہم سمجھتے تھے کہ نام بھی۔۔۔۔۔

ہاہا! جی، نام بھی۔

سرگوشی

عرض کرتے ہیں جناب ایک سوال کا جواب ایک مراسلے میں دیا جائے اور اگلے سوال کے لیے اگلا مراسلہ اور وجہ اس کی یہ ہے کہ

سرگوشی

یہی نہ ہو کہ کہیں

سرگوشی

یہ لڑی بھی ہمارے بھائی کو منصب ہزاری دلوانے میں ناکام رہے۔

مشورہ خوب ہے (اور آپ کی Inception-esque سرگوشیاں پڑھ کر بھی لطف آیا)۔ اگلے مراسلوں میں تعمیل کرنے کی کوشش کی جائے گی۔

 

[سعادت]

میری فیلڈبائیولوجیکل سائنسز ہے پر مجھے یہ کبھی نہیں لگا کہ چارلس ڈارون کا اتنا بڑا کردار ہے کہ اسے دنیا کی تین بڑی شخصیات میں رکھا جائے۔ آپ نے اس کا نام لیا تو میں وجہ جاننا چاہوں گی کہ آپ ایسا کیوں سمجھتے ہیں؟

بات کچھ لمبی ہو جائے گی، لیکن مختصراً یہ کہ: ایک ایسا شخص جو حیاتیات کو سُپرنیچرل کے اثر سے باہر لے کر آیا؛ جس نے ایک ایسا نظریہ تشکیل دیا جس کے ذریعے دنیا میں موجود تمام زندگی اور اس کے تنوع کی عمدہ وضاحت ممکن ہوئی؛ اور جس کے خیالات کی وجہ سے سائنسی ہی نہیں، بلکہ معاشرتی نظریات میں بھی نئی جہات پیدا ہوئیں… ایسے شخص کا دنیا پر کچھ تو اثر ہوا ہو گا۔

مجھے تو یوں لگتا ہے کہ جلد یا بدیر یہ غلط پروو ہو جائے شاید بالکل اسی طرح جیسے ایک لمبے عرصے تک سائنسدانوں کا ایمان تھا کہ سورج زمین کے گرد گھومتا ہے اور پھر یکدم بالکل الٹ ڈسکوری ہوئی کہ زمین سورج کے گرد گھومتی ہے!)

کسی بھی سائنسی نظریے کے ’غلط‘ ثابت ہونے کے بھی درجات ہوتے ہیں، اور اِس بات کا امکان زیادہ ہوتا ہے کہ وہ یکسر غلط ہونے کی بجائے کچھ لطیف انداز میں ’نامکمل‘ ہو۔ اس موضوع پر بائیوکیمسٹری کے پروفیسر اور مشہور سائنس فکشن ادیب، آئزک ایسیموو، کا یہ مضمون بہت دلچسپ ہے: The Relativity of Wrong۔ (آپ کی بیان کردہ مثال—سورج کا زمین کے گرد گھومنا اور پھر زمین کا سورج کا گرد گھومنا— بھی اس مضمون میں شامل ہے۔)

 

[سعادت]

1.تعلیمی قابلیت کیا ہے ؟ نیز اپنے passion کے بارے میں کچھ بتائیں

ماسٹرز، کمپیوٹر سائنس۔

Passion تو ایک زوردار لفظ ہے۔ اگر ’شوق‘ کہہ لیں تو ٹائپوگرافی کا کافی شوق ہے، اور اس سے متعلق ہر قسم کی معلومات سے آگاہ رہنا پسند کرتا ہوں۔

 

[سعادت]

2.اردو محفل پر ایک عرصے سے ہیں لیکن کم مراسلہ جات کی وجہ کیا ہے جب کہ محفل کی زیارت روزانہ ہوتی ہے؟

اس کی وجہ تو مجھے بھی معلوم نہیں۔

5.کبھی ایسا ہوا کہ اردو محفل پر کسی سے بحث ہوئی ہو؟

جی، بالکل ہوا (البتہ کثرت سے نہیں)۔

زیادہ تر بحث تو ٹائپوگرافی جیسے معصوم زمرے میں ہوئی (مذہبی اور سیاسی مباحث کرنے والے محفلین اِس پر دل کھول کر ہنس سکتے ہیں!) ایک مرتبہ مذہبی undertones والے ایک کارٹون پروگرام پر بھی بحث کی تھی۔ ایک اور مرتبہ ایک معاشرتی موضوع پر جم کر جواب دینا شروع کیے تھے کہ وہ لڑی ہی غائب ہو گئی۔

10. محفلین کے لیے ایک پیغام ...

یہی کہوں گا کہ بحث ضرور کیا کریں، لیکن اسے اپنی انا کا مسئلہ نہ بنایا کریں۔

 

[سعادت]

3. لوگوں کی کونسی عادتیں اچھی لگتی ہیں[…]؟

خوش اخلاقی اچھی لگتی ہے۔

3. […] اور کونسی ناگوار گزرتی ہیں؟

دوسروں کے معاملات میں خواہ مخواہ ٹانگ اڑانا۔

6.مشکلات تو زندگی میں سبھی کو پیش آتے ہیں، آپ ایسی صورت حال سے کیسے نمٹتے ہیں

گھر والوں یا دوستوں سے مشورہ کرتا ہوں۔ کبھی کبھار انٹرنیٹ پر بھی مسئلے کا حل تلاش کرنے کی کوشش کرتا ہوں۔

 

[سعادت]

4.سیاسی نقطہ نظر کیا ہے […]؟

سیکولر سیاست کا حامی ہوں۔

4.[…] پی ایم ایل، پی پی پی یا تحریک انصاف پارٹی؟

ان تینوں جماعتوں نے مختلف اوقات میں کافی مایوس کیا ہے، سو تینوں ہی نہیں۔ اِس الیکشن میں میرے حلقے سے عوامی ورکرز پارٹی کی عصمت رضا شاہ جہاں حصہ لے رہی ہیں؛ اُن کے حق میں ووٹ ڈالنے کا ارادہ ہے۔