سنجیدہ شاعری کو مزاحیہ شاعری میں بدلنا

[فرخ منظور]

یہاں ایک نیا سلسلہ شروع کیا جا رہا ہے کہ کوئی دو سنجیدہ اشعار کے الگ الگ مصرعوں کو ملا کر مزاحیہ صورتِ حال پیدا کی جائے- میں ایک اقبال کا شعر اور دوسرا غالب کا شعر لیتا ہوں (اقبال اور غالب سے معذرت کے ساتھ) اور انکے مصرعے آپس میں بدل دیتا ہوں- دیکھیے کیسی دلچسپ صورتِ حال نظر آئے گی-

نگاہ بلند، سخن دلنواز، جاں پرسوز
بعد مرنے کے میرے گھر سے یہ ساماں نکلا

چند تصویر ِ بتاں، چند حسینوں کے خطوط
یہی ہے رختِ سفر میر ِ کارواں کے لیے

کہیے کیسا لگا؟

 

[الف عین]

ادھر غالب ہی لو۔۔۔۔۔
دل سے تری نگاہ جگر تک اتر گئی
حیراں ہوں دل کو روؤں کہ پیٹوں جگر کو میں

 

[فرخ منظور]

واہ اعجاز صاحب! مزا آ گیا پڑھ کر - خدا آپ کی عمر دراز کرے -

 

[شمشاد]

سلسلہ تو بہت دلچسپ رہے گا لیکن شاید ہی کوئی اور رکن طبع آزمائی کرئے۔

 

[ہما]

روئی ہوں آج کُھل کے بڑی مدتوں کے بعد
اتنے بُہت سے کام اچانک سمٹ‌گئے


ہم نے ہر دکھ کومُحبت میں عنایت سمجھا
ادب پہلا قرینہ ہے مُحبت کے قرینوں میں

کیا یہ ۔۔اس طرح سے ۔۔۔؟؟

 

[محمد وارث]

لیجیئے جناب غالب کے ہی اشعار میں سے

نے ہاتھ باگ پر ہے نہ پا ہے رکاب میں
ساقی نے کچھ ملا نہ دیا ہو شراب میں

 

[فاتح]

بے پردہ کل جو آئیں نظر چند بیبیاں (اکبر)
ہے جستجو کہ خوب سے ہے خوب تر کہاں (حالی)

 

[حسان]

چھُری کو کر بلند اتنا کہ ذبح ہونے سے پہلے مرغی بندے سے خود پوچھے۔
ب۔۔۔۔ت۔۔۔۔۔ا ! م۔۔۔ی۔۔ری خ۔۔۔۔۔ط۔۔۔۔۔۔ا ک۔۔۔۔۔ی۔۔۔۔۔ا ہ۔۔۔۔۔ے۔۔۔۔۔؟؟؟

 

[خرم]

یا رب دلِ مسلم سے وہ مردہ تمنا لے
جو روح کو تڑپا دے جو جیب کو گرما دے

 

[فاتح]

خرم اور حسان برادران آپ نے انتہائی خوبصورت پیروڈیاں پیش کی ہیں۔ شکریہ!

لیکن اس دھاگے پر یہ شرط تھی کہ "دو سنجیدہ اشعار کے الگ الگ مصرعوں کو ملا کر مزاحیہ صورتِ حال پیدا کی جائے"۔ یعنی مصرع کے الفاظ‌ میں تبدلی لائے بغیر دو مختلف اشعار کا ایک ایک مصرع بعینہ لے لیا جائے۔

 

[محمد وارث]

"واں گیا بھی میں تو ان کی گالیوں کا کیا جواب"
"قدرتِ حق سے، یہی، حوریں اگر واں ہو گئیں"

 

[سارہ خان]

دلچسپ سلسلہ ۔۔ سب نے اتنے مزے کے اشعار پوسٹ کئے ہیں ۔۔:clapp:

 

[فاتح]

وارث صاحب نے غالب کے ایصال ثواب کے لیے مصرع خوانی کی تو میں نے سوچا میں بھی اس کارِ خیر میں حصہ ڈال دوں

"ہے تیوری چڑھی ہوئی اندر نقاب میں"
"ملتی ہے خوئے یار سے نار التہاب میں"

"دل لگا کر لگ گیا ان کو بھی تنہا بیٹھنا"
"کوئی ہمسایا نہ ہو اور پاسباں کوئی نہ ہو"

"کیا خوب، تم نے غیر کو بوسہ نہیں دیا؟"
"خاموشی ہی سے نکلے ہے جو بات چاہیے"

 

[محمد وارث]

بہت خوب کہا فاتح صاحب ویسے حیران ہو رہا ہوں کہ کیا اعجاز ہے غالب کا کہ دو الگ الگ مصرعے بھی باندھ دو ایک خوبصورت شعر کا بھر پور لطف دے جاتے ہیں۔

"رونے سے اے ندیم، ملامت نہ کر مجھے"
"جب ہاتھ ٹوٹ جائیں تو پھر کیا کرے کوئی"

 

[ظفری]

وہ آئیں گھر میں ہمارے خدا کی قدرت ہے
پھر اس کے بعد چراغوں میں روشنی نہ رہی

 

[ظفری]

غالب کے لیے میرا بھی اظہارِ عقیدت قبول کجیئے ۔

 

[محسن حجازی]

جب کبھی ہوا سر بسجدہ تو آنے لگی زمیں سے یہ صدا
ہم تم بھی تھے کبھی آشنا تمہیں یاد ہو کہ نہ یاد ہو

مصرعوں میں شاید کچھ غلطی کر گیا ہوں پیشگی معذرت۔

 

[فاتح]

محسن حجازی صاحب! بہت خوبصورت مصرعے لگائے ہیں۔ بس الفاظ کی ترتیب کچھ یوں ہے:

میں جو سر بسجدہ ہوا کبھی تو زمیں سے آنے لگی صدا
کبھی ہم بھی تم بھی تھے آشنا ، تمہیں یاد ہو کہ نہ یاد ہو

 

[محب علوی]

ہزاروں خواہشیں ایسی کہ ہر خواہش پہ دم نکلے
بہت بے آبرو ہو کہ ترے کوچے سے ہم نکلے

 

[محمد وارث]

اقبال کے دو مصرعے

نہ کر دیں مجھ کو مجبورِ نوا فردوس میں حوریں
جو مشکل اب ہے یا رب پھر وہی مشکل نہ بن جائے