شاعری سیکھنے کا بنیادی قاعدہ

[یوسف-2]

سنا تو مین نے بھی پہلی مرتبہ ہے۔ ہم لوگ امی کے مامو، چاچو وغیرہ کو نانا ہی کہتے ہیں۔ یہ در اصل ہر ریجن کا الگ الگ کلچر ہے۔ رشتے ناطوں کو پکارنے میں بڑی وسعت ہے بر صغیر پاک و ہند میں۔ ”برصغیر“ پر یاد آیا کہ بقول ڈاکٹر اسرار احمد مرحوم، پاک و ہند کو ”برصغیر“ کہنا غلط ہے۔ یہ ”برعظیم پاک و ہند“ ہے۔ ”بر اعظم“ سے چھوٹا علاقہ ”برعظیم“ کہلائے گا۔ ”برصغیر“ تو بہت چھوٹے زمینی حصہ کو کہیں گے اور پاک و ہند اب اتنا چھوٹا بھی نہیں۔ لیکن اب تو یہ ”غلط العام“ میں داخل ہوگیا ہے، ”بر صغیر پاک و ہند“ کہنا

 

[ابن سعید]

گر نہ خواہی ضرب و شتم استاد را
شاعری مکن تک بندی بگو

 

[محمد خلیل الرحمٰن]

بھائی مغزل سے عروض کا سانچہ ہی کیوں نہ چھین لیا۔ اور آج مزے سے اس سانچے میں سے شعر ڈھالتے رہتے اور تھپڑ، گھونسا اور لات کھانے سے بچے رہتے؟

کیا اچھا خیال ہے

 

[الف عین]

زبردست تحریر ہے خلیل۔ لیکن اگر سب اس پر واقعی عمل کرنے لگیں تو عروضی استادوں کی دوکان ہی بیٹھ جائے گی!!

ماموں سسر، خالہ ساس، ساسو ماں تو پہلے بھی سُن رکھے ہیں لیکن نانا ماموں پہلی دفعہ پڑھا ہے۔

جی ہاں، ہمارے بھی ایک عدد دادا ماموں تھے۔ والدہ کے رشتے کے بھائی، جب کہ والد کے رشتے کے ماموں!! ان کی بیاض بھی گھر پر موجود ہے، کبھی ٹائپ کر سکا تو کروں گا۔ نام تھا شائق گلشن آبادی

 

[محمد امین]

خوب ۔۔۔ کوشش کروں گا۔۔۔

 

[محمد بلال اعظم]

گر نہ خواہی ضرب و شتم استاد را
شاعری مکن تک بندی بگو

کیا شاعری مکھن ہوتی ہے، میں آپ کی بات نہیں سمجھا۔

 

[ابن سعید]

کیا شاعری مکھن ہوتی ہے، میں آپ کی بات نہیں سمجھا۔

اللہ کا شکر ہے کہ آپ نے "مکن" کو "مکھن" پڑھا، "مکنی" نہیں۔

 

[محمد خلیل الرحمٰن]

زبردست تحریر ہے خلیل۔ لیکن اگر سب اس پر واقعی عمل کرنے لگیں تو عروضی استادوں کی دوکان ہی بیٹھ جائے گی!!

استادِ محترم، اس جملے پر ہماری صلاح ملاحظہ فرمایئے۔
’’زبردست تحریر ہے خلیل، امید ہے نئے شاعروں کے ذہن میں عروضی استادوں کی جو دھاک بیٹھی ہوئی ہے ان کے ذہنوں سے اس کا خوف نکال کر انھیں مشقِ سخن کی طرف متوجہ کرنے میں ممد و معاون ثابت ہوگی

 

[امجد میانداد]

بہت عمدہ، مجھ ایسے نو آموز کے لیئے تو بہت مفید ہے بس کچھ سمجھنے کی ضرورت ہے۔

 

[جیہ]

شاعری سیکھنے کا بنیادی قاعدہ
محمد خلیل الرحمٰن
​

[ہمیں بچپن ہی سے شعر و شاعری کا شوق رہا ہے۔ ہماری لاٹری تو اس وقت نکلی جب اپنے نانا ماموں کے چار کمروں کے فلیٹ میں شفٹ ہوئے ، جہاں پر تین کمرے چھت تک کتابوں سے بھرے ہوئے تھے۔ پھول کی اڑتالیس سالہ جلدوں کا انتخاب، مولانا محمد حسین آزاد کی اردو کی پہلی کتاب، عطیہ خلیل عرب کا کیا ہوا خوبصورت ترجمہ، علامہ توفیق الحکیم کا شہرہ آفاق ڈرامہ ’’ محمد الرسول اللہ‘‘، نیا دور، نقوش اور ماہِ نو رسالوں کی جلدوں کی جلدیں اُن کتابوں میں سے چند ایک نام ہیں جن پر ہم نے ہاتھ صاف کیا اور اردو ادب و شاعری سے مستفید ہوئے۔البتہ علمِ عروض کی ابجد سے بھی ہم واقف نہ تھےاور نہ اب تک ہیں۔ مندرجہ ذیل مضمون میں ہم نے کوشش کی ہے کہ اپنے ساتھی محفلین کو عروض کی باریکیوں اور دقیق بحثوں میں جھانکے بغیر، وزن اور بحر سیکھنے میں مدد دے سکیں۔ گو اِس میں یقیناً ہمیں اساتذہ کی ناراضگی مول لینی پڑے گی]



شاعری اور موسیقی کا چولی دامن کا ساتھ ہے۔ اگر آپ صحیح بحر میں شاعری کرنا چاہتے ہیں تو آپ کو موسیقی کی مدد لینی پڑے گی۔ اِس سلسلے میں فلمی گیت آپ کی بجا طور پر مدد کرسکتے ہیں۔ مثال کے طور پر مندرجہ ذیل مشہور فلمی گیت کو لے لیجیے۔​

اے دِل مجھے بتادے، تو کِس پہ آگیا ہے
وہ کون ہے جو آکر خوابوں پہ چھا گیا ہے​

اب ذرا بانگِ درا نکالیے اور علامہ اقبال کی شہرہ آفاق نظم​

چین و عرب ہمارا، ہندوستاں ہمارا
مسلم ہیں ہم وطن ہے سارا جہاں ہمارا​

پڑھ جائیے۔اب اسی نظم کو اس فلمی گیت کی دھن میں گائیے۔
اب چند صفحے آگے بڑھ جائیے اور اقبال ہی کی نظم بزمِ انجم نکال لیجیے۔​

سورج نے جاتے جاتے شامِ سیہ قبا کو
طشتِ افق سے لے کر لالے کے پھول مارے​

اب اِس نظم کو بھی اسی فلمی گیت کے انترے اور استھائی سمیت گادیجیے۔ اسی پر بس نہ کرتے ہوئے، اب پھول کی اڑتالیس سالہ جلدوں کا انتخاب ( غلام عباس کا ترتیب دیا ہوا) نکال لیجیے اور اختر شیرانی کی دونظموں​

۱۔ یارب رہے سلامت اردو زباں ہماری
ہر لفظ پر ہے جسکے قربان جاں ہماری
اور

۲۔ چندر اور بندر
مشہور ہے جہاں میں بندر کی بے ایمانی
لوہم تمہیں سنائیں اِک ایسی ہی کہانی​

کو اسی فارمولے کے تحت دہرائیے۔ اگر کوئی چھوٹا بچہ سامنے ہوتو سونے پر سہاگہ ہے کہ اس طرح آپ کو لطف بھی آئے گا اور اس بحر کو سمجھنے میں مدد بھی ملے گی۔

اِس طرح گویا آپ نے ایک بحر کی مشق کرلی۔ اب خود سے اسی بحر میں اشعار کہنے کی کوشش کریں۔ظاہر ہے کہ جو مصرع اس بحر میں ہوگا، آپ اسے اس فلمی گیت کی دھن میں کبھی انترہ اور کبھی استھائی بناکر بآسانی گنگناسکیں گے۔

پھول آپ کے سامنے ہے۔ اب ذرا حفیظ جالندھری کی نظم ’’ جھوٹا گواہ‘‘ نکالیے اور آخری شعر پڑھیے۔​

دُڑم دُم، دُڑم دُم، دُڑم دُم ،دُڑم
تُڑم تُم، تُڑم تُم، تُڑم تُم، تُڑم​

اب اِس نظم کے ہر مصرع کو اِس شعر کے ساتھ دہرائیےتو یہ بحر بھی آپ کی سمجھ میں آجائے گی۔ اب مولانا محمد حسین آزاد کی ’’ اردو کی پہلی کتاب‘‘ کھولیے اور مندرجہ ذیل نظموں کے ساتھ بھی
’’ دُڑمدُم، دُڑم دُم، دُڑم دُم، دُڑم کیجیے۔​

۱۔ سویرے جو کل آنکھ میری کھلی
عجب تھی بہار اور عجب سیر تھی
(سویرے اُٹھنا)

۲۔ بس اُٹھ بیٹھو بیٹا بہت سو چکے
بہت وقت بے کار تم کھو چکے
(سورج کے فائدے)

۳۔ سنا ہے کہ لڑکا تھا اِک ہونہار
بہت اِس کو ماں باپ کرتے تھے پیار
( سچائی)

۴۔ عنایت کا اُس کی بیاں کیا کریں
عجب نعمتیں اُس نے بخشی ہمیں
(خدا کی شکر گزاری)

۵۔ مسافر غریب ایک رستے میں تھا
وہ چوروں کے ہاتھوں میں جاکر پھنسا
(ہمدردی)​

لیجیے اب آپ ​

دُڑم دُم، دُڑم دُم ، دُڑم دُم ، دُڑم​

کی بحر میں غزل یا نظم کہنے کے لیے تیار ہیں۔ شرط صرف یہ ہے کہ آپ اسے اِس بحر میں مترنم پڑھ سکیں۔

اسی طرح اب آپ اپنی پسندیدہ شاعرہ پروین شاکر کی یہ غزل نکالیے اور اسے تحت اللفظ پڑھ جائیے۔​

کو بہ کو پھیل گئی بات شناسائی کی
اُس نے خوشبو کی طرح میری پذیرائی کی​

اب اسے مہدی حسن کے خوبصورت فلمی گیت​

آنکھ سے دور سہی ، دِل سے کہاں جائے گا
جانے والے تو ہمیں یاد بہت آئے گا​

کی طرز میں مترنم پڑھئیے۔ اب اسی بحر کی مشق کیجیے اور کچھ اشعار کہنے کی کوشش کریں۔ امید ہے کامیابی آپ کے قدم چومے گی۔

ہم نے بھی جب لتا منگیشکر کا یہ گانا سنا​

ستمگر مجھے بے وفا جانتا ہے
مرے دِل کی حالت خدا جانتا ہے​

تو ہم جھوم جھوم اُٹھے اور اسی وجد کت عالم میں داغ کی یہ غزل گنگنانے لگے​

پھرے راہ سے وہ یہاں آتے آتے
اجل مر رہی تو کہاں آتے آتے​

فوراً ہی ہم پر اشعار کا نزول ہونے لگا اور پہلے ہم نے اپنے انگریزی داں بچوں کے لیے کمپوز کی اور آخرِ کار اسی بحر میں ایک سنجیدہ غزل کہنے پر مجبور ہوگئے۔​

ہوئے آج گم جسم و جاں آتے آتے
یہ حالت ہوئی کب یہاں آتے آتے​

امید ہے آپ بھی اسی بحر میں ایک عدد دوغزلہ یا سہہ غزلہ کہنے پر مجبور ہوجائیں گے۔

مندرجہ بالا تمام بحث کے بعد، کیا اب اس بات کی ضرورت باقی رہ جاتی ہے کہ آپ​

فاعلاتُن، فاعلاتُن، فاعلات
ایک تھپڑ، ایک گھونسا ایک لات​

وغیرہ کی طرف توجہ دیں۔ نوٹ کیجیے کہ انھی فلمی گیتوں کو استعمال کرتے ہوئے ہمارے پیارے نعت خواں حضرات نے کیا غضب کی نعتیں پڑھی ہیں۔ کچھ ستم ظریفوں نے تو ذکر کو بھی بیٹ کے طور پر استعمال کرکے نعت خوانی کی ایک نئی جہت دریافت کی ہے۔

آپ ہماری اِن باتوں پر غور کیجیے ، نت نئی بحروں میں فلمی گیتوں پر غزلیں کہیے، مشاعروں میں مترنم پیش کیجیے اور مشاعرے لُوٹیے، اور ہم چلے ، اِس سے پہلے کہ محفل میں اساتذہ تشریف لے آئیں اور ہم سے فارغ خطی لکھوالیں۔ اللہ ہمارا حامی و ناصر ہو۔​

رسید حاضر۔ تبصرہ فرصت میں پڑھنے کے بعد

 

[جیہ]

ایک سنجیدہ تحریر جسے جناب یوسف-2 کے تبصرے نے مزاحیہ بنا دیا

 

[محمد علم اللہ]

یہ دھاگہ ہم سے کیوں چھپا کے رکھا تھا چاچو
اتنا بڑھیا دھاگہ۔۔۔۔
اللہ آپ کو سلامت رکھے۔۔۔۔

 

[ابن رضا]

جنابِ محمد خلیل الرحمٰن صاحب، آج آپکی لڑی نظر سے گزری اور کافی دلچسپ اور معلوماتی لگی ۔تو سوچا ایک ادھ مشورہ شامل کردوں اگر ناگوارِ خاطرہو تو پیشگی معذرت۔ وہ یہ کہ شاعر ی سیکھنے کا جو ربط آپ نو واردوں کو حوالہ کرتے ہیں ، اس کے ساتھ ساتھ ایک گزارش یہ بھی ہے کی جب کوئی ان تجاویز و ہدایات پر اگر عمل کر گزرے تو وہ بیچارہ اس عمل درامد کے بعد حصول اصلاح کو حاضری تو ماہر عروضی اساتذہ کے دربار میں ہی لگواتا ہے اور اساتذہ بھی اس بات سے نابلد ہوتے ہیں کے موصوف نے یہ کاوش علم ِ عروض و قافیہ کےتحت فرمائی ہے یا فنِ موسیقی اور آپکی تجاویز کے تحت فرمائی ۔ سو اس کی جو خبر گیری ہوتی ہے اس سے آپ بخوبی آشنا ہیں۔ اس لیے میرا مشورہ یہ ہےکہ اصلاح کے لیے اپنی ایک لڑی بھی متعارف کرایں تا کہ مشق جوئی کے بعد آپ ہی سے اصلاح بھی لی جا سکے اور خوش باش رہا جا سکے۔

 

[گل زیب انجم]

ماموں سسر، خالہ ساس، ساسو ماں تو پہلے بھی سُن رکھے ہیں لیکن نانا ماموں پہلی دفعہ پڑھا ہے۔[/QUOTE
خلیل الرحمن صاحب ماشاءاللہ بہت اچھا بنیادی قاعدہ پڑھنےکو ملا۔دُڑم دُم کی پریکٹس کر ہی رہے تھے کہ روم میٹ نے تیوری چڑھاتے ہوئے کہا اے آر رحمن نہ بنیے اور آپکی اطلاع کے لیے عرض ہے کہ دُڑم دُم نہیں تارا رم پم پم پم پم مست مست او ہمدم بن تیرے ۔۔۔۔۔۔کہتا ہے۔
المختصر ریہرسل کے طور پر پہلی سعی ناکافی سہی کی ضرور ہے۔
ہم نے جواب سے نوازتے ہوئے کہا جوابا" عرض ہے کہ یہ دُھن ایم کے رحٰمن کی ہے۔کچھ سوچتے ہوئے کہنے لگا یہ تیرا چاچا کون ہے ۔میں نے کہا چاچا نہیں میرے اُستاد ہیں۔اور ان کا اسم گرامی ہے محمد خلیل الرحمن ۔
ابن سعد ،فاتح صاحب، محمد وارث،محمد بلال عظیم ،یوسف ثانی ،محمد احمد اور شمشاد صابان کے بڑے پیارے مکالمات پڑھنے کوملے۔خاص کر شمشاد بھائی کا نانا ماموں پر سوال کافی لطف اندوز تھا ۔۔

 

[گل زیب انجم]

خلیل الرحمن صاحب ماشاءاللہ بہت اچھا بنیادی قاعدہ پڑھنےکو ملا۔دُڑم دُم کی پریکٹس کر ہی رہے تھے کہ روم میٹ نے تیوری چڑھاتے ہوئے کہا اے آر رحمن نہ بنیے اور آپکی اطلاع کے لیے عرض ہے کہ دُڑم دُم نہیں تارا رم پم پم پم پم مست مست او ہمدم بن تیرے ۔۔۔۔۔۔کہتا ہے۔
المختصر ریہرسل کے طور پر پہلی سعی ناکافی سہی کی ضرور ہے۔
ہم نے جواب سے نوازتے ہوئے کہا جوابا" عرض ہے کہ یہ دُھن ایم کے رحٰمن کی ہے۔کچھ سوچتے ہوئے کہنے لگا یہ تیرا چاچا کون ہے ۔میں نے کہا چاچا نہیں میرے اُستاد ہیں۔اور ان کا اسم گرامی ہے محمد خلیل الرحمن ۔
ابن سعد ،فاتح صاحب، محمد وارث،محمد بلال عظیم ،یوسف ثانی ،محمد احمد اور شمشاد صابان کے بڑے پیارے مکالمات پڑھنے کوملے۔خاص کر شمشاد بھائی کا نانا ماموں پر سوال کافی لطف اندوز تھا ۔۔

 

[فرحان عباس]

بہت خوب!

 

[محمد خلیل الرحمٰن]

جنابِ محمد خلیل الرحمٰن صاحب، آج آپکی لڑی نظر سے گزری اور کافی دلچسپ اور معلوماتی لگی ۔تو سوچا ایک ادھ مشورہ شامل کردوں اگر ناگوارِ خاطرہو تو پیشگی معذرت۔ وہ یہ کہ شاعر ی سیکھنے کا جو ربط آپ نو واردوں کو حوالہ کرتے ہیں ، اس کے ساتھ ساتھ ایک گزارش یہ بھی ہے کی جب کوئی ان تجاویز و ہدایات پر اگر عمل کر گزرے تو وہ بیچارہ اس عمل درامد کے بعد حصول اصلاح کو حاضری تو ماہر عروضی اساتذہ کے دربار میں ہی لگواتا ہے اور اساتذہ بھی اس بات سے نابلد ہوتے ہیں کے موصوف نے یہ کاوش علم ِ عروض و قافیہ کےتحت فرمائی ہے یا فنِ موسیقی اور آپکی تجاویز کے تحت فرمائی ۔ سو اس کی جو خبر گیری ہوتی ہے اس سے آپ بخوبی آشنا ہیں۔ اس لیے میرا مشورہ یہ ہےکہ اصلاح کے لیے اپنی ایک لڑی بھی متعارف کرایں تا کہ مشق جوئی کے بعد آپ ہی سے اصلاح بھی لی جا سکے اور خوش باش رہا جا سکے۔

اب اتنی زیادتی بھی نہ فرمائیں حضرت!

ہمارے اس فارمولے پر عمل کرنے سے جو شے وجود میں آئے گی وہ یقینا شعر ہی ہوگا ، مزید یہ کہ وزن میں بھی ہوگا، لہٰذا اس پر آپ کے عروضی نشتر خوب چلیں گے۔ ’’علمِ عروض و قافیہ‘‘ سے ماورا کوئی شے تو نہیں بنے گی نا؟

 

[ابن رضا]

اب اتنی زیادتی بھی نہ فرمائیں حضرت!

ہمارے اس فارمولے پر عمل کرنے سے جو شے وجود میں آئے گی وہ یقینا شعر ہی ہوگا ، مزید یہ کہ وزن میں بھی ہوگا، لہٰذا اس پر آپ کے عروضی نشتر خوب چلیں گے۔ ’’علمِ عروض و قافیہ‘‘ سے ماورا کوئی شے تو نہیں بنے گی نا؟

قبلہ ہم ایسی جسارت کاہے کریں گے۔ تاہم سوا سال قبل پوسٹ کیے گئے مراسلے میں ہمارا موقف یہ تھا اور اب بھی ہم اسی پر قائم ہیں کہ شاعری بھی دیگر علوم و فنون کی طرح ہے اور اس کے شائق مبتدی حضرات بھی عموما" تعلیم یافتہ ہیں جو مطالعہ اور مشاہدہ سے خاص لگاو اور رغبت رکھتے ہیں۔ تو ان کو بجائے "دڑم دم" کے چکر میں ڈالنے کے ، مروجہ قاعدے کے مطابق رہنمائی فراہم کرنی چاہیے تاکہ وہ کسی استاد کی خدمت میں حاضر ہو کر فاعلاتن کی بات کریں ، وصالِ الف دیکھیں، اخفا اشباع دیکھیں نہ کہ دڑم دم کی بات کریں ۔تو ہی ان کی دال گلے گی ورنہ استاد جی ناراض بھی ہو سکتے ہیں

 

[گل زیب انجم]

اب اتنی زیادتی بھی نہ فرمائیں حضرت!

ہمارے اس فارمولے پر عمل کرنے سے جو شے وجود میں آئے گی وہ یقینا شعر ہی ہوگا ، مزید یہ کہ وزن میں بھی ہوگا، لہٰذا اس پر آپ کے عروضی نشتر خوب چلیں گے۔ ’’علمِ عروض و قافیہ‘‘ سے ماورا کوئی شے تو نہیں بنے گی نا؟

آپ کا حکم سر آنکھوں پر

 

[آوازِ دوست]

اب ذرا حفیظ جالندھری کی نظم ’’ جھوٹا گواہ‘‘ نکالیے اور آخری شعر پڑھیے۔​

دُڑم دُم، دُڑم دُم، دُڑم دُم ،دُڑمتُڑم تُم، تُڑم تُم، تُڑم تُم، تُڑم​

یہ شعر ہے یا جنات کو قابو میں لانے کے عملیات کا کوئی حصہ؟ ہو سکتا ہے حفیظ جالندھری نے یہ شعرجھوٹے گواہ کی سزا کے طور پر ایجاد کیا ہو کہ چلو بچو! پڑھو یہ شعر پانچ سو بار اور لو مزا جھوٹی گواہی کا یہ واقعی شعر ہے ؟