شعر و شاعر (اشعار اور خالق)
- صاحب لڑی طارق شاہ
- تاریخ ابتداء
-
- ٹیگ
- شعر و شاعر ، طارق شاہ
طارق شاہ
محفلین
تیرے دِیوار و دَر کے سایوں پر
مجھ کو ہوتا ہے سانپ کا دھوکہ
بُوٹا بُوٹا ہے سانپ کی تصوِیر!
پتّا پتّا ہے سانپ کا ٹیکہ
آسماں جیسے سانپ کی کنڈلی!
تارا تارا ہے سانپ کا منکا
آرہی ہے لکِیر سانپوں کی
ہر گلی پر ہے سانپ کا پہرا
سانپ ہی سانپ مَیں جِدھر دیکھوں
شہر تیرا تو گڑ ھ ہے سانپوں کا
تیرے گھر کی طرف سے میری طرف
بڑھتا آتا ہے ایک سایا سا
دُھوپ سا رنگ، برق سی رفتار
جسم شاخِ نبات سا پَتلا
پُھول سا پھن، چراغ سی آنکھیں
یہ تو راجا ہے کوئی سانپوں کا
ہاں مِری آستیں کا سانپ ہے یہ
کیوں نہ ہو مجھ کو جان سے پیارا
ناصؔر کاظمی
طارق شاہ
محفلین
پی، فو، جن
اُس کے ریشمی پھرن کی سر سر ، اَب خاموش ہے
مر مر کی پگڈنڈی دُھول سے اَٹی ہُوئی ہے
اُس کا خالی کمرہ کتنا ٹھنڈا ، اورسُونا ہے
دروازوں پر گِرے ہُوئے پتّوں کے ڈھیر لگے ہیں
اُس سُندری کے دھیان میں بیٹھے
مَیں اپنے دُکھیارے من کی کیسے دِھیر بندھاؤں
ناصؔر کاظمی
(منظوم ترجمۂ نظم: وی تی )