غم حسین علیہ السلام پر اشعار

[محمد تابش صدیقی]

دینِ ہدیٰ پہ اپنا بھرا گھر لٹا دیا
ہمت یہ دیکھنا ذرا شاہوں کے شاہ کی

وہ داستاں کہ سنگ کا دل پاش پاش ہو
وہ واقعہ کہ جس نے سنا دل سے آہ کی

اپنی نہ اہلِ بیت کی پرواہ کی ذرا
پرواہ کی تو عشقِ رسالت پناہؐ کی

خونیں ردا حسینؓ کی فطرت اب اوڑھ کر
چہرہ نما شفق میں ہے شام و پگاہ کی

یہ داستانِ شاہِ شہیدانِ کربلا
تفسیرِ بے نظیر بھی ہے لا الٰہ کی​

 

[سید عاطف علی]

شاہ است حسین پادشاہ است حسین
دین است حسین دیں پناہ است حسین
سر داد ، نہ داد دست در دست یزید
حقا ،،، کہ بنائے لا الہ است حسین
(معین الدین چشتی )

 

[مریم افتخار]

ذکرِ حسین آیا تو آنکھیں چھلک پڑیں
پانی کو کتنا پیار ہے اب بھی حسین سے

 

[ابوعبید]

اصغر جگر کوتھام کے روتی ہے فوج شام
تم تیر کھا کے آئے ہویاتیر مار کے

قمر جلالوی کا شعر ہے

 

[محمد عدنان اکبری نقیبی]

جدھر جدھر اٹھے نظر حسینؓ ہی حسینؓ ہے
شجر شجر قمر قمر حسینؓ ہی حسینؓ ہے
"نماز" کو "اذان" کو "رسول کے بیان" کو
کیا ہے جس کو معتبر حسینؓ ہی حسینؓ ہے

 

[محمد عدنان اکبری نقیبی]

چمکا ہے یوں کربلا میں زہرا کا ماہتاب
تاریخ ڈھونڈ پائی نا اس کا کوئی جواب
شبیر اپنے خون سے جو تحریر کرگئے
دیکھی گئی جہاں میں نا ایسی کوئی کتاب

 

[اکمل زیدی]

انسان کو بیدار تو ہو لینے دو-ہر قوم پکارے گی ہمارے ہیں حسین

 

[اکمل زیدی]

قتل حسین اصل میں مرگ یزید ہے
اسلام زندہ ہوتا ہے ہر کربلا کے بعد

 

[اکمل زیدی]

شاعر کسی خیال کا ہو یا کوئی ادیب
واعظ کسی دیار کا ہو یا کوئی خطیب
تاریخ بولتا ہے جہاں کوئی خوش نصیب
اس طرح بات کرتا ہے احساس کا نقیب

دیکھو تو سلسلہ ادب مشرقین کا
دنیا کی ہر زباں پہ قبضہ حسین کا

 

[محمد تابش صدیقی]

مصافِ حق کا وہ دلدوز منظر
شہیدِ راہِ حق اللہ اکبر

کیا جامِ شہادت نوشِ جاں اف
جو پیاسے تین دن سے تھے برابر

انہیں پانی کی حاجت بھی کہاں تھی
لگا ہونٹوں سے تھا جب جامِ کوثر

سلامِ خادمانہ سب کا پہنچے
محمدؐ اور آلِ مصطفیٰ پر​

 

[محمد تابش صدیقی]

مناقبِ حضرت امام حسینؓ: نذرِ امام حسینؓ
محمد عبد الحمید صدیقی نظرؔ لکھنوی

 

[محمد عدنان اکبری نقیبی]

سر کٹ گیا زبان سے تلاوت نہیں رکی
قرآن سے حسین کا رشتہ عجیب ہے

 

[وجاہت حسین]

جب عاشوراء کی شامِ ناشاد آئی
لکھ مرثیہ! یہ دل سے فریاد آئی
پر ایک قدم بھی یہ قلم چل نہ سکا
جب زین العابدینؑ کی یاد آئی

وجاہت حسین​

 

[سردار محمد نعیم]

سلطانِ کربلا کو ہمارا سلام ہو۔۔
جانانِ مصطفیٰ ﷺ کو ہمارا سلام ہو۔۔

عباسِ نامدار ہیں زخموں سے چُور چُور،
اُس پیکرِ رِضا کو ہمارا سلام ہو۔۔

اکبر سے نوجوان بھی رن میں ہوئے شهید،
ہم شکلِ مصطفیٰ ﷺ کو ہمارا سلام ہو۔۔

بھائی بھتیجے بھانجے سب ہو گئے شہید،
ہر لالِ بےبہا کو ہمارا سلام ہو۔۔

اصغر کی ننھی جان پہ لاکھوں درود ہوں،
مظلوم و بے خطا کو ہمارا سلام ہو۔۔

ہو کر شہید قوم کی کشتی تیرا گئے،
اُمت کے ناخُدا کو ہمارا سلام ہو۔۔

ناصر ؔ ولائے شاہ میں کہتا ہے بار بار،
مہمانِ کربلا کو ہمارا سلام ہو۔۔

 

[محمد حسن شہزادہ]

خدا تجھے عشق مصطفیٰﷺ سے سرفراز کرے

غم حسینؓ کے سوا ہر غم سے بے نیاز کرے

شہزادہ ڈاکٹر غلام محمد گوہر نظیر گوہر ؔ
جمال الملک ولی عہد دربار عالیہ موہڑہ شریف
ماخوذ۔ رگِ جاں

 

[محمد حسن شہزادہ]

لباس ھے پھٹا ھوا، غُبار میں اَٹا ھوا
تمام جسمِ نارنیں، چِھدا ھوا، کَٹا ھوا
یہ کون زِی وقار ھے، بَلا کا شہسوار ھے
کہ ھے ہزار قاتلوں، کے سامنے ڈَٹا ھوا
یہ بِل یقین حُسین ھے، نبی کا نُورِعین ھے

 

[فاخر رضا]

یزید تھا
حسین ہے

 

[سیدہ شگفتہ]

اصغر نے گلا تیر کے آگے جو رکھا ہے
کیا دیکھ لیا اس نے کہ اس زد پہ خدا ہے

 

[سیدہ شگفتہ]

تا قیامت قطع استبداد کرد
موج خون او چمن ایجاد کرد

 

[سیدہ شگفتہ]

قید خانے میں کہیں مر ہی نہ جاؤں بابا
تیری فرقت میں یونہی آنسو بہاؤں بابا

آ بھی جاؤ کہ سکینہ کا دم رخصت ہے
چند سانسوں کی ملی بابا مجھے مہلت ہے
تیرے رستے میں سدا آنکھیں بچھاؤں بابا
قید خانے میں کہیں مر ہی نہ جاؤں بابا

اپنے چہرے کے طمانچوں کو میں کیسے دیکھوں
خون روتے ہوئے بھائی کو میں کیسے دیکھوں
دل بھی زخمی ہے تجھے کیسے دکھاؤں بابا
قید خانے میں کہیں مر ہی نہ جاؤں بابا