محبت کے موضوع پر اشعار!

[شمشاد]

ابھی نہ چھیڑ محبت کے گیت اے مطرب
ابھی حیات کا ماحول خوشگوار نہیں
(ساحر لدھیانوی)

 

[عمر سیف]

گزاری اس طرح عمر محبت ہم نے دھوکے میں
وہ مجھ کو باوفا سمجھے، میں اُن کو باوفا سمجھا

 

[شمشاد]

تجھ سے ملنا تو اب خواب سا لگتا ہے
میں نے تیرے انتظار سے محبت کی ہے

 

[عمر سیف]

تیرے لبوں سے محبت کے قصے سنتے ہیں تو بہت روتے ہیں
اپنے ہاتھوں پہ تیرا ہاتھ دیکھتے ہیں تو بہت روتے ہیں
نجانے تُو اجنبی ہو گیا ہے یا ہمارے ہاتھ کی انگلیاں
کہ گیلی ریت پہ تیرا نام لکھتے ہیں تو بہت روتے ہیں

 

[شمشاد]

تو میرے پاس نہیں ہے پھر بھی
تیری یاد سے محبت کی ہے

 

[عمر سیف]

ہمارے عہدِ محبت سے کیا رہا باقی
اداس کرنے کو بس ایک نام باقی ہے

 

[محمد وارث]

نہ کہہ کسی سے کہ غالب نہیں زمانے میں
حریف رازِ محبت مگر در و دیوار

 

[شمشاد]

آ کہ کچھ دل کی سن سنا لیں ہم
آ محبت کے گیت گا لیں ہم
(فیض)

 

[سارہ خان]

محبّت حادثہ ہے
حادثے سے بچ نکلنے کی،
کوئی تدبیر کر لو اس سے پہلے خواب ہو جاؤ
جسے ہم حادثہ کہتے ہیں
جیون کو گھڑی بھر میں
مٹا کر خاک کرتا ہے
کوئی الزام دھرتا ہے
کبھی معذوریوں کے جال میں قیدی،
بنا کر چھوڑ دیتا ہے
یہ بندھن توڑ دیتا ہے
محبّت حادثہ ہے
حادثے سے بچ نکلنے کی،
کوئی تدبیر کر لو،
اس سے پہلے خواب ہو جاؤ​

 

[شمشاد]

اور جو خواب ہو چکے وہ اب کیا کریں؟

 

[عیشل]

میری روح میں جو اُتر سکیں وہ محبیتیں مجھے چاہیئں
جو سراب ہوں نہ عذاب ہوں وہ رفاقتیں مجھے چاہیئں
انہی ساعتوں کی تلاش ہے جو کلینڈروں سے اُتر گیئں
جو سمے کے ساتھ گذر گیئں وہی فرصتیں مجھے چاہیئں

 

[شمشاد]

اے دل یہی آنسو تو ہیں سوغاتِ محبت
نادان، علاجِ غمِ پنہاں نہیں کرتے
(سرور عالم راز سرور)

 

[عیشل]

تتلی تتلی لہراتے ہیں پھولوں کی امید لیئے
اک دن خوشبو ہو جاتے ہیں لوگ محبت کرنے والے

 

[شمشاد]

منزلِ عشق میں پہلا ہی قدم ہے شائد
ورنہ آدابِ محبت سے گریزاں کیوں ہو
(سرور عالم راز سرور)

 

[عمر سیف]

تمہارا نام میں لکھتا ہوں کاغذ پر
دیکھتا ہوں ، سوچتا ہوں
وہ کاغذ پھاڑ دیتا ہوں
پھر اُن کاغذ کے ٹُکڑوں کو
مُٹّھی میں بھینچتا ہوں
پھینک دیتا ہوں
وہیں پر بیٹھ کر لڑتا ہوں خود سے
وہی کاغذ اُٹھاتا ہوں
آنکھوں سے لگاتا ہوں
پھر اپنے پاس رکھے پانی کے پیالے میں
وہ کاغذ ڈال دیتا ہوں
میں تُم کو سوچتا ہوں
پھر اُس پانی کو
تعویذِ محبت جان کر پی لیتا ہوں ۔۔

 

[عیشل]

اظہار کی ضرورت نہ تمہیں تھی نہ ہمیں ہے
یہ سچ ہے محبت نہ تمہیں تھی نہ ہمیں ہے
اب سوچ رہے ہیں کہ رستہ ہی بدل دیں
منظور رفاقت نہ تمہیں تھی نہ ہمیں ہے

 

[عمر سیف]

وہی محسوس کرتے ہیں خلش دردِ محبت کی
جو اپنے آپ سے بڑھ کر کسی سے پیار کرتے ہیں

 

[عیشل]

نہ ملتا نقدِ جاں دے کر بھی اک لمحہ محبت کا
گراں تھا اس قدر سودا کہ ہم بازار چھوڑ آئے

 

[عمر سیف]

محبت کی کہانی منفرد تھی
مگر دنیا نے دہرائی بہت ہے

 

[شمشاد]

آہ بے چارگی محبت کی
زندگی میں بھی زندگی نہ رہی
(سرور عالم راز سرور)