محبت کے موضوع پر اشعار!

[شمشاد]

اِک پشیمان سی حسرت مُجھے سوچتا ہے
اب وُہی شہر محبت سے مُجھے سوچتا ہے
(نوشی گیلانی)

 

[عمر سیف]

جلا رہا ہوں خود اپنے لہو سے دل کے چراغ
نہ جانے کتنی محبت ہے روشنی سے مجھے

 

[شمشاد]

ہم تری محبت کے جُگنوؤں کی آمد پر
تِتلیوں کے رنگوں سے راستے سجائیں گے
(نوشی گیلانی)

 

[ہما]

مُحبت کے حوالوں میں ۔
کِسی بے درد حالوں میں
کُچھ ہو گیا شامل
کہ جیوں ہے سوالوں میں
ہما!

 

[شمشاد]

آخری مصرعے میں “ جیون “ ہو گا نہ کہ “ جیوں “

 

[شمشاد]

میں تیرِگی میں محبّت کی اِک کہانی ہوں
کوئی چراغ سا عنوان مری تلاش میں ہے
(نوشی گیلانی)

 

[عمر سیف]

شمشاد اوپر دوسرے مصرعے میں لفظ ‘ موئی ‘ کی بجائے ‘ کوئی‘ ہونا چاہئے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔

مرتے تو شہیدانِ محبت بھی ہیں امجد
جاتے ہیں مگر سوئے عدم اور طرح سے

 

[محمد وارث]

انجام ہوا اپنا آغازِ محبت میں
اس شغل کو جاں فرسا ایسا تو نہ تھا جانا

میر مہدی مجروح

 

[عمر سیف]

محبتوں کی سزا بےمثال دی اس نے
اُداس رہنے کی عادت سی ڈال دی اس نے

 

[شمشاد]

مژگاں کی محبت میں جو انگشت نما ہوں
لگتی ہے مجھے تیر کے مانند ہر انگشت
(غالب)

 

[شمشاد]

شمشاد اوپر دوسرے مصرعے میں لفظ ‘ موئی ‘ کی بجائے ‘ کوئی‘ ہونا چاہئے۔

شکریہ ضبط، میں نے تصحیح کر دی ہے۔ ٹائپو تھی۔

 

[عمر سیف]

اس کی ہر سوچ کا محور ہے محبت میری
یہ الگ بات ہے کہ وہ کبھی میرا نہ ہوا

 

[شمشاد]

اب محبت سے ہوگئی نفرت
تُو ملا گر تو زہر کھالوں گا
(احمد فواد)

 

[عیشل]

کبھی ویران رستوں پر
کوئی انجان سی دستک
اگر تم کو سنائی دے
صدا کی شکل میں آکر کہے
محبت نام ہے میرا
پلٹ کر دیکھنا مت تم
کہ اس کارِ محبت میں
اذیت ہی اذیت ہے!!!

 

[شمشاد]

تو کہ ناواقفِ محبت ہے
تو محبت کا کیا صلہ دے گا
(احمد فواد)

 

[عمر سیف]

آگ ہی آگ ہے دیکھو تو محبت میں
مار ڈالے نا یہ جذبوں کی فراوانی بھی

 

[شمشاد]

میں حیرت و حسرت کا مارا خاموش کھڑا ہوں ساحل پر
دریائے محبت کہتا ہے آ کچھ بھی نہیں پایاب ہیں ہم
(شاد عظیم آبادی)

 

[عمر سیف]

تیرے لبوں سے محبت کے قصے سنتے ہیں تو بہت روتے ہیں
اپنے ہاتھوں پہ تیرا ہاتھ دیکھتے ہیں تو بہت روتے ہیں
نجانے تُو اجنبی ہو گیا ہے یا ہمارے ہاتھ کی انگلیاں
کہ گیلی ریت پہ تیرا نام لکھتے ہیں تو بہت روتے ہیں

 

[شمشاد]

وارستہ اس سے ہیں کہ محبت ہی کیوں نہ ہو
کیجے ہمارے ساتھ عداوت ہی کیوں نہ ہو
(غالب)

 

[نوید صادق]

دل کہ ہر بار محبت سے لہو ہوتا ہے
دل کو ہر بار یہی کارِ زیاں کھینچتا ہے

شاعر: خالد علیم