جوش منتخب رباعیات

[حسان خان]

مے علم کی پینا ہی نہ آیا اب تک​

ساحل پہ سفینہ ہی نہ آیا اب تک​

اک نوچ کھسوٹ ہے خوشی کی باہم​

انسان کو جینا ہی نہ آیا اب تک​

 

[حسان خان]

انصاف! بتوں کی چاہ دینے والے​

حُسن اُن کو، مجھے نگاہ دینے والے​

کس منہ سے مجھے حشر میں دے گا تعزیر​

دل کو ہوسِ گناہ دینے والے​

 

[حسان خان]

ہر دعوائے ارتقا کو مانا میں نے​

ہر گوشۂ کائنات چھانا میں نے​

سب جان چکا تو اے حریفِ دمساز​

میں کچھ نہیں جانتا، یہ جانا میں نے​

 

[حسان خان]

جس وقت جھلکتی ہے مناظر کی جبیں​

راسخ ہوتا ہے ذاتِ باری کا یقیں​

کرتا ہوں جب انسان کی تباہی پہ نظر​

دل پوچھنے لگتا ہے، 'خدا ہے کہ نہیں؟'​

 

[حسان خان]

جس چال سے بڑھ رہی ہے فوجِ برہان​

اوہام کا قطعہ ہو رہا ہے ویران​

جتنا انسان بن رہا ہے اللہ​

اللہ اتنا ہی بن رہا ہے انسان​

 

[حسان خان]

الفاظ ہیں ناگن سی جوانی کے ڈسے​

انفاس مہکتے ہوئے ہونٹوں میں بسے​

یوں دل کو جگا رہا ہے تیرا لہجہ​

جس طرح ستار کے کوئی تار کسے​

 

[حسان خان]

جانے والے قمر کو روکے کوئی​

شب کے پیکِ سفر کو روکے کوئی​

تھک کے مرے زانو پہ وہ سویا ہے ابھی​

روکے روکے سحر کو روکے کوئی​

 

[حسان خان]

اے عمرِ رواں کی رات، آہستہ گزر​

اے منظرِ کائنات، آہستہ گزر​

اک شے پہ بھی جمنے نہیں پاتی ہے نگاہ​

اے قافلۂ حیات، آہستہ گزر​

 

[حسان خان]

ہر غم مئے گلرنگ سے تھراتا ہے​

آلامِ جہاں کا منہ اتر جاتا ہے​

لیکن جسے کہتے ہیں غمِ عشق اے جوش​

وہ نشے میں کچھ اور بھی بڑھ جاتا ہے​

 

[حسان خان]

یہ سلسلۂ لامتناہی ہے کہ زلف؟​

گہوارۂ بادِ صبحگاہی ہے کہ زلف؟​

اے جانِ شباب دوشِ سیمیں پہ تری​

دھنکی ہوئی رات کی سیاہی ہے کہ زلف؟​

 

[حسان خان]

کیا شیخ کی خشک زندگانی گزری​

بے چارے کی اک شب نہ سہانی گزری​

دوزخ کے تخیل میں بڑھاپا بیتا​

جنت کی دعاؤں میں جوانی گزری​

 

[حسان خان]

غالب ہے مرا جذبۂ غیرت مجھ پر​

اک قہر ہے ناقصوں کی صولت مجھ پر​

زاہد اگر آج مے کو جائز کر دے​

اک قطرہ بھی پھر پی جاؤں تو لعنت مجھ پر​

 

[حسان خان]

بگڑی ہوئی عقل سے حماقت بہتر​

دھوکے کی محبت سے عداوت بہتر​

شیطان و ابو جہل کی عظمت کی قسم​

سو بار غلامی سے بغاوت بہتر​

 

[حسان خان]

کل موتیوں کو رول دیا ساقی نے​

سونے میں مجھے تول دیا ساقی نے​

یہ سن کے کہ کھلتا نہیں مقصودِ حیات​

میخانے کا در کھول دیا ساقی نے​

 

[حسان خان]

کیا شیخ ملے گا گلفشانی کر کے​

کیا پائے گا توہینِ جوانی کر کے​

تو آتشِ دوزخ سے ڈراتا ہے انہیں​

جو آگ کو پی جاتے ہیں پانی کر کے​

 

[حسان خان]

مرنے پہ نویدِ جاں ملے نہ ملے​

یہ کنج، یہ بوستاں، ملے نہ ملے​

پینے میں کسر نہ چھوڑ اے خانہ خراب​

معلوم نہیں وہاں ملے نہ ملے​

 

[حسان خان]

ہم دونوں ہیں اے فقیہ! دیوانے سے​

مطلب ہے فقط دل کے بہل جانے سے​

ہر شام و سحر کرتے ہیں عیاشی ہم​

تو ظرفِ وضو سے اور میں پیمانے سے​

 

[حسان خان]

مرضی ہو تو سولی پہ چڑھانا یا رب​

سو بار جہنم میں جلانا یا رب​

معشوق کہے 'آپ ہمارے ہیں بزرگ'​

ناچیز کو یہ دن نہ دکھانا یا رب​

 

[حسان خان]

دن ہوتے نہ زر رو، نہ راتیں ہی سیاہ​

بھولے سے بھی اک لب پہ نہ آتی کبھی آہ​

انسان کے دل کو نہ چھو سکتے آلام​

میرا سا اگر شفیق ہوتا اللہ​

 

[حسان خان]

تقدیر کی یہ دروغ بافی، افسوس!​

برتاؤ یہ رحمت کے منافی، افسوس!​

فاقے کا شکار ہیں کروڑوں بندے​

اللہ کی یہ وعدہ خلافی، افسوس!​