جوش منتخب رباعیات

[حسان خان]

افکار کے رخسار پہ عالی نسبی​

کردار کے آئینے میں یہ تابِ جلی​

لہجے پہ ہے بنیادِ نظامِ آفاق​

اللہ رے آوازِ رسولِ عربی​

 

[حسان خان]

چھائی نہ کسی دھوپ میں رخ پر زردی​

دوڑائی شعاؤں کے جگر میں سردی​

حیران ہے جرأتِ مسیح و سقراط​

واللہ کہ اے حُسین کارے کردی​

 

[حسان خان]

کیا مجھ کو خبر نزاعِ مشرب کیا ہے​

مردود ہے کیا بلا، مقرّب کیا ہے​

شاعر تو ہے خالقِ مذاہب اے دوست​

شاعر سے نہ پوچھ تیرا مذہب کیا ہے​

 

[حسان خان]

عقلوں سے جدا، غلاف کرتا ہوں میں​

ذہنِ انساں کو صاف کرتا ہوں میں​

کیا مجھ کو پکارتا ہے کعبے کی طرف​

ہر سانس میں سو طواف کرتا ہوں میں​

 

[حسان خان]

اے شیخ! نہ مجھ سے پوچھ حالت میری​

دنیا سے نرالی ہے طبیعت میری​

تشویشِ ممات ہے تری صوم و صلوۃ​

تعمیرِ حیات ہے عبادت میری​

 

[حسان خان]

مجھ کو انعامِ حق پناہی دے گا​

میری نیت کو تاجِ شاہی دے گا​

مومن کا نہیں، نبی کا دل رکھتا ہوں​

اللہ سے پوچھو، وہ گواہی دے گا​

 

[حسان خان]

ہر آن کی یہ سینہ زنی کیسی ہے​

ہر سانس میں غلطاں یہ انی کیسی ہے​

اپنے گھر میں ہوں، اجنبی کے مانند​

مولیٰ، یہ غریب الوطنی کیسی ہے​

 

[حسان خان]

پہلو میں مرے دیدۂ پرنم ہے کہ دل​

معبود! یہ مقیاسِ تپِ غم ہے کہ دل​

ہو ذرہ بھی کج تو بال پڑ جاتا ہے​

یہ شیشۂ ناموسِ دو عالم ہے کہ دل​

 

[حسان خان]

مبنی تیرا حدیث و آیات پہ دین​

میں، شہرِ تامل و تفکر کا مکین​

تو، شیفتۂ نطقِ رسالت۔۔۔ اور میں​

حرف ناگفتۂ نبوت کا امیں​

 

[حسان خان]

آلام کو بستگانِ غم سے پوچھو​

سوز لبِ خشک و چشمِ نم سے پوچھو​

کیا پوچھ رہے ہو فقہا سے، یارو​

اللہ کی رحمتوں کو ہم سے پوچھو​

 

[حسان خان]

یہ نارِ جہنم، یہ سزا، کچھ بھی نہیں​

یہ دغدغۂ روزِ جزا، کچھ بھی نہیں​

اللہ کو قہار بتانے والو!​

اللہ تو رحمت کے سوا کچھ بھی نہیں​

 

[حسان خان]

ناداں ہے محوِ خواب، دانا بیدار​

وہ کیفِ روایات، یہ کربِ افکار​

راتوں کے سکوت میں ہے غلطاں یہ صدا​

جاگے پروردگار، سوئے سنسار​

 

[حسان خان]

کب سر پہ کسی نبی کا احسان لیا​

رازِ کونین، خود بخود، جان لیا​

انسان کا عرفان ہوا جب حاصل​

اللہ کو، ایک آن میں، پہچان لیا​

 

[حسان خان]

کس نقش میں رنگِ حی و قیوم نہیں​

موہوم ہے اس طرح کہ موہوم نہیں​

پردے میں ہے اک قوتِ اعلیٰ تو ضرور​

اس کے اوصاف کیا ہیں معلوم نہیں​

 

[حسان خان]

علّت کا، نہ معلول و قضا کا منکر​

حاشا، نہ خبر، نہ مبتدا کا منکر​

اوہام نے جس بت کو بنایا ہے خدا​

الحاد ہے صرف اس خدا کا منکر​

 

[حسان خان]

اے بارِ خدا مان چکا ہوں تجھ کو​

مانا ہی نہیں، جان چکا ہوں تجھ کو​

پھر کیوں ہے مرے فسقِ عزائم پہ مصر​

کہتا تو ہوں پہچان چکا ہوں تجھ کو​

 

[حسان خان]

مجرم ہیں ہمیں سزائیں دینے والے​

طوفان ہیں خود، سفینہ کھینے والے​

واللہ کہ اک وبا ہیں بندوں کے لیے​

ظاہر میں خدا کا نام لینے والے​

 

[حسان خان]

ہاں عشق کی انسان کو تلقین نہ کر​

اے مردِ جنوں! عقل کی تدفین نہ کر​

افکار کو کہہ رہا ہے کارِ ابلیس​

ممکن ہو تو قرآن کی توہین نہ کر​

 

[حسان خان]

دل کا ایمان کے خورشید سے مشرق ہونا​

قوتِ عقل کا فطرت کے موافق ہونا​

'راستگوئی' کی ہے دراصل یہ جامع تعریف​

نطق کا وضعِ الٰہی کے مطابق ہونا​

 

[حسان خان]

تو پیکرِ عصمت ہے پشیماں کیوں ہے؟​

وابستۂ اصطلاحِ عصیاں کیوں ہے؟​

ممکن نہیں اک سانس مشیت کے خلاف​

ہر فعل، عبادت ہے، پریشاں کیوں ہے؟​