جوش منتخب رباعیات

[حسان خان]

جودت کا گہر مہرِ مبیں سے بہتر​

حکمت کی حلاوت انگبیں سے بہتر​

عالم کا دیا ہوا گمانِ بد بھی​

جاہل کے عطا کردہ یقیں سے بہتر​

 

[حسان خان]

بہکی ہوئی دانش سے حماقت بہتر​

ناپختہ ذہانت سے عبادت بہتر​

جو راہِ طلب میں بیٹھ جائے تھک کر​

اس 'علمِ قلیل' سے جہالت بہتر​

 

[حسان خان]

اللہ رہے مورخوں کے الجھے ہوئے خواب​

ہر موجِ حدیث میں کروڑوں گرداب​

سچ کی جس پر دمک رہی ہیں مہریں​

تاریخ ہے جھوٹ کی وہ شائستہ کتاب​

 

[حسان خان]

کیا صرف مسلمان کے پیارے ہیں حسین
چرخِ نوعِ بشر کے تارے ہیں حسین
انسان کو بیدار تو ہو لینے دو
ہر قوم پکارے گی ہمارے ہیں حسین​

 

[حسان خان]

یہ رات جو گنگنا رہی ہے ساقی​

پیغامِ عروج لا رہی ہے ساقی​

کوثر پہ ہے انتظار شاید میرا​

آوازِ حُسین آ رہی ہے ساقی​

 

[حسان خان]

اٹھی، سوئے کبریا، محمد کی نگاہ​

آدم کو ملا اپنی شرافت کا گواہ​

سجدے میں قلم ہوا جو شبیر کا سر​

کج ہو گئی فرقِ نوعِ انساں پہ کلاہ​

 

[حسان خان]

کچھ پھول سے تا دور کِھلے جاتے ہیں​

کچھ سرخ علم سے ہیں کہ لہراتے ہیں​

فرقِ آدم پہ تاج رکھنے سرِ حشر​

ہٹ جاؤ فرشتو کہ حُسین آتے ہیں​

 

[حسان خان]

مقتل ہے رواں زینبِ خوددار کے ساتھ​

شورِ طوفاں ہے چشمِ خونبار کے ساتھ​

غوغائے قیامت ہے رواں سوئے یزید​

سجاد کی زنجیر کی جھنکار کے ساتھ​

 

[حسان خان]

عباس علم کھول رہے ہیں گویا​

شمشیرِ دو دم، تول رہے ہیں گویا​

زینب سرِ دربار ہیں سرگرمِ خطاب​

میداں میں علی بول رہے ہیں گویا​

 

[حسان خان]

اسرار کے در کھول رہے ہیں خاموش​

حکمت کے گہر رول رہے ہیں خاموش​

اے پیکِ محل شناس جبریلِ امیں​

اس وقت علی بول رہے ہیں خاموش​

 

[حسان خان]

کیا خوب تمنائے شہادت نہ ملے​

جنسِ علم و متاعِ جرات نہ ملے​

آنکھوں کو رطوبت تو ملے آنسو کی​

سینے کو حُسین کی حرارت نہ ملے!​

 

[حسان خان]

دنیا میں ہے بے شمار آنے والے​

آتے ہی رہیں گے روز جانے والے​

عرفانِ حیات ہو مبارک تجھ کو​

اے شدتِ غم پہ مسکرانے ولے​

 

[حسان خان]

اے بارِ الہ نوحہ سناتا پھرتا​

تا روزِ جزا اشک بہاتا پھرتا​

امداد نہ کرتے جو ترس کھا کے حسین​

اسلام ترا ٹھوکریں کھاتا پھرتا​

 

[حسان خان]

سینے پہ مرے نقشِ قدم کس کا ہے​

رندی میں یہ اجلال و حشم کس کا ہے​

زاہد مرے اس ہات کے ساغر کو نہ دیکھ​

یہ دیکھ کہ اس سر پہ علم کس کا ہے​

 

[حسان خان]

عالم ہیں ہزار یوں تو گورے، کالے​

اس پر بھی بہت شاذ ہیں حکمت والے​

پھرتی ہیں جہالتیں نہ جانے کتنی​

کاندھوں پہ عبائے علم و دانش ڈالے​

 

[حسان خان]

جس راہ پہ تو ہے، اے فقیہِ ذی جاہ​

کعبے کی طرف کبھی مڑے گی نہ وہ راہ​

تو رسمِ عبادت سے تو واقف ہے ضرور​

مقصودِ عبادت سے نہیں ہے آگاہ​

 

[حسان خان]

حق کو ہو فروغ، ہر ولی چاہتا ہے​

باطل مٹ جائے، ہر نبی چاہتا ہے​

لیکن یہ بزرگوار جو چاہتے ہیں​

کیا قادرِ مطلق بھی وہی چاہتا ہے؟​

 

[حسان خان]

اقوال ترے پاک ہیں، اعمال پلید​

لب، مثلِ حریر، قلب، مانندِ حدید​

صد حیف کہ اے خطیبِ اعظم، تو ہے​

منبر پہ حسین، اور مسند پہ یزید​

 

[حسان خان]

ہر سانس میں کوثر کے پیام آتے ہیں​

ہر آن چھلکتے ہوئے جام آتے ہیں​

بندوں کو جو، اک بار لگاتا ہوں گلے​

اللہ کے، سو بار سلام آتے ہیں​

 

[حسان خان]

زردار کا خناس نہیں جاتا ہے
ہر آن کا وسواس نہیں جاتا ہے
ہوتا ہے جو شدت ہوس پر مبنی
تا مرگ وہ افلاس نہیں جاتا ہے​