جوش منتخب رباعیات

[حسان خان]

جلوے معدوم ہیں، نگاہیں لاکھوں​

گردن مفقود، اور بانہیں لاکھوں​

مبہوت ہے کاروانِ فکرِ انساں​

'منزل' عنقا ہے، اور 'راہیں' لاکھوں​

 

[حسان خان]

جو شمع تھی، پروانہ ہوئی جاتی ہے​

ہر زلفِ رسا، شانہ ہوئی جاتی ہے​

تحلیل کی رو میں ہر حقیقت اے جوش​

فریاد، کہ افسانہ ہوئی جاتی ہے​

 

[حسان خان]

اس دہر میں تا دیر ٹھہرنا بہتر​

یا تیز روی سے کوچ کرنا بہتر​

بس زندہ ہوں اب تک اس تذبذب کے طفیل​

جینے میں ہے فائدہ کہ مرنا بہتر​

 

[حسان خان]

یا رب! نئی لوح، کہنہ مضمون، یہ کیا؟​

صدیوں کے لیے ایک ہی معجون، یہ کیا؟​

ہر آن بدلنے والے انساں کے لیے​

جَو بھر نہ بدلنے والا قانون، یہ کیا؟​

 

[حسان خان]

اس فکر میں اک عمر سے ہوں بے خور و خواب​

کس طرح معطل ہوں رسوم و آداب​

اچھی تو ہے وضعِ راست گوئی، لیکن​

برداشت بھی کر سکیں گے اُس کو احباب؟​

 

[حسان خان]

اوہام سے دل ڈرے ہوئے ہیں اب تک​

کس طرح جئیں؟ مرے ہوئے ہیں اب تک​

افسوس کہ اسلاف کے باسی اقوال​

کانوں میں یہاں بھرے ہوئے ہیں اب تک​

 

[حسان خان]

احقر نہیں کوئی ناتواں سے بڑھ کر​

ابتر نہیں کوئی ناتواں سے بڑھ کر​

از روئے شریعتِ خدائے کم و بیش​

کافر نہیں کوئی ناتواں سے بڑھ کر​

 

[حسان خان]

ہر صاحبِ جوہر کو سبک سر کر دے​

فطرت کو زبوں کر کے زبوں تر کر دے​

افلاس کہ کھینچتا ہے ایماں کی طرف​

کمبخت مسلسل ہو تو کافر کر دے​

 

[حسان خان]

ہر سانس کو وقفِ صد شرارت کر دیں​

اخلاق کی کچھ عجیب حالت کر دیں​

مفلس کہ امیروں کے گناتے ہیں گناہ​

دولت اِنہیں دے دو تو قیامت کر دیں​

 

[حسان خان]

تعریف نہ کر رفیقِ جانی! میری​

پامال بہت ہے زندگانی میری​

یہ مجھ میں شرافت جو نظر آتی ہے​

بنیاد ہے اِس کی ناتوانی میری​

 

[حسان خان]

انسان کو رفتہ رفتہ حیواں کر دے​

ہر نور کو صد نار بداماں کر دے​

دولت کہ فرشتوں سے بڑھا دیتی ہے​

جم جائے اگر کہیں تو شیطاں کر دے​

 

[حسان خان]

انسا‌‌ں پہ ہے کس درجہ خرافات کا بار​

دن کا ہے کبھی وزن، کبھی رات کا بار​

پیدا ہو بشر میں کیا حکیمانہ مزاج​

عقلوں پہ ہے صدیوں کے روایات کا بار​

 

[حسان خان]

ہر نطق پر ایک گفتگو جاری ہے​

ہر خاک پہ ایک آبجو جاری ہے​

حیوان و نباتات و جماد و انساں​

ہر نبض میں ایک ہی لہو جاری ہے​

 

[حسان خان]

منہ شرم سے ڈھانپتی ہے عقلِ انساں​

تھراتی ہے، کانپتی ہے عقلِ انساں​

تحقیق کی منزلیں، عیاذاً باللہ​

ہر گام پہ ہانپتی ہے عقلِ انساں​

 

[حسان خان]

جب فکر نے راہ پر لگایا مجھ کو​

حکمت نے جب آئینہ دکھایا مجھ کو​

ذرات سے لے کے تا بہ انجم، واللہ​

جز اپنے کوئی نظر نہ آیا مجھ کو​

 

[حسان خان]

کہنے کو تو ایک بات کہتا ہوں میں​

پر فلسفۂ حیات کہتا ہوں میں​

جب میری زباں سے 'میں' نکلتا ہے ندیم!​

اس پردے میں 'کائنات' کہتا ہوں میں​

 

[حسان خان]

کیا 'ذات' کی بھی شان ہے اللہ اللہ​

رنگیں ہے تفکر میں، تکلم میں سیاہ​

کیا تجھ سے بیاں کروں کہ سرِ حق کا​

'احساس' ثواب ہے اور 'اظہار' گناہ​

 

[حسان خان]

اپنی ہی گرفت میں خود انسان ہے آج​

کل صاحبِ تدبیر تھا، حیران ہے آج​

جو وقت کے اقتضا سے تھی کل اک 'رسم'​

وہ وہم کے ارتقا سے 'ایمان' ہے آج​

 

[حسان خان]

عامی نے 'حجابات' سے تعبیر کیا​

عالم نے 'نشانات' سے تعبیر کیا​

اس ارض و سما کے ذرے ذرے کو مگر​

عارف نے فقط 'ذات' سے تعبیر کیا​

 

[حسان خان]

جی بھر کے یہاں کوئی نظارا نہ ہوا​

حد یہ ہے کہ صبر کا بھی یارا نہ ہوا​

انساں کا کسی حال میں بھی خوش رہنا​

خونخوار مشیت کو گوارا نہ ہوا​