جوش منتخب رباعیات

[حسان خان]

اس وقت سبک بات نہیں ہو سکتی
توہینِ خرابات نہیں ہو سکتی
جبریلِ امیں آئے ہیں مجرے کے لیے
کہہ دو کہ ملاقات نہیں ہو سکتی​

 

[حسان خان]

اوہام کو ہر اک قَدم پہ ٹھکراتے ہیں
اَدیان سے ہر گام پہ ٹکراتے ہیں
لیکن جس وقت کوئی کہتا ہے حُسین
ہم اہلِ خرابات بھی جھک جاتے ہیں​

 

[حسان خان]

لفظِ 'اقوام' میں کوئی جان نہیں
اک نوع میں ہو دوئی، یہ امکان نہیں
جو مشرکِ یزداں ہے وہ ناداں ہے فقظ
جو مشرکِ انساں ہے وہ انسان نہیں​

 

[حسان خان]

دائم حرکت ہے زندگی کی دمساز​

لرزاں جو نشیب ہے، تو جنباں ہے فراز​

منزل پہ کمر نہ کھول اے بندۂ راہ​

منزل تو ہے اک تازہ سفر کا آغاز​

 

[حسان خان]

دل کی جانب، رجوع ہوتا ہوں میں
سر تا بقدم، خضوع ہوتا ہوں میں
جب مہرِ مبیں غروب ہو جاتا ہے
پیمانہ بکف، طلوع ہوتا ہوں میں​

 

[مدیحہ گیلانی]

واہ واہ بہت ہی خوبصورت شیئرینگ ہے حسان بیٹے۔۔۔کیا کہنے جوش کی قادرکلامی کےخوب لطف اُٹھایا پڑھ کر ۔ جیتے رہیئے ۔

 

[حسان خان]

دل ہوتا ہے رُو براہ گاہے گاہے​

رو لیتے ہیں بھر کے آہ گاہے گاہے​

اِس ڈر سے کہیں 'خودی' نہ بن جائے 'خدا'​

کر لیتے ہیں ہم گناہ گاہے گاہے​

 

[حسان خان]

دیتا ہے کسے شیخ! جہنم کی وعید؟​

ہے سینۂ شرک میں بھی قلبِ توحید​

کھل جائے اگر کاکلِ ظلمت کی گرہ​

ہر خَم سے برس پڑیں ہزاروں خورشید​

 

[حسان خان]

طوفان کے عفریت کو بے بس کر دے​

اس برقِ جہاں سوز کو پھر خس کر دے​

ہنگامہ بپا ہے عِلم سے اے معبود!​

معصوم جہالتوں کو واپس کر دے​

 

[حسان خان]

بندے! کیا چاہتا ہے؟ دام و دینار؟​

یا دولتِ پائندۂ زلف و رخسار​

معبود! نہیں، نہیں کوئی چیز نہیں​

اِلّا آگاہیِ رموز و اسرار​

 

[حسان خان]

کر روح میں بابِ کفر و ایماں مسدود​

وہ فہم کی وحشت ہے، یہ دانش کا جمود​

'انکار' بہ ایں دماغِ کمزور و علیل!​

'اقرار' بایں عقلِ ضعیف و محدود!!​

 

[حسان خان]

کر سعی کہ کامگار کر دوں گا تجھے​

کونین کا شہریار کر دوں گا تجھے​

اک خس کا بھی راز جان لے گا جس وقت​

'اللہ' سے دوچار کر دوں گا تجھے​

 

[حسان خان]

پھولوں کی اگر ہوس ہے خاروں کو نہ دیکھ​

عشرت کی ہے دھن تو سوگواروں کو نہ دیکھ​

تعمیرِ حیات ہے اگر پیشِ نظر​

مڑ کر بھی مٹے ہوئے مزاروں کو نہ دیکھ​

 

[حسان خان]

الٹے گا فلک نقاب تیرے آگے​

کھل جائے گی ہر کتاب تیرے آگے​

ہو جائے گا جب عارفِ یک ذرۂ خاک​

جھک جائے گا آفتاب تیرے آگے​

 

[حسان خان]

اے زاہدِ حق شناس و اے عالمِ دیں​

حضرت کا مقام ہے فقط خلدِ بریں ×​

انساں ابھی چل رہا ہے گھٹنوں گھٹنوں​

اور آپ کو ہے قربِ قیامت کا یقیں!!​

​

× 'اکثر اہلِ جنت ابلہ ہوں گے۔' (حدیث)​

 

[حسان خان]

گرداب سے کھیل کر ابھرنے والے!​

ممنوع شجر سے اے نہ ڈرنے والے​

اس ارض کا تحفۂ خلافت ہو قبول​

فردوس میں اے گناہ کرنے والے!​

 

[حسان خان]

جب عقل ہی بیکس ہو تو نیت کیسی​

جب حکمِ مشیت ہو، شرارت کیسی​

ماحول و وراثت پہ ہے مبنی ہر فعل​

خاطی پہ ترس کھائیے، نفرت کیسی؟​

 

[حسان خان]

جب حدِّ طلب سے دل نکل جاتا ہے​

سانچے میں طرب کے، درد ڈھل جاتا ہے​

کر لیتی ہیں غم کا جب احاطہ نظریں​

ہر اشک، تبسم میں بدل جاتا ہے​

 

[حسان خان]

ہوتا ہے سکون غم بڑھانے کے لیے​

آتی ہے ہنسی، خون رلانے کے لیے​

افسوس کہ تقدیر جلاتی ہے چراغ​

ظلمت کو بہ تفصیل دکھانے کے لیے​

 

[حسان خان]

ہر بات پہ منہ ترا اترتا کیوں ہے؟​

جینے کے لیے بنا ہے، مرتا کیوں ہے؟​

کونین کے ساتھ کھیل اے طفلِ حیات​

کونین خود اک کھیل ہے، ڈرتا کیوں ہے؟​