"میری پسند"

[شمشاد]

وہ سامنے بھی آئے تو دیکھا نہ کر اسے
گر وہ بچھڑ بھی جائے تو سوچا نہ کر اسے
اک بار جو گیا سو گیا بھول جا اسے
وہ گم شدہ خیال ہے پیدا نہ کر اسے
اب اس کی بات خالی ہے معنی سے اے منیر
کہنے دے جو وہ کہتا ہے روکا نہ کر اسے
(منیر نیازی)​

 

[عیشل]

یونہی بے یقیں ،یونہی بے نشاں میری آدھی عمر گذر گئی
کہیں ہو نہ جاؤں میں رائیگاں میری آدھی عمر گذر گئی
کبھی پا لیا،کبھی کھو دیا،کبھی ہنس لیا،کبھی رو دیا
بڑی مختصر ہی یہ داستاں،میری آدھی عمر گذر گئی

 

[شمشاد]

اک خیال خام میں مسحور کر رکھا مجھے
خود پرستی نے جہاں سے دور کر رکھا مجھے
بے سبب تھا اس جگہ پر وہ قیام سرسری
پر تھکن نے اس جگہ مجبور کر رکھا مجھے
(منیر نیازی)​

 

[ظفری]

یہ اور بات کہ خود کو بہت تباہ کیا
مگر یہ دیکھ تیرے ساتھ تو نباہ کیا

عجب طبعیت درویش تھی کہ تاج اور تخت
اسی کو سونپ دیا اور بادشاہ کیا

بساطِ عالم امکاں سمیٹ کر اس نے
خیالِ دشتِ تمنا کو گردِ راہ کیا

متاع دیدہ و دل صرف انتظار ہوئی
تیرے لیئے تیری آمد کو فرشِ راہ کیا

زمیں پہ جس نے جھکا دیں ہیں آسمان کی حدیں
اسی نے خاک نشینوں کو کج کلاہ کیا

بجزِ خدا میں کسی کو جواب دہ تو نہیں
سو میں نے اپنی خموشی ہی کو گواہ کیا

سلیم اس نے اندھیروں سے صبح کرنی تھی
سو دن کو دن ہی رکھا رات کو سیاہ کیا

(سلیم کوثر )​

 

[شمشاد]

شام سے آنکھ میں نمی سی ہے
آج پھر آپ کی کمی سی ہے
دفن کر دو ہمیں کہ سانس آئے
نبض کچھ دیر سے تھمی سی ہے
کون پتھرا گیا ہے آنکھوں میں
برف پلکوں پہ کیوں جمی سی ہے
وقت رہتا نہیں کہیں ٹک کر
عادت اس کی بھی آدمی سی ہے
آئیے راستے الگ کر لیں
یہ ضرورت بھی باہمی سی ہے
(گلزار)​

 

[عمر سیف]

بہت نزدیک ہیں آنکھیں تمھاری
بھلا ہم کس طرح پلکیں اٹھائیں​

 

[شمشاد]

عجب اپنا حال ہوتا جو وصالِ یار ہوتا
کبھی جاں صدقے ہوتی کبھی دل نثار ہوتا

یہ مزہ تھا دل لگی کا کہ برابر آگ لگتی
نہ تمہیں قرار ہوتا نہ ہمیں قرار ہوتا
(داغ دہلوی)

 

[عمر سیف]

درد کا نام اگر میرے لیے لکھا تھا
پھر کوئی اور مرے ساتھ پریشاں کیوں ہے​

 

[شمشاد]

فراق
وہ شب جس کو تم نے گلے سے لگا کر
مقدس لبوں کی حسیں لو ریوں میں
سُلایا تھا سینے پہ ہر روز
لمبی کہا نی سنا کر
وہ شب جس کی عادت بگاڑی تھی تم نے
وہ شب آج بستر پہ اوندھی پڑی رورہی ہے
(گلزار)​

 

[qaral]

محبت میں نہیں ہے فرق جینے اور مرنے کا

اسی کو دیکھ کر جیتے ہیں جس کافر پہ دم نکلے

 

[شمشاد]

کبھی تو چونک کے دیکھے کو ئی ہماری طرف
کسی کی آنکھ میں ہم کو بھی انتظار دِکھے
کوئی طلسمی صفت تھی جو اُس ہجوم میں وہ
ہوئے جو آنکھ سے اوجھل تو بار بار دِکھے
(گلزار)​

 

[عمر سیف]

بچھڑتے وقت اُس نے مُجھ سے پوچھا
کبھی آکاش اور دھرتی ملے ہیں ؟؟
​

 

[شمشاد]

زندگی یوں ہوئی بسر تنہا
قافلہ ساتھ اور سفر تنہا
اپنے سائے سے چونک جاتے ہیں
عمر گزری ہے اس قدر تنہا
رات بھر بولتے ہیں سناٹے
رات کاٹے کو ئی کدھر تنہا
ڈُوبنے والے پار جا اُترے
نقشِ پا اپنے چھوڑ کر تنہا
دن گزرتا نہیں ہے لوگوں میں
رات ہوتی نہیں بسر تنہا
ہم نے دروازے تک تو دیکھا تھا
پھر نہ جانے گئے کدھر، تنہا
(گلزار)​

 

[عمر سیف]

عطا، بدلے نظر آتے ہیں چہرے
یہ کیسے بےمُروت آئینے ہیں​

 

[شمشاد]

تنکا تنکا کانٹے توڑے ، ساری رات کٹائی کی
کیوں اتنی لمبی ہو تی ہے، چاندنی رات جُدائی کی
نیند میں کوئی اپنے آپ سے باتیں کرتا رہتا ہے
کال کنویں میں گونجتی ہے، آواز کسی سودائی کی
(گلزار)​

 

[ظفری]

( باپ کی وصیت )

میں تو اب جارہا ہُوں دُنیا سے
اُس گھڑی مجھ کو یاد کرلینا
جب تمہارا کوئی بچہ تم سے
پیار مانگے، یہ تم جتا نہ سکو
جب تمہارا کوئی بچہ تم سے
ضد کرے اور تم منا نہ سکو
جب تمہارا کوئی بچہ تم سے
چیز مانگے، اور تم دلا نہ سکو
اُس کو دھیرے سے گود میں لے کر
اور پھر پیار پپّی ( بوسہ) کرکے
سوچنا، مجھ پہ کیا گزرتی تھی
جس گھڑی تم کبھی مچلتے تھے
اِک کھلونے کو دیکھ کر بیٹا
اور میں تم کو گود میں لے کر
اپنے سینے سے خوب چمٹا کر
اور پھر پیار سے پپّی ( بوسہ) کرکے
تم سے کہتا تھا آج رہنے دو
کل دِلا دیں گے، آج رہنے دو

 

[شمشاد]

تجھ کو دیکھا ہے جو دریا نے اِدھر آتے ہوئے
کچھ بھنور ڈوب گئے آب میں چکراتے ہوئے

ہم نے تو رات کو دانتوں سے پکڑ رکھاہے
چھینا جھپٹی میں اُفق کھلتا گیا جاتے ہوئے

(گلزار)​

 

[عمر سیف]

کوئی پیاس کہیں رہ جاتی ہے
کوئی لاکھ سمندر پی جائے
کوئی لاکھ ستارے چھو آئے
کوئی پیاس کہیں رہ جاتی ہے
کوئی آس کہیں رہ جاتی ہے

کوئی زیست کا ساغر بھرتا ہے
کوئی پھِر خالی ہو جاتا ہے
کوئی لمحے بھر کو آتا ہے
کوئی پل بھر میں کھو جاتا ہے
کوئی پیاس کہیں رہ جاتی ہے
کوئی آس کہیں رہ جاتی ہے
​

 

[شمشاد]

کتاب کو بھی خبر ہوتی ہے
اسے کون پڑھ رہا ہے
خراب نظروں سے وہ اپنا اصل باب چھپا جاتی ہے
عورت کو بھی خبر ہوتی ہے
اسے کون دیکھ رہا ہے
خراب نظروں سے وہ اپنا اصل آپ چھپا رہی ہے
(منیر نیازی)

 

[عمر سیف]

عرضِ احوال کا دعوٰی تھا جنھیں اکبر
وقت پر صاحبِ تسلیم و رضا نکلے ہیں​