میرے پسندیدہ اشعار

[شمشاد]

میں سوچتا ہوں بہت زندگی کے بارے میں
یہ زندگی بھی مجھے سوچ کر نہ رہ جائے
(ابھیشیک شکلا)

 

[شمشاد]

کبھی کبھی تو کسی اجنبی کے ملنے پر
بہت پرانا کوئی سلسلہ نکلتا ہے
(منظور ہاشمی)

 

[شمشاد]

جذبے کی کڑی دھوپ ہو تو کیا نہیں ممکن
یہ کس نے کہا سنگ پگھلتا ہی نہیں ہے
(اختر لکھنوی)

 

[عطاء اللہ جیلانی]

کیا خُوب ہی ہوتا اگر دُکھ ریت کے ہوتے
مُٹھی سے گرا دیتے , پاؤں سے اُڑا دیتے

جون ایلیاء.

 

[شمشاد]

کیا کہوں اس سے کہ جو بات سمجھتا ہی نہیں
وہ تو ملنے کو ملاقات سمجھتا ہی نہیں
(فاطمہ حسن)

 

[عطاء اللہ جیلانی]

کتنے جھوٹے تھے ہم محبت میں
تم بھی زندہ ہو ہم بھی زندہ ہیں

جون ایلیاء

 

[شمشاد]

میں نے ماں کا لباس جب پہنا
مجھ کو تتلی نے اپنے رنگ دیے
(فاطمہ حسن)

 

[شمشاد]

اے کاتب تقدیر یہ تقدیر میں لکھ دے
بس اس کی محبت مری جاگیر میں لکھ دے
(فرحت ندیم ہمایوں)

 

[عطاء اللہ جیلانی]

بزمِ خیال میں ، ترے حُسن کی شمع جل گئی
درد کا چاند بُجھ گیا ، ہِجر کی رات ڈھل گئی

فیض احمد فیض

 

[شمشاد]

مقتل شوق کے آداب نرالے ہیں بہت
دل بھی قاتل کو دیا کرتے ہیں سر سے پہلے
(علی سردار جعفری)

 

[عطاء اللہ جیلانی]

اے شیخ آدمی کے بھی درجے ہیں مختلف
انسان ہیں ضرور مگر واجبی سے آپ

بیخود دہلوی

 

[عطاء اللہ جیلانی]

میں اُس کو دیکھتا رہتا تھا حیرتوں سے
یہ زندگی سے تعارف کی ابتدا تھی مِری


احمد فراز

 

[شمشاد]

عاشقی کے بھی کچھ آداب ہوا کرتے ہیں
زخم کھایاہے تو کیا حشر اٹھانے لگ جائیں
(خان رضوان)

 

[عطاء اللہ جیلانی]

غم عاشقی سے کہہ دو رہ عام تک نہ پہنچے
مجھے خوف ہے یہ تہمت مرے نام تک نہ پہنچے

میں نظر سے پی رہا تھا تو یہ دل نے بد دعا دی
تیرا ہاتھ زندگی بھر کبھی جام تک نہ پہنچے

شکیل بدایونی

 

[شمشاد]

مری صبح غم بلا سے کبھی شام تک نہ پہنچے
مجھے ڈر یہ ہے برائی ترے نام تک نہ پہنچے
(کلیم عاجز)

 

[عطاء اللہ جیلانی]

اے شعور آدمی نہیں جاتا
بزم میں سوٹ بوٹ جاتا ہے

انور شعور

 

[محمل ابراہیم]

مکتبِ عشق کا دستور نرالا دیکھا
اُس کو چھٹی نہ ملی جس کو سبق یاد ہوا

 

[عطاء اللہ جیلانی]

مکتبِ عشق کا دستور نرالا دیکھا
اُس کو چھٹی نہ ملی جس کو سبق یاد ہوا

سید طاہر علی رضوی کا یہ شعر محولہ بالا شکل میں درست نہیں ہے، بلکہ صحیح یوں ہے:

مکتبِ عشق کا دستور نرالا دیکھا

اس کو چُھٹی نہ ملے جس کو سبق یاد رہے

 

[عطاء اللہ جیلانی]

‏میں نے پلکوں سے درِ یار پہ دستک دی ہے
میں وہ سائل ہوں جسے کوئ صدا یاد نہیں
‎
ساغر صدیقی

 

[محمد عبدالرؤوف]

اذاں پہ قید نہیں بندش نماز نہیں
ہمارے پاس تو ہجرت کا بھی جواز نہیں

انجم خیالی