کلاسیکی شعرا کے کلام سے انتخاب

[شہزاد احمد]

ہستی سے عدم تک نفس چند کی ہے راہ
دنیا سے گزرنا سفر ایسا ہے کہاں کا

مرزا رفیع سودا

 

[شہزاد احمد]

ہوا رنگ بدلے ہے ہر آن میر
زمیں و زماں ہر زماں اور ہے

میر تقی میر

 

[شہزاد احمد]

انوکھا ہجر، نرالا وصال ہے اپنا
کہ ہم نہ دیکھ سکیں اور وہ ہمکنار رہے

(بیدم وارثی)

 

[شہزاد احمد]

سوزشِ عشق میں یہ دل ہی ہے آتش قائم
پانی ہو ہو کے بہا کرتا جو پتھر ہوتا ۔۔۔۔۔

(آتش)

 

[شہزاد احمد]

پاسِ ناموسِ عشق تھا ورنہ
کتنے آنسو پلک تک آئے تھے

(میر تقی میر)

 

[شہزاد احمد]

ہجر کے غم کو کہاں تک جھیلیے
آہ اپنا تو کھپا جاتا ہے جی ۔۔۔۔

(مصحفی)

 

[شہزاد احمد]

جسمِ خاکی کے تلے جسمِ مثالی بھی ہے
اک قبا اور بھی ہم زیرِ قبا رکھتے ہیں ۔۔۔

(خواجہ حیدر علی آتش)

 

[شہزاد احمد]

الہٰی رکھ مجھے تو خاکِ پا اہلِ معانی کا
کہ کھلتا ہے اسی صحبت سے نسخہ نکتہ دانی کا

ولی دکنی

 

[شہزاد احمد]

جسے عشق کا تیر کاری لگے
اسے زندگی جگ میں بھاری لگے

ولی دکنی

 

[شہزاد احمد]

پردے کو تعین کے در دل سے اٹھا دے
کھلتا ہے ابھی پل میں طلسمات جہاں کا
ہستی سے عدم تک نفس چند کی ہے راہ
دنیا سے گزرنا سفر ایسا ہے کہاں کا

مرزا رفیع سودا

 

[شہزاد احمد]

عشق سے تو نہیں ہوں میں واقف
دل کو شعلہ سا کچھ لپٹتا ہے ۔۔۔۔۔۔

مرزا رفیع سودا

 

[شہزاد احمد]

پانی میں نمک ڈال مزا دیکھنا دسے
جب گھُل گیا نمک تو نمک بولنا کسے
یوں کہوی خودی اپنی خدا ساتھ محمدً
جب گھُل گئی خودی تو خدا بولنا کسے

حضرت خواجہ بندہ نواز گیسو دراز

 

[شہزاد احمد]

آ عندلیب مل کے کریں آہ و زاریاں
تو ہائے گل پکار میں چلاؤں ہائے دل

رند لکھنوی

 

[شہزاد احمد]

اس نگاہِ شرمگیں نے کر دیا رسوا ہمیں
ہائے وہ افسوں جو آخر کو فسانہ ہو گیا

رضا علی وحشت

 

[شہزاد احمد]

جوشِ جنوں کے ہاتھ سے فصلِ بہار میں
گل سے بھی ہو سکی نہ گریباں کی احتیاط

خواجہ میر درد

 

[فرخ منظور]

دمبدم جھڑکی اور گالی ہے
تُو نے یہ کیا زباں نکالی ہے
(نعیم)

 

[فرخ منظور]

دل میں ہو ہو گداز گلتے رہے
دم بخود شمع وار جلتے رہے

وہ ادھر دل کو لے گیا اے نعیم
ہم اِدھر بیٹھے ہاتھ ملتے رہے

(نعیم)

 

[سیدہ شگفتہ]

اپنی اپنی راحتوں سے جب کبھی فرصت ملے
دوسروں کا درد بھی دل میں سجا کر دیکھیے

(کلام : بہادر شاہ ظفر)

 

[فرخ منظور]

کیا یہاں سے وہاں سوا ہو گا؟
حشر میں بھی یہی خدا ہو گا
(نواب کلب علی خاں)

 

[سیدہ شگفتہ]

خیالِ خاطرِ احباب چاہیے ہر دم
انیس ٹھیس نہ لگ جائے آبگینوں کو

(میر انیس)