نتائج تلاش

دیئے کی لَو کی طلاطم سے ڈر رہا ہُوں میں یہ کِس خرابۂ شب سے گزُر رہا ہُوں میں اب اِس میں ہاتھ ہوں زخمی، کہ سر صلیب پہ ہو وہ لِکھ رہا ہُوں جو محسُوس کر رہا ہُوں میں مُنافقت کو مِلی جب سے رہبری کی سند پسِ غُبارِ سفر در بدر رہا ہُوں میں عنبر امروہوی

لہو رُلائے مجھے عرضِ نا رسا کی تڑپ دُعا کے واسطے جس وقت ہاتھ اُٹھاؤں میں عنبر امروہوی

نِگاہِ کرَم یُونہی رکھنا خُدارا نہ میں ہُوں نہ دِل آزمانے کے قابل احمد مشتاق

کہیں ہے عشق، کہیں ہے کشِش، کہیں حرکت بھرا ہے خامۂ فِطرت میں رنگِ فتنہ گری اصغر گونڈوی

ہزار جامہ دری، صد ہزار بخیہ گری تمام شورش و تمکیں نِثارِ بے خبری اصغر گونڈوی

یاں جوشِ غم میں موت سے بدتر ہے زندگی آپ آ کے دیکھ جایئے باور اگر نہیں مومن خان مومن

غزل میں جس کی ہمیشہ چراغ جلتے ہیں ! اُسے کہیں سے بلاؤ بڑا اندھیرا ہے وہ چاندنی کی بشارت ہے حرفِ آخر تک بشیر بدر کو لاؤ بڑا اندھیرا ہے بشیر بدر

وفورِ غم و یاس نے ایسا گھیرا نہ چُھوڑا، کہیں آنے جانے کے قابل شبِ ہجر کی تلخِیاں کچُھ نہ پُوچھو نہیں داستاں یہ، سُنانے کے قابل احمد مشتاق

دِل کی بستی پُرانی دِلّی ہے جو بھی گزُرا ہے اُس نے لوُٹا ہے ہم تو کچھ دیر ہنس بھی لیتے ہیں دِل ہمیشہ اُداس رہتا ہے بشیر بدر

اندھیری رات کا تنہا مُسافر میری پلکوں پہ اب سہما ہُوا ہے سمیٹو اور سینے میں چُھپالو یہ سنّاٹا بہت پھیلا ہُوا ہے بشیر بدر

صاحبِ توقیر سودا کو نہ ہرگز سمجهیو ایک وہ رُسوا خرابِ کوُچہ و بازار ہے محمد رفیع سودا

بستگی ہر چیز کی ہے دل سے با تارِ نفس یہ جوسب دیکھے ہے تُو، اُس تار کا بستار ہے محمد رفیع سودا

جو عَدم کی جان ہے، جو ہے پیامِ زندگی ! اُس سکوتِ راز، اُس آواز کی باتیں کرو جس کی فرقت نے پلٹ دی عِشق کی کایا، فراق ! آج اُس عیسیٰ نفس دم ساز کی باتیں کرو فراق گھورکھپوری

نکہتِ زُلفِ پریشاں، داستانِ شامِ غم صُبح ہونے تک اِسی انداز کی باتیں کرو ہر رگِ دل وجد میں آتی رہے، دُکھتی رہے یوں ہی اُس کے جا و بے جا ناز کی باتیں کرو فراق گھورکھپوری

ہوتا ہے رازِ عِشق و محبّت اِنہیں سے فاش آنکھیں زباں نہیں ہیں، مگر بے زباں نہیں اصغر گونڈوی

یہ سوزِ دروں، یہ اشکِ رواں، یہ کاوشِ ہستی کیا کہیے مرتے ہیں کہ کچھ جی لیں ہم، جیتے ہیں کہ آخر مرنا ہے مجید امجد

ہم زباں میرے تھے اُن کے دل مگر اچھّے نہ تھے منزلیں اچھی تھیں، میرے ہمسفر اچھّے نہ تھے اِک خیالِ خام ہی مُرشد تھا اُن کا ، اے منیر ! یعنی اپنے شہر میں اہلِ نظراچھّے نہ تھے منیر نیازی

ہوگئے نامِ بُتاں سُنتے ہی مومن بے قرار ہم نہ کہتے تھے کہ، حضرت پارسا کہنے کو ہیں مومن خاں مومن

چلی سمتِ غیب سے اِک ہَوا کہ چمن ظہور کا جل گیا مگر ایک شاخِ نہالِ غم، جسے دل کہیں سو ہری رہی نظرِ تغافلِ یار کا، گِلہ کِس زباں سے کروں بیاں کہ شرابِ حسرت و آرزو، خُمِ دل میں تھی سو بھری رہی سراج اورنگ آبادی

بکھر گیا ہے کچھ اِس طرح آدمی کا وجود ہر ایک فرد کوئی سانحہ لگے ہے مجھے جان نثار اختر