آج کا شعر - 3

[محمد وارث]

صاحب ترجمہ بھی لکھ دیتے ہیں ۔ کہ آپ کو مجھ ایسے جاہل کا امتحان مقصود ہے۔

و صلی اللہ علیٰ نور کزو شد نورھا پیدا
( اور درود اس ’’ نور‘ ‘ﷺ پر جسے ’’ نور ‘‘سے پید اکیا گیا)
زمیں از حبِ اُو ساکن ، فلک در عشقِ اُو شیدا
(زمین جس (ﷺ)کی محبت میں ساکن ہے اور آسمان جس (ﷺ) کے عشق میں نثار و شید ا ہوا جاتا ہے )

پہلا مصرع وزن میں رکھنے کیلیے کچھ یوں ہونا چاہیئے:

و صلی اللہ علیٰ نورے کزو شد نورھا پیدا
(بحر ہزج سالم، مفاعیلن چار بار)

اور اسکا صحیح مطلب کچھ یوں ہے


اللہ کا دردو اسکے نور پر کہ اس سے مزید بہت سے نور (اہلِ بیت) پیدا ہوئے۔

کَزُو دراصل "کہ از اُو" کا مخفف ہے یعنی "کہ اس سے"

 

[مغزل]

پہلا مصرع وزن میں رکھنے کیلیے کچھ یوں ہونا چاہیئے:

و صلی اللہ علیٰ نورے کزو شد نورھا پیدا
(بحر ہزج سالم، مفاعیلن چار بار)

اور اسکا صحیح مطلب کچھ یوں ہے


اللہ کا دردو اسکے نور پر کہ اس سے مزید بہت سے نور (اہلِ بیت) پیدا ہوئے۔

کَزُو دراصل "کہ از اُو" کا مخفف ہے یعنی "کہ اس سے"

شکریہ وارث صاحب ۔

 

[راجہ صاحب]

انگڑائی بھی نا لینے پائے وہ اٹھا کے ہاتھ
دیکھا مجھے تو چھوڑ دیے مسکرا کے ہاتھ

 

[مغزل]

تم تراشے ہوئے بت ہو کسی محراب کے بیچ
ہم زوائد ہیں جو پتھر سے نکل جاتے ہیں

توقیر تقی

 

[مغزل]

یہ شخص شور مچاتا ہوا جو پھرتا ہے
یہ مجھ میں تھا مری تنہائیوں سے نکلا ہے

عزیز مرزا

 

[مغزل]

امید کتنی مجھے ذاتِ کبریا سے ہے
چراغ ہاتھ میں ہے گفتگو ہوا سے ہے

نیر ندیم (جنگ اخبار ، صحافی)

 

[مغزل]

ہوا کی میز بانی کرتے کرتے
شجر کی گود خالی ہوگئی ہے

نعیم گیلانی (شیخو پورہ)

 

[مغزل]

یوں تلوار کو دیکھ رہا ہوں حیرت سے
جیسے یہ سر پہلی بار اترنا ہے

نجم الحسن نجمی

 

[مغزل]

ضروری تو نہیں ہم جھیل کہہ دیں
اگر پانی کہیں ٹھہرا ہوا ہے

مقبول زیدی

 

[مغزل]

غارت گرِ چمن یہ تلافی کی شرط ہے
جو شاخ جس جگہ تھیں وہیں چاہیے مجھے

نصیر کوٹی

 

[مغزل]

نہ کر افرنگ کا اندازہ اس کی تابناکی سے
کہ بجلی کے چراغوں سے ہے اس جوہر کی براقی

اقبال

 

[مغزل]

ممکن نہیں تعینِ منزل پہ اتفاق
تم آسماں سے دیکھ رہے ہو زمیں سے ہم

محمود الحسن بہار کوٹی

 

[فرخ منظور]

لاگ اگر دل کو نہیں، لطف نہیں ‌جینے کا
الجھے سلجھے کسو کاکُل کے گرفتار رہو

(میر تقی میر)

 

[ف۔قدوسی]

ان کی آنکھوں کو کبھی غور سے دیکھا ہے فراز
سونے والوں کی طرح ، جاگنے والوں جیسی۔ ۔ ۔

 

[محمداحمد]

اُس رستے پہ پیچھے سے اتنی آوازیں آئیں جمال
ایک دفعہ تو گھوم کے رہ گئی ایڑھی سیدھے پاؤں کی

جمال احسانی

 

[مغزل]

واہ واہ ۔۔
ایک شعر اور پڑھیے ۔

رکا ہوا ابھی مژگاں پہ ہے برائے نمود
ملال آنکھ سے اترے تو آستیں پہ رکے
خواجہ رضی حیدر
(شعری مجموعہ : گماں گشت )

 

[محمداحمد]

بہت خوب!

رُکا ہوا ہے عجب دھوپ چھاؤں کا موسم
گزر رہا ہے کوئی دل سے بادلوں کی طرح

 

[ش زاد]

چبا لیں کیوں نہ خود اپنا ہی دھانچہ
تمھیں راتب مُہیا کیوں کریں ہم

جون ایلیا​

 

[نوید صادق]

گھٹا دیکھ کر خوش ہوئیں لڑکیاں
چھتوں پر کھلے پھول برسات کے

(منیر نیازی)

 

[مغزل]

خزاں کبھی تو کہو ایک اس طرح کی غزل
کہ جیسے راہ میں بچے خوشی سے کھیلتے ہیں
محبوب خزاں (اکیلی بستیاں سے)