ثالث کس نے بنایا؟ فوج خود بتائے
فوج کو سیاسی بحران کے حل کے لیے کس نے بلایا اور کس نے نہیں، اس سے قطع نظر اس ’دعوت‘ کا سہرا ایک دوسرے کے سر باندھنے کی کوشش سے ایک بات واضح ہوئی ہے کہ حکومت اور احتجاجی جماعتیں فوج کے ذریعے مسئلہ حل تو کروانا چاہتی ہیں لیکن اسے ایک قباحت بھی سمجھتے ہیں۔
وزیراعظم میاں نواز شریف کے مطابق انھوں نے جنرل راحیل شریف کو ’ثالثی‘ کے لیے نہیں کہا، لیکن حکومت اس بات سے انکار نہیں کر سکتی کہ جمعرات کی شام ایوان وزیراعظم میں جنرل راحیل شریف کی آمد وزیراعظم ہی کی خواہش پر ہوئی تھی۔ اب اس ملاقات میں ثالثی کا لفظ استعمال ہوا یا نہیں، اس سے قطع نظر یہ بات وزیراعظم کے قریبی ذرائع اس ملاقات سے پہلے ہی بی بی سی کو بتا چکے تھے کہ حکومت نے اس بحران کے حل کے لیے فوج کی مدد حاصل کرنے کا فیصلہ کر لیا ہے۔
جہاں تک طاہر القادری کا معاملہ ہے تو وہ واشگاف الفاظ میں کہ رہے ہیں کہ ’میں نے فوجی سربراہ جنرل راحیل شریف کو کبھی فون نہیں کیا۔‘علامہ قادری کی بات درست ہے لیکن مکمل سچ نہیں۔ یہ فون کال ان کی جانب سے ان کے ایک ساتھی نے جنرل راحیل شریف کے سٹاف آفیسر کو کی تھی۔ اسی طرح انھوں نے فوج سے ثالثی نہیں بلکہ انصاف کرنے کی بات کی۔
الفاظ کے گورکھ دھندے میں عوام کو الجھا کر فریقین اصل حقیقت کو چھپانے کی کوشش کر رہے ہیں۔ ایسے میں قائد حزب اختلاف نے ایک معقول تجویز پیش کی ہے۔ انھوں نے پاکستانی فوج کے تعلقات عامہ کے پر زور دیا ہے کہ ایک بیان جاری کیا جائے جس میں وضاحت کی جائے کہ پاکستان کی سیاسی قیادت میں سے کس نے فوجی سربراہ سے رابطہ کیا، ملاقات کی درخواست کی اور ثالثی کا کردار ادا کرنے کا مطالبہ کیا۔
صرف اسی طرح دودھ کا دودھ اور پانی کا پانی ہو سکتا ہے۔
آصف فاروقی، بی بی سی اردو ڈاٹ کام
