آنکھ، چشم، نین، دیدہ، نگاہ، نظر پر اشعار

[شیزان]

یہ میرا دل ہے یا تیری نظر ہے
میں تڑپا ہوں کہ تڑپایا گیا ہوں

عدیم اِک آرزُو تھی زِندگی میں
اُسی کے ساتھ دفنایا گیا ہوں


عدیمؔ ہاشمی​

 

[شیزان]

اُسی سے نظر پھر سے ٹکرا گئی
دوبارہ وہی حادثہ ہو گیا

یہاں دل دیا اور وہاں دل دیا
محبت تو کھیل آپ کا ہو گیا


عدیم ؔ ہاشمی​

 

[شیزان]

دل و چشم یوں باد و بارَاں بنے
جو سُوکھا تھا جنگل، ہَرا ہو گیا

یہ دل جو کہ میرا تھا، میرا نہیں
یہ دل آج سے آپ کا ہو گیا


عدیمؔ ہاشمی​

 

[شیزان]

بلا کے شوخ ہیں، بے طرح کام کرتے ہیں
نظر مِلاتے ہی قصّہ تمام کرتے ہیں

اُٹھو اُٹھو درِ دولت سے عاشقو! اُٹّھو
چلو چلو کہ وہ دیدارعام کرتے ہیں

عبدالمجید بیدل​

 

[شیزان]

دُشمنِ راحت، جوانی میں طبیعت ہو گئی
جس حسِین سے مِل گئیں آنکھیں، محبت ہوگئی

اکبر الہ آبادی​

 

[شیزان]

تسکین درد مندوں کو یا رب شتاب دے
دل کو ہمارے چین دے آنکھوں کو خواب دے

میر​

 

[شیزان]

پھر دمِ دِید رہے چشم ونظر دِید طلب
پھر شبِ وصْل مُلاقات نہ ہونے پائی

فیض سر پر جو ہر اِک روز قیامت گُزری!
ایک بھی، روزِ مکافات نہ ہونے پائی

فیض احمد فیض​

 

[شیزان]

نِگاہ پڑتی ہے اُن پرتمام محفل کی
جو آنکھ اُٹھا کے نہیں دیکھتے کسی کی طرف

ذرا سی دیر ہی ہو جائے گی تو کیا ہوگا
گھڑی گھڑی نہ اُٹھاؤ نظر گھڑی کی طرف


اکبرالٰہ آبادی​

 

[شیزان]

خوشا اشارہٴ پیہم، زہے سکوتِ نظر
دراز ہوکے فسانہ ہے مختصر پھر بھی

خراب ہو کے بھی سوچا کئے ترے مہجور
یہی کہ تیری نظر ہے تِری نظر پھر بھی

فراق گورکھپوری​

 

[شیزان]

زُلف سے، چشم و لب و رُخ سے، کہ تیرے غم سے
بات یہ ہے کہ دِل و جاں کو رہا کِس سے کریں

ہاتھ اُلجھے ہوئے ریشم میں پھنْسا بیٹھے ہیں
اب بتا! کون سے دھاگے کو جُدا کِس سے کریں

ایوب خاور​

 

[شیزان]

بہت لطیف اِشارے تھے چشمِ ساقی کے!
نہ میں ہُوا کبھی بے خود، نہ ہوشیار ہُوا

اصغر گونڈوی​

 

[شیزان]

وہ سامنے ہو تو، پھر کچھ نظر نہیں آتا
دل و نگاہ پہ چھانا اُسی کو آتا ہے

اُسی کے آنے سے شاخوں پہ پھول آتے ہیں
بہار اوڑھ کے آنا ، اُسی کو آتا ہے

باقر زیدی​

 

[شمشاد]

وہ وقت مری جان بہت دُور نہیں ہے
جب درد سے رک جائیں گی سب زیست کی راہیں
اور حد سے گزر جائے گا اندوہِ نہانی
تھک جائیں گی ترسی ہوئی ناکام نگاہیں
چھن جائیں گے مجھ سے مرے آنسو مری آہیں
چھن جائے گی مجھ سے مری بے کار جوانی
(فیض احمد فیض)

 

[صائمہ شاہ]

تیری آنکھیں ارے معاذ اللہ
بے پئے بھی سرور ہوتا ہے

ساغر نظامی

 

[صائمہ شاہ]

بھیگی ہوئی آنکھیں ہیں درود اس کے لبوں پر
لگتا ہے ابھی اٹھ کے وہ میلاد سے آئی

توقیر عباس

 

[جاسمن]

سوچتے ہی رہے، پُوچھیں گے تیری آنکھوں سے
کِس سے سِیکھا ہے ہُنر دِل میں اُتر جانے کا

شہریاؔر

 

[جاسمن]

سامنے ہوتے تھے پہلے جس قدر ہوتے تھے ہم
جب یہ نظارے نہیں تھے تب نظر ہوتے تھے ہم
فیضان ہاشمی

 

[فرقان احمد]

سایہءچشم میں حیراں رُخِ روشن کا جمال
سرخیءلب میں پریشاں تری آواز کا رنگ

(فیض احمد فیض)

 

[فہد اشرف]

ہجوم بادۂ و گل میں ہجوم یاراں میں
کسی نگاہ نے جھک کر مرے سلام لیے
مخدوم محی الدین

 

[محمد وارث]

عجب کرشمہ بہار کا ہے
نظر نظر جلوہ یار کا ہے