آنکھ، چشم، نین، دیدہ، نگاہ، نظر پر اشعار

[لاریب مرزا]

بھری محفل میں ناحق رازِ الفت کر دیا افشا
محبت کا بھرم تو نے نہ کچھ اے چشم تر رکھا

(نصیر الدین نصیر)

 

[محمد وارث]

جب نام ترا لیجیے تب چشم بھر آوے
اس زندگی کرنے کو کہاں سے جگر آوے
میر

 

[محمد وارث]

بہت دنوں میں تغافل نے تیرے پیدا کی
وہ اک نگہ کہ بہ ظاہر نگاہ سے کم ہے
غالب

 

[محمد ریحان قریشی]

جب نام ترا لیجے تب چشم بھر آوے

شاید لیجیے ہو لیجے کی جگہ. وزن تو ویسے یوں بھی درست ہے.

 

[محمد وارث]

فقط نگاہ سے ہوتا ہے فیصلہ دل کا
نہ ہو نگاہ میں شوخی تو دلبری کیا ہے
اقبال

 

[محمد وارث]

شاید لیجیے ہو لیجے کی جگہ. وزن تو ویسے یوں بھی درست ہے.

شکریہ قریشی صاحب میں ڈھونڈ ہی رہا تھا یہ شعر، 'لیجے' کے ساتھ ایک دو جگہ ملا تو سوچا کہ وزن تو یوں بھی درست ہے لیکن آپ کی بات زیادہ قرینِ قیاس لگتی ہے سو تدوین بھی کر رہا ہوں۔

 

[مریم افتخار]

میں نے اس کو اتنا دیکھا جتنا دیکھا جا سکتا تھا
لیکن پھر بھی دو آنکھوں سے کتنا دیکھا جا سکتا تھا

 

[مریم افتخار]

نگہ بلند، سخن دلنواز، جاں پر سوز
یہی ہے رختِ سفر میرِ کارواں کے لیے

 

[مریم افتخار]

وہ محض رحمت و رافت کہ بہرِ اہلِ جہاں
نیابتِ دمِ عیسی کرے ہے جس کی نگاہ

 

[مریم افتخار]

اشک آنکھوں میں کب نہیں آتا
لوہو آتا ہے جب نہیں آتا

 

[مریم افتخار]

تیری صورت سے ہے عالم میں بہاروں کو ثبات
تیری آنکھوں کے سوا دنیا میں رکھا کیا ہے

 

[اے خان]

ڈھونڈتی ہیں جسے مری آنکھیں
وہ تماشا نظر نہیں آتا

 

[اے خان]

اک حسیں آنکھ کے اشارے پر
قافلے راہ بھول جاتے ہیں

 

[اے خان]

جو ان معصوم آنکھوں نے دیے تھے
وہ دھوکے آج تک میں کھا رہا ہوں
فراق

 

[اے خان]

کہیں نہ ان کی نظر سے نظر کسی کی لڑے
وہ اس لحاظ سے آنکھیں جھکائے بیٹھے ہیں

 

[جاسمن]

یہ تو ابھی آغاز ہے جیسے اس پنہائے حیرت کا
آنکھ نے اور سنور جانا ہے، رنگ نے اور نکھرنا ہے
منیر نیازی

 

[جاسمن]

کیوں قحط ہے نیندوں کا آنکھوں کے جزیرے پر
ا،س دن کے مقدر میں اب رات نہیں ہے کیا
رئیس الدین رئیس

 

[محمد عدنان اکبری نقیبی]

آ ہی جاتا مجھےبھی تیری وفاؤں کا یقین
مست نظروں سے ذرا تو جو اشارہ کرتا

محمد عدنان اکبری نقیبی

 

[زیرک]

ہم نے پڑھی ہیں صاف صاف، ہم نے سنی ہیں غور سے
نظریں کہ جو اٹھیں نہیں، باتیں کہ جو ہوئیں نہیں
جمال احسانی

 

[جاسمن]

غمِ حیات میں اربابِ آگہی کے لیے
تری نگاہ سے بڑھ کر کوئی پناہ نہیں
عدم