آپ کے پسندیدہ اشعار!

[طارق شاہ]

جوخاردشت میں ہے سو چشمِ آبلہ سے
دیکھا ہُوا ہے تیرے محنت کشیدگاں کا

میر تقی میر

 

[طارق شاہ]

رات پیاسا تھا میرے لوہُو کا
ہُوں دِوانہ تِرے سَگِ کُو کا

شعلۂ آہ جُوں تُوں اب مجھ کو
فکر ہے اپنے ہر بُنِ مُو کا

میر تقی میر

 

[سید فصیح احمد]

ہاں اُس کے نام میں نے کوئی خط نہیں لِکھا ،
کیا اس کو یہ لکھوں , کہ لہو تھوکتا ھوں میں ؟

جون ایلیا

 

[جیہ]

پرتوئے خُور سے ، ہے شبنم کو فنا کی تعلیم
میں بھی ہوں ، ایک عنایت کی نظر ہونے تک
غالب

 

[سید فصیح احمد]

ہُوں قید حصارِ رگِ گرداب میں ، سرمد !
کوئی نہیں جو مجھ کو کنارے کا پتہ دے

سرمد صہبائی

پہلی بار نظر سے گُذرا، یوں تو مکمل ٹکڑا ہی جان لیوا ہے مگر خاص طور پہلا مصرع کیا ہی تباہی انگیز مصرع ہے ۔۔ !! بہت سی داد آپ کے اِنتخاب کے واسطے

 

[سید فصیح احمد]

پرتوئے خُور سے ، ہے شبنم کو فنا کی تعلیم
میں بھی ہوں ، ایک عنایت کی نظر ہونے تک
غالب

واہ !! مقرر !!

 

[سید فصیح احمد]

یونہی سا تھا کوئی جس نے مجھے مِٹا ڈالا
نہ کوئی نُور کا پُتلا ، نہ کوئی زہرہ جبیں

فراق گورکھپوری

شاہ جی ہم تو آپ کے ذوق کے مرید ہو چُکے تا ہمیش آباد رہیں آمین !

 

[جیہ]

واہ !! مقرر !!

مقرر کہ مکرر؟

 

[سید فصیح احمد]

مقرر کہ مکرر؟

سچ کہوں گا کہ میں اپنی تیز رفتار طبیعت کی وجہ سے املا میں بیحد کمزور ہوں ، سوچا کہ بات گو مول کی جائے مگر میں یہ بھی نہیں کہ سکتا کہ ٹائپو ہے ، " ک " اور " ق " میں کی بورڈ پر کافی فاصلہ ہے
درستگی کے لیئے شکریہ پیاری بہن

 

[طارق شاہ]

یک نظر بیش نہیں فُرصتِ ہستی غافل !
گرمیِ بزم ہے اِک رقصِ شرر ہونے تک

مرزا اسداللہ خاں غالب

 

[سید فصیح احمد]

یک نظر بیش نہیں فُرصتِ ہستی غافل !
گرمیِ بزم ہے اِک رقصِ شرر ہونے تک
مرزا اسداللہ خاں غالب

اِس غزل میں میرا پسندیدہ شعر یہ ہے ۔۔

ہم نے مانا کہ تغافل نہ کرو گے ، لیکن
خاک ہو جائیں گے ہم، تم کو خبر ہونے تک

 

[سید فصیح احمد]

گھستے گھستے مٹ جاتا، آپ نے عبث بدلا
ننگِ سجدہ سے میرے، سنگِ آستاں اپنا

غالب

 

[صائمہ شاہ]

تھا خواب میں خیال کو تجھ سے معاملہ
جب آنکھ کھل گئی نہ زیاں تھا نہ سود تھا

غالب

 

[طارق شاہ]

آزادیِ نسِیم مُبارک کہ ہر طرف
ٹُوٹے پڑے ہیں حلقۂ دامِ ہَوا سے گُل

جو تھا ، سو موجِ رنگ کے دھوکے میں مرگیا
اے وائے ، نالۂ لبِ خونیں نوائے گُل !

مرزا اسداللہ خاں غالب

 

[صائمہ شاہ]

سیکھے ہیں مہ رخوں کے لیے ہم مصوّری
تقریب کچھ تو بہرِ ملاقات چاہیے

غالب

 

[صائمہ شاہ]

گھر میں تھا کیا کہ ترا غم اسے غارت کرتا
وہ جو رکھتے تھے ہم اک حسرتِ تعمیر، سو ہے

غالب

 

[صائمہ شاہ]

حاصل سے ہاتھ دھو بیٹھ اے آرزو خرامی
دل جوشِ گریہ میں ہے ڈوبی ہوئی اسامی

اس شمع کی طرح سے جس کو کوئی بجھائے
میں بھی جلے ہؤوں میں ہوں داغِ نا تمامی

غالب

 

[صائمہ شاہ]

کی اس نے گرم سینۂ اہلِ ہوس میں جا
آوے نہ کیوں پسند کہ ٹھنڈا مکان ہے

ہے بارے اعتمادِ وفاداری اس قدر
غالب ہم اس میں خوش ہیں کہ نا مہربان ہے

غالب

 

[خالد محمود چوہدری]

ناصر کیا کہتا پھرتا ہے کچھ نہ سنو تو بہتر ہے
دیوانہ ہے دیوانے کے منہ نہ لگو تو بہتر ہے
(ناصر کاظمی)​

 

[صائمہ شاہ]

دل کا پتھّر نہ کسی سے پگھلا
لوگ کرتے رہے دیں کی باتیں

احمد ندیم قاسمی