آپ کے پسندیدہ اشعار!

[صائمہ شاہ]

دل راکھ ہو چکا تو چمک اور بڑھ گئی،
یہ تیری یاد تھی کہ عمل کِیمیا کا تھا

احمد ندیم قاسمی

 

[طارق شاہ]

قامت سے تیرے صا نعِ قدرت نے اے حسِیں
دِکھلا دِیا ہے حشْر کو سانْچے میں ڈال کے

اکبر الہٰ آبادی

 

[صائمہ شاہ]

وفا سرشت میں ہوتی تو سامنے آتی
وہ کیا فلک سے نبھائیں گے جو زمیں کے نہیں

افتخار عارف

 

[کاشفی]

لو فقیروں کی دعا ہر طرح آباد رہو
خوش رہو، موجیں کرو، تازے رہو، شاد رہو
(انشاء اللہ خاں "انشا")

 

[صائمہ شاہ]

سامَری سانپ ہیں وہموں کے ہجوُم
شوق مُوسیٰ کا عَصا مانگتا ہے

محسن نقوی

 

[عینی مروت]

صرف ہاتھوں کو نہ دیکھو کبھی آنکھیں بھی پڑھو
کچھ سوالی بڑے خود دار ہُوا کرتے ہیں

محسن نقوی

 

[طارق شاہ]

بشر ہُوں میں فرشتہ کیوں بنوں؟ جیسا ہوں اچھا ہوں
بغاوت اپنی فطرت سے ، نصیبِ دُشمناں ، کیوں ہو

یاس یگانہ چنگیزی

 

[طارق شاہ]

ریاضت سے جو حاصِل ہو وہی سچّی مُسرّت ہے
میسّر آسکے صاحب تو اِن داموں گراں کیوں ہو

یاس یگانہ چنگیزی

 

[طارق شاہ]

واقعہ یہ ہے کہ بدنام ہُوئے
بات اِتنی تھی کہ آنسو نِکلا

ناصر کاظمی

 

[طارق شاہ]

لے اُڑی سبزۂ خود رو کی مہک
پھر تِری یاد کا پہلُو نِکلا

ناصر کاظمی

 

[طارق شاہ]

رہِ حیات میں کچھ مرحلے تو دیکھ لئے
یہ اور بات تری آرزو نہ راس آئی

ناصر کاظمی

 

[طارق شاہ]

ہے خِرد کی، عِشق کی دونوں کی ہستی پر نظر !
یہ شہید نغمہ ہے، وہ مُبتلائے ساز ہے

ہوش باقی ہُوں، تو اُس پر کاوشِ بیجا بھی ہو
کیا خبر مُجھ کو، کہ یہ آواز ہے یا ساز ہے

اصغر گونڈوی

 

[طارق شاہ]

تیری شوخی، تِری نیرنگ ادائی کے نِثار
اِک نئی جان ہے تجدِید تمنّا ہونا

اصغر گونڈوی

 

[طارق شاہ]

حُسن کے ساتھ ہے بیگانہ نِگاہی کا مزہ
قہْر ہے قہْر مگر عرضِ تمنّا ہونا

اصغر گونڈوی

 

[طارق شاہ]

مائلِ شعر و غزل پھر ہے طبیعت اصغر
ابھی کچُھ اور مُقدّر میں ہے رُسوا ہونا

اصغر گونڈوی

 

[طارق شاہ]

کُچھ سمجھ میں نہیں آتا کہ یہ کیا ہے حسرت
اُن سے مِل کر بھی نہ اظہارِ تمنا کرنا

حسرت موہانی

 

[طارق شاہ]

اِک نظر ہی تیری کافی تھی کہ اے راحتِ جاں
کُچھ بھی دُشوار نہ تھا مُجھ کو شکیبا کرنا

حسرت موہانی

 

[طارق شاہ]

رفتارِ زندگی میں سُکوں آئے کیا مجال !
طوفاں ٹھہر بھی جائے تو دریا بہا کرے

یاس یگانہ چنگیزی

 

[طارق شاہ]

اُس کے بغیر آج بہت جی اُداس ہے
جالب ! چلو کہیں سے اُسے ڈھونڈ لائیں ہم

حبیب جالب

 

[طارق شاہ]

بھُلاتا لاکھ ہُوں، لیکن برابر یاد آتے ہیں
الٰہی ترکِ اُلفت پر وہ کیوںکر یاد آتے ہیں

نہ چھیڑ اے ہم نشیں ، کیفیتِ صہبا کے افسانے
شرابِ بے خودی کے ، مُجھ کو ساغر یاد آتے ہیں

نہیں آتی تو یاد اُن کی ، مہینوں تک نہیں آتی
مگر جب یاد آتے ہیں، تو اکثر یاد آتے ہیں

حقیقت کُھل گئی حسرت ، ترے ترکِ محبّت کی
تُجھے تو اب وہ پہلے سے بھی ، بڑھ کر یاد آتے ہیں

حسرت موہانی