آپ کے پسندیدہ اشعار!

[طارق شاہ]

لیلائے سُخن کو آنکھ بھر کے دیکھو
قاموس اور لغات سے گُزر کر دیکھو

الفاظ کے سر پر نہیں اُڑتے معنی
الفاظ کے سینے میں اُتر کر دیکھو

جوش ملیح آبادی

 

[سید فصیح احمد]

اِس سمت سمیٹو تو بکھرتا ہے اُدھر سے
دُکھ دیتے ہوئے یار نے دامن نہیں دیکھا
۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔ ۔

شاعر: نا معلوم ، اگر کسی دوست کو علم ہو تو برائے مہربانی رسید کر دیں۔ جزاک اللہ !

 

[طارق شاہ]

دل کہ ذکرِ وصال کرتا ہے
شوق کو امرِ محال کرتا ہے

حسرت موہانی

 

[طارق شاہ]

دلِ مُضطر کی سادگی دیکھو
پھر انُھیں سے سوال کرتا ہے

حسرت موہانی

 

[طارق شاہ]

دلِ مایوس بھی عجب شے ہے
پھر اُسی کا خیال کرتا ہے

حسرت موہانی

 

[طارق شاہ]

الله ری محرُومی ، الله ری ناکامی !
جو شوق کیا ہم نے سو خام نظر آیا

حسرت موہانی

 

[طارق شاہ]

ہجُومِ غم میں نہیں کوئی تِیرہ بختوں کا
کہاں ہے آج تُو، اے آفتابِ نیم شبی

اصغر گونڈوی

 

[طارق شاہ]

سرشتِ عشق طلب اور حُسن بے پایاں
حصُولِ تشنہ لبی ، ہے شدید تشنہ لبی

اصغر گونڈوی

 

[طارق شاہ]

وا ہسراتآ ، رہی یہ تمنّا تمام عمر !
اک دن دبیر کہہ کے ، پُکارا نہ پیار سے

مرزا دبیر

 

[طارق شاہ]

دبیر! اب بھی مانو میں کہتا ہُوں تم سے
وہاں لوگ دشمن تمھارے بہت ہیں

مرزا دبیر

 

[طارق شاہ]

قیس و فرہاد اور جنابِ دبیر
دشت اور کوہ اُن کے گھر کے ہیں

مرزا دبیر

 

[طارق شاہ]

اوجِ راحت کو یُوں زوال نہیں !
کب مجھے تیرا ہی خیال نہیں

یوسف بیجو

 

[طارق شاہ]

کیا تعجب ہے کہ اُس کو دیکھ کر آجائے رحم !
واں تلک کوئی کسی حیلے سے پُہنچادے مجھے

مرزا اسداللہ خاں غالب

 

[طارق شاہ]

کِسی کا عہدِ رفاقت ، وفا ہُوا ہی نہیں
جسے میں سمجھا تھا اپنا، مِرا ہُوا ہی نہیں

یہ ٹھیک ہے کہ محبّت نے راستے بدلے
مگر وہ شخص تو دِل سے جُدا ہُوا ہی نہیں

باقر زیدی

 

[عبدالقیوم چوہدری]

دل پہ مت لیجئے گا میری بات
میرے دل سے اتر گئے ہیں آپ!

 

[طارق شاہ]

عارف! مُجھے بھی دُکھ تھا کبھی کائِنات کا
خود میں اُلجھ گئی ہے ، مِری ذات اِن دنوں

افتخارعارف

 

[طارق شاہ]

اُلجھا دِیا ہے مُجھ کو غمِ روزگار نے !
مُمکن نہیں ہے تُجھ سے مُلاقات اِن دنوں

افتخارعارف

 

[طارق شاہ]

جواب دیتا رہا دہشتوں کا دہشت سے
زمانہ واقفِ مہر و وفا ، ہُوا ہی نہیں

باقر زیدی

 

[طارق شاہ]

گِلہ نہیں ہے ، فقط عرضِ حال ہے، باقر
کوئی ، ہمارا مزاج آشنا ہُوا ہی نہیں !

باقر زیدی

 

[طارق شاہ]

ابھی تو جیب و گریباں سبھی سلامت ہیں
ابھی تو جشنِ بہاراں بپا ہُوا ہی نہیں

باقر زیدی