آپ کے پسندیدہ اشعار!

[طارق شاہ]

تِری نظر کا کرشمہ ، تِرے شباب کا جوش
شراب پی بھی نہیں ، اور ہو گئے مدہوش

باقر زیدی

 

[طارق شاہ]

ہے کوئی یار پُرانا ، نہ کوئی حلقہ بگوش !
کوئی نہیں ہے جو ہوتا ہمارے دوش بدوش

باقر زیدی

 

[طارق شاہ]

راز کی بات کیوں کِسی کہو !
منہ سے نِکلی ہُوئی پرائی ہے

باقر زیدی

 

[طارق شاہ]

آج تو بے سبب اُداس ہے جی
عشق ہوتا ، تو کوئی بات بھی تھی

جلتا پھرتا ہوں میں دوپہروں میں
جانے کیا چیز کھو گئی میری

ناصر کاظمی

 

[طارق شاہ]

محبت میں غلط فہمی اگر اِلزام تک پہنچے
کِسے معلوم ، کِس کا نام ، کِس کے نام تک پہنچے

تیری آنکھوں کے ٹُھکرائے ہُوئے ، وہ لوگ تھے شاید !
جو اِک شرمندگی ہونٹوں پہ لے کر، جام تک پہنچے

سبھی رستوں پہ تھے شعلہ فشاں حالات کے سُورج
بہت مُشکل سے ، ہم اُن گیسوؤں کی شام تک پہنچے

کِسی نے بھی ، نہ اپنی دھڑکنوں میں دی جگہ جِن کو !
وہ سارے وَلوَلے میرے دلِ نا کام تک پہنچے

سجا کر آئیں جب سونے کا چشمہ اپنی آنکھوں پر
نظر ہم مُفلسوں کی ، تب کہیں اُس بام تک پہنچے

قتیل ! آئینہ بن جاؤ زمانے میں محبّت کا
اگر تُم چاہتے ہو ، شاعری الہام تک پہنچے

قتیل شفائی

 

[طارق شاہ]

وہ معجزات کی حد تک پُہنچ گیا ہے قتیل !
حرُوف کوئی بھی لِکھّوں اُسی کا اِسم بنے

قتیل شفائی

 

[طارق شاہ]

کہانیاں ہی سہی ، سب مبالغے ہی سہی
اگر وہ خواب ہے تعبیر کر کے دیکھتے ہیں

احمد فراز

 

[طارق شاہ]

سُخن کی قدر دانی زندگانی میں نہیں جاتی
یہاں جب شمع بُجھ لیتی ہے تب پروانہ آتا ہے

حفیظ جالندھری

 

[طارق شاہ]

پاس رہ کر بھی ہمیشہ وہ بہت دُور مِلا
اُس کا اندازِ تغافل تھا خُداؤں جیسا

مُحسن نقوی

 

[طارق شاہ]

جی دیکھا ہے مر دیکھا ہے
ہم نے سب کچھ کر دیکھا ہے

برگِ آوارہ کی صُورت
رنگِ خشک و تر دیکھا ہے

حبیب جالب

 

[طارق شاہ]

ہم نے اِس بستی میں جالب
جُھوٹ کا اُونچا سر دیکھا ہے

حبیب جالب

 

[طارق شاہ]

خُمارِ بَلا نوش ، تُو اور توبہ !
تُجھے زاہدوں کی نظر لگ گئی ہے

خماربارہ بنکوی

 

[طارق شاہ]

آتے آتے مِرا نام سا رہ گیا
اُس کے ہونٹوں پہ کُچھ کانپتا رہ گیا

جُھوٹ والے کہیں سے کہیں بڑھ گئے
اور میں تھا ، کہ سچ بولتا رہ گیا

وہ مِرے سامنے ہی گیا ، اور میں
راستے کی طرح دیکھتا رہ گیا

آندھیوں کے ارادے تو اچھے نہ تھے
یہ دِیا کیسے جلتا ہُوا رہ گیا

وسیم بریلوی

 

[طارق شاہ]

مذہب کا ہو کیونکر علم و عمل، دل ہی نہیں بھائی ایک طرف
کرکٹ کی کھلائی ایک طرف، کالج کی پڑھائی ایک طرف

کیا ذوقِ عبادت ہو اُن کو، جو مس کے لبوں کے شیدا ہیں
حلوائے بہشتی ایک طرف، ہوٹل کی مٹھائی ایک طرف

اکبرالہٰ آبادی

 

[طارق شاہ]

غیر سے رکھنا پڑا مجبور ہو کر واسطہ
تم ہمارے دل میں ہو ، دشمن تمہارے دل میں ہے

جل گیا گلشن میں گھر اور قید کی مدت بھی ختم
اب قفس سے چُھوٹنے والا بڑی مُشکل میں ہے

کیا کِسی مظلوُم کی گردن پہ خنجر رُک گیا
دَم بخود اب تک زمانہ کوچۂ قاتل میں ہے

غیر سے ترکِ تعلّق کی قسم والے ، سلام
کون یہ بیٹھا ہُوا، اب غیر کی محفِل میں ہے

جلوہ گر بزمِ حسِیناں میں ہیں وہ اِس شان سے
چاند جیسے اے قمر! تاروں بھری محفل میں ہے

قمر جلالوی

 

[ام اریبہ]

انسان کے ہوتے ہوئے انسان کا یہ حشر
دیکھا نہیں جاتا ہے مگر دیکھ رہا ہوں

 

[سید فصیح احمد]

اُس کی اُمیدِ ناز کا ہم سے یہ مان تھا کہ آپ
عُمر گُزار دی جیئے ، عُمر گُزار دی گئی

پیارے جون ایلیا

 

[طارق شاہ]

اعتراف

سوچتی ہُوں، مُقدس وفاؤں کی قربان گہ پر چلوں
اعترافِ گنہ آج میں کر نہ لوُں؟
برہمئ دلِ دوستاں کی سزاوار ہُوں
میں خطا کار تھی، میں خطا کار ہُوں
ساتھ ، میں ہر قدم پر تمہارا نہیں دے سکی
میں کبھی منزلوں تم سے آگے رہی
مجھ کو قالین پارے بچھانے کی تو مقدرت ہی نہ تھی
راستے میں مگر جتنے کانٹے مِلے
اُن کو اپنے دِل و جاں میں پیوست کرتی گئی
ہاں مبادا گزند اُن سے پہنچے تمہیں
ساتھ بے شک تمہارا نہیں دے سکی
میں کبھی نقشِ پا کی صفت پیچھے پیچھے چلی
تاکہ مَسلی ہوئی پنکھڑیاں چُن سکوں
جو تمہارے ہی قدموں تلے آ کے روندی گئیں
دل کے آئینہ خانے میں آراستہ اُن کو کرتی رہی
دیکھ لو نکہتِ رائیگاں
آج محفوظ و مامون ہے
ہر گُلِ تر کو تم سے معنون کیا
میں نے خوشبوئے رفتہ کو اپنا لیا
پیرہن تار تار، اُنگلیاں خوُں چکاں
اپنا مسلک مگر برتر اَز جسم و جاں
کند ہوتے نہیں دردِ احساس کے نیشتر
دِل کو پھر بھی نہیں خواہشِ درگزر
جو خطا آج تک مجھ سے سرزد ہُوئی
اُس خطا سے مجھے آج تک پیار ہے
ان رہوں میں کوئی میں اکیلی نہیں
اور آشفتہ سر ساتھ ہیں
وہ جو غیروں کے پتھراؤ پر ہنس پڑے
اور اپنوں کے پُھولوں سے زخمی ہُوئے

ادا جعفری

 

[طارق شاہ]

ایسے ناداں بھی نہ تھے جاں سے گُزرنے والے
ناصحو ، پند گرو، راہگزر تو دیکھو

فیض احمد فیض

 

[طارق شاہ]

ہم سہل طلب کون سا فرہاد ہیں لیکن۔۔۔ ۔۔۔ ۔۔۔ ۔۔۔ ۔۔۔
اب شہر میں تیرے، کوئی ہم سا بھی کہاں ہے

ہم سہل طلب کون سے فرہاد تھے لیکن
اب شہر میں تیرے کوئی ہم سا بھی کہاں ہے

فیض احمد فیض