آپ کے پسندیدہ اشعار!

[طارق شاہ]

جان ہے بے قرار سی ، جسم ہے پائمال سا
اب نہ وہ داغ، وہ جگر، صرف ہے اِک خیال سا

چاہیئے عِشق میں مجھے، آپ ہی کا جمال سا
داغ ہر ایک بدر سا، زخم ہر اِک ہلال سا

دِل پہ مِرے گرائی تھیں تم نے ہی بجلیاں، مگر
آؤ نظر کے سامنے، مجھ کو ہے احتمال سا

حُسن کی سحرکاریاں، عِشق کے دِل سے پُوچھئے
وصل کبھی ہے ہجر سا، ہجر کبھی وصال سا

گُم شدگانِ عشق کے شان بھی کیا عجیب ہے !
آنکھ میں اِک سرُور سا، چہرے پہ اِک جلال سا

یاد ہے آج تک مجھے پہلے پہل کی رسم و راہ
کچھ اُنہیں اجتناب سا، کچھ مجھے احتمال سا

جگر مراد آبادی

 

[طارق شاہ]

چشمِ ساقی کی عنایات پہ پابندی ہے
اِن دِنوں وقت پہ ، حالات پہ پابندی ہے

بکھری بکھری ہُوئی زُلفوں کے فسانے چھیڑو
مے کشو! عہدِ خرابات پہ پابندی ہے

دِل شِکن ہو کے چلے آئے تِری محفل سے
تیری محفل میں تو ہر بات پہ پابندی ہے

ہر تمنّا ہے کوئی ڈُوبتا لمحہ جیسے
ساز مغموم ہیں، نغمات پہ پابندی ہے

آگ سینوں میں لگی ساغر و مینا چھلکے
کوئی کہتا تھا کہ برسات پہ پابندی ہے

ساغر صدیقی

 

[طارق شاہ]

بزمِ وفا میں آپ سے اِک پَل کا سامنا
یاد آگیا تو عہدِ شناسائی بن گیا

ساغر صدیقی

 

[طارق شاہ]

کوئی تو درد مندِ دلِ ناصبُور تھا
مانا کہ تم نہ تھے، کوئی تم سا ضرور تھا

جگرمُرادآبادی

 

[طارق شاہ]

ایسا کہاں بہار میں رنگینیوں کا جوش
شامل کسی کا خُونِ تمنّا ضرُور تھا

جگرمُرادآبادی

 

[طارق شاہ]

پلٹی جو راستہ ہی سے، اے آہِ نامُراد !
یہ تو بتا ، کہ بابِ اثر کِتنا دُور تھا

جگرمُرادآبادی

 

[طارق شاہ]

دلیلِ صُبْحِ طرب ہی سہی یہ سنّاٹا
مگر پہاڑ سی یہ رات کٹ چُکے تو کہُوں

پسِ نقاب ہی پنہاں سہی عروسِ سحر
مگر یہ پردۂ ظلمات ہٹ چُکے تو کہُوں

یہ رات بھی تو حقیقت ہے تلخ و تند و درشت
اِسے سحر کا تصوّر مِٹا نہیں سکتا

مجھے تو نیند نہیں آئے گی ، کہ میرا شعُور
شبِ سیاہ سے آنکھیں چُرا نہیں سکتا

اگر نشانِ سفر تک کہیں نہیں، نہ سہی !
میں رینگ رینگ کے یہ شب نہیں گُزاروں گا

شِکست سے مِرا اخلاق اجنبی ہے ندیم
سحر مِلے نہ مِلے، رات سے نہ ہاروں گا

احمد ندیم قاسمی

 

[نبیل احمد خاں بھٹی]

وَحشت سکُوں میں گِرَفتار ہے مَحبُوب میرا،
خاموشیِ میں مرتا ھے، سُخن گوئ میں مارتا ھے
صوفیہ شاھد. ِ

 

[صائمہ شاہ]

ہمیں بُجھانے کو اندر کا حبس کافی ہے
ہوا مزاجوں کا احسان کم اُٹھاتے ہیں

پروین شاکر

 

[طارق شاہ]

صحنِ کعبہ بھی یہیں ہے تو صنم خانے بھی
دل کی دُنیا میں گلستاں بھی ہیں ویرانے بھی

آتشِ عِشق میں پتّھر بھی پگھل جاتے ہیں
مُجرمِ سوزِ وفا شمع بھی، پروانے بھی

کچھ فسانوں میں حقیقت کی جھلک ہوتی ہے
کچھ حقیقت سے بنا لیتے ہیں افسانے بھی

ساغر صدیقی

 

[طارق شاہ]

مجھ کو پُھولوں سے شِکایت ہے نہ کانٹوں سے گِلہ
میں تِرے جلوۂ رُخسار کا دَم بھرتا ہُوں

میں نہیں شیخ و برہمن کی عقیدت کا مزار
بندگی اپنے خیالوں کی کِیا کرتا ہُوں

ساغرصدیقی

 

[طارق شاہ]

کون کہتا ہے کسی یار کو مِس کرتا ہُوں
آج کل سنگتِ اغیار کو مِس کرتا ہُوں

کام دوہرا ہے مگر سلسلہ چل جاتا ہے
سانس لیتے ہُوئے سرکار کو مِس کرتا ہُوں

میری چُھٹّی تو اُداسی میں گُزر جاتی ہے
میں زیادہ تُجھے اِتوار کو مِس کرتا ہُوں

فضل عباس

 

[طارق شاہ]

میرے سرکار کو بے کار کا غم کھاتا ہے
کیا میسّر کو بھی درکار کا غم کھاتا ہے ؟

فضل عباس

 

[طارق شاہ]

خواب یُوں آنکھ کے حصار میں ہے
جیسے نغمہ کوئی سِتار میں ہے

دُھول چَھٹ جائے تو نظر آئے
ایک منظر ابھی غُبار میں ہے

ایک دل ہی پر اختیار نہیں
ورنہ سب کچھ تو اختیار میں ہے

احتشام اختر

 

[طارق شاہ]

جو دل کے سمندر میں اُبھرتا ہے یقیں ہے
جو ذہن کے ساحل سے گُزرتا ہے گُماں ہے

انور مسعُود

 

[عبدالقیوم چوہدری]

سدا کریدتا رہتا ہوںاپنی ذات کا ڈھیر
میں‌ خود میں‌کس کو نجانے تلاش کرتا ہوں

 

[طارق شاہ]

وہ آندھیاں چلی ہیں سرِ دشتِ آرزو !
دل بُجھ گیا وفاؤں کے محور بدل گئے

فضیل جعفری

 

[طارق شاہ]

عِشق کے مُفتی نے یُوں فتوٰی دِیا
دیکھنا خُوباں کا درسِ خُوب ہے

غمزہ و ناز و ادائے نازنیں
ظلم ہے، طوفان ہے، آشوب ہے

ہر گھڑی پڑھتا ہے اشعارِ ولی
جس کو حرفِ عاشقی مرغُوب ہے

ولی دکنی

 

[طارق شاہ]

مجھ سےغم دست و گریباں نہ ہُوا تھا، سو ہُوا
چاک سینے کا، نُمایاں نہ ہُوا تھا سو ہُوا

اب تلک مجھ کو کسی شخص کے چہرے کا خیال
صورتِ آئینۂ جاں ، نہ ہُوا تھا سو ہُوا

صفِ عُشّاق میں کوئی ثانیِ مجنُوں مجھ سا !
وحشیِ کوہ و بیاباں ، نہ ہُوا تھا سو ہُوا

آہِ سوزاں سے مِرے دامنِ صحرا میں سراج !
قبر مجنُوں پہ چراغاں ، نہ ہُوا تھا سو ہُوا

سراج اورنگ آبادی

 

[صائمہ شاہ]

ارمانوں کی اِک بھیڑ لگی رہتی ہے دن رات
دل تنگ نہیں، خیر سے مہمان بہت ہیں

نصیر الدین نصیر