آپ کے پسندیدہ اشعار!

[نازنین شاہ]

کر رہے ہونگے اب بھی وہ سجدے
ہاں مگر در بدل گئے ہونگے

 

[طارق شاہ]

بارِنِگاہِ لُطف اُٹھایا نہ جائے گا !
احساں یہ کیجیے، کہ یہ احساں نہ کیجیے

حفیظ جالندھری

 

[طارق شاہ]

کیا ناخدا بغیر کوئی ڈوبتا نہیں
مجھ کو مِرے خدا سے پشیماں نہ کیجیے

حفیظ جالندھری

 

[نازنین شاہ]

جن کی آنکھوں میں سدا پیاس کے صحرا چمکیں
در حقیقت وہی فنکار ہُوا کرتے ہیں

شرم آتی ہے کہ دُشمن کِسے سمجھیں محسن
دُشمنی کے بھی تو معیار ہُوا کرتے ہیں

 

[نازنین شاہ]

گنو سب حسرتیں جو خوں ہوئی ہیں تن کے مقتل میں
مرے قاتل حسابِ خوں بہا ، ایسے نہیں ہوتا

 

[نازنین شاہ]

دھوپ میں جلتی ہیں غربت وطنوں کی لاشیں
تیرے کوچے میں مگر سایۂ دیوار نہ تھا

عشق کا جذب ہوا باعثِ سودا ورنہ
یوسفِ مصر زلیخا کا خریدار نہ تھا

 

[نازنین شاہ]

زمینِ چَمَن گل کھلاتی ہے کیا کیا
بدلتا ہے رنگ آسماں کیسے کیسے

 

[نازنین شاہ]

یہ لوگ عشق میں سچے نہ تھے وگرنہ ہجر
نہ ابتدا نہ کہیں انتہا میں آتا ہے

 

[نازنین شاہ]

یہ وقت کس کی رعونت پے خاک ڈال گیا
وہ کون بول رہا تھا خدا کے لہجہ میں

 

[نازنین شاہ]

اس ایک بات نے ثابت قدم رکھا مجھ کو
گرے پڑوں کو اٹھانے کوئی نہیں آتا

زبیر قیصر

 

[نازنین شاہ]

بھٹکنا پڑتا ہے خود اپنی ذات کے اندر
کسی کو راہ دِکھانے کوئی نہیں آتا

زبیر قیصر

 

[نازنین شاہ]

وہ مسیحا نہ بنا ہم نے بھی خواہش نہیں کی
اپنی شرطوں پہ جیئے اس سے گزارش نہیں کی

عنبرین حسیب

 

[نازنین شاہ]

جانے کیوں بجھنے لگے اول شب سارے چراغ
آندھیوں نے بھی اگرچہ کوئی سازش نہیں کی
عنبرین حسیب

 

[نازنین شاہ]

اب کے ہم نے بھی دیا ترک تعلق کا جواب
ہونٹ خاموش رہے آنکھ نے بارش نہیں کی
عنبرین حسیب

 

[نازنین شاہ]

اس نے ظاہر نہ کیا اپنا پشیماں ہونا
ہم بھی انجان رہے ہم نے بھی پرسش نہیں کی
عنبرین حسیب

 

[نازنین شاہ]

بتا رہی تھی مجھے ساز باز مہروں کی
کہ جیت کر بھی یقینی ہے مات اندر سے
(راحت سرحدی)

 

[طارق شاہ]

نِگاہیں کامِلوں پر، پڑ ہی جاتی ہیں زمانے کی
کہِیں چُھپتا ہے اکبر پُھول پتّوں میں نِہاں ہوکر

اکبر الٰہ آبادی

 

[طارق شاہ]

تم میرا حال پُوچھتے ہو باربار کیا
اپنی نِگاہ پر بھی نہیں اعتبار کیا

حفیظ جالندھری

 

[طارق شاہ]

ہو تو ایسی ہو پردہ دارئ زخم
حال دِل کا بھی آنکھ پر نہ کُھلے

احمد فراز

 

[طارق شاہ]

توسّل سے تِرے دِل میں بھرُونگا قوّتیں برقی
ذرا میری طرف بھی اے نگاہِ یار ہوجانا

جوش ملیح آبادی